Sýretti túsirgen Erlan OMAR, «EQ»
Sharýanyń shyǵyny shash-etekten. Alqaptaǵy dánniń sabaǵyn sansyz tuıaq bir taptap ótse, túmen-túmen kıikti qaıtarmaq bolyp áýrege túsken sharýanyń ózi kóligimen eki taptap ketip jatyr.
– Taıaýda ǵana Qarameńdi aýylynyń mańynda birneshe kún boıy eki kólikke mingesken alty ınspektor júrdi. Qazir olar Býrevestnık jaqqa ketti. Janýarlardy qorǵaý ınspektorlary bizdiń alqaptarmen shektesip jatqan oıda 30 myń bastan asatyn kıik júrgenin aıtty. Shynyn aıtsaq, kúndiz kúlkiden, túnde uıqydan aıyryldyq. Alqapty kún saıyn tórt kólikpen kúzetip júrmiz. Tańǵy saǵat tórt jarym-besten bastaımyz da keshki saǵat on bir-on ekige deıin, qarańǵy túskenshe júremiz. Tańerteń qaıta oralǵansha qaptaǵan kıik eginniń shetin jep qoıyp jatyr. Al alqapty basyp-janshyp, jaıpap ketkenin eseptep, onyń shyǵynyn shyǵara almaımyz ǵoı. Ár alqapta myńdap órip júr, – deıdi sharýalardyń biri.
Osylaısha, dıqandar betimen jaıylǵan kıiktiń úıirli shegirtkedeı qaptap kelip, eginge orasan zııan tıgizip jatqanyn aıtady. Qazirshe ony baqylap jatqan eshkim joq. Janýarlardy qorǵaıtyn ınspektorlardyń jumysy kıikti sur mergenniń suq myltyǵynan qorǵaýmen jáne sanaq alýmen ǵana shekteledi. Olar sharýalardyń máselesine bas qatyrmaıdy.
Kıik taptap ketip jatqan egin alqaptarynyń bári Naýyrzym memlekettik tabıǵı qoryǵynyń mańaıynda.
– Biz qoryq aýmaǵynda júrgen kıikterdi ǵana baqylaımyz. Qoryqtan tys jerde júrgen kıikterge jaýap bermeımiz. Qazir kıiktiń naqty sanyn aıta almaımyn. О́ıtkeni erte kóktemde júrgizilgen sanaq nátıjeleri qaıta óńdelip jatyr, – deıdi «Naýyrzym» qoryǵy dırektorynyń orynbasary Elaman Kúmisbekov.
Qostanaı oblysy
