Salaýatty ómir saltyn nasıhattaý maqsatynda túrli profılaktıkalyq is-sharamen qatar Astanada «Deniń saý bolý – sánde» atty konsert ótkizildi.
«Jyl saıyn ártúrli esirtki zattarynyń sany artyp keledi. Olar kópshilikke qoljetimdi ári keń taralyp jatyr. Esirtki – ómir súrý uzaqtyǵyn qysqartatyn, fızıkalyq jáne psıhıkalyq densaýlyqty buzatyn jahandyq másele. Sondyqtan da aýrýdyń aldyn alý jáne mamandardyń keńes berýi asa mańyzdy. Búgingi maqsatymyz – salaýatty ómir saltyn nasıhattaý», dedi IIM esirtki qylmysyna qarsy is-qımyl departamenti basqarmasy basshysynyń orynbasary Baqytjan Ámirhanov.
Elordanyń Qoǵamdyq densaýlyq saqtaý basqarmasynyń málimetinshe, qazirgi tańda qalalyq psıhıkalyq densaýlyq ortalyǵynda myńǵa jýyq esirtkige táýeldi adam esepte tur. Jyl basynan beri 234 naýqas stasıonarlyq emdeýden ótti. Al onyń 16 paıyzy remıssııa boıynsha esepten shyǵaryldy.
Is-shara Astana ákimdiginiń, elordalyq Qoǵamdyq densaýlyq saqtaý basqarmasynyń jáne qalalyq polısııa departamentiniń qoldaýymen ótkizildi.
