Brıfıngke Bas múftı keńesshisinen bólek, Ýaǵyz-nasıhat bóliminiń meńgerýshisi Batyrjan Mansurov pen «Zeket jáne qaıyrymdylyq» qorynyń dırektory Maqsatbek Qaıyrǵalıev qatysyp, BAQ ókilderiniń suraqtaryna jaýap berdi.
Kenjetaı Dúısenbaı Qurban aıttan bir kún buryn, ıaǵnı búgin – Arapa kúni ekenin eske saldy. «Hadısterde kelgendeı, aıt kúnderi jasalatyn ıgi isterdiń eń abzaly – qurban shalý. Hanafı mázhaby boıynsha (qurban aıt kúnderi) qurban shalýǵa shamasy kelgen dáýletti (qajetinen tys zekettiń nısap mólsherine jetken), azat, balıǵat jasyna jetken, aqyl-esi durys, qurban aıt ýaqytynda jolaýshy bolmaǵan musylmanǵa – ýájip, ıaǵnı mindet. Demek, kúndelikti kúnkórisinen bólek artyq dúnıesi bar musylmannyń qurban shalýy paryz. Eger bir otbasynyń asyraýshysy er adam ǵana bolsa, onyń shalǵan qurbandyǵy tutas otbasynyń atynan esepteledi. Al erinen bólek áıeliniń de tabysy, kúnkórisinen tys artyq mólsherde dúnıesi bolsa, ol da óz atynan qurban shalýǵa tıis», dedi ol.
Elimizde qurban shalý rásimi onlaın jáne offlaın formatta ótedi. Qazaqstan musylmandary dinı basqarmasy el azamattaryna, ásirese qala turǵyndaryna qurban shalý rásimin qashyqtan ótkizýge arnalǵan qurban2023.kz saıtyn iske qosty. QMDB tóraǵasynyń keńesshisi barsha musylman qaýymyn múftııattyń «Rabbyń úshin qurban shal» aksııasyna úles qosyp, saýapty isterde belsendi bolýǵa shaqyrdy.
«Biz qazir qasıetti Zúlhıdja aıynda otyrmyz. Bul aıda musylmandar qurban shalady ári bes paryzdyń biri bolǵan qajylyǵyn óteıdi. QMDB tóraǵasy, bas múftı Naýryzbaı qajy Taǵanuly, sonymen qatar 4 myń otandasymyz qazir qasıetti Mekkede. Qajylarymyzdyń nıeti men duǵasy qabyl bolyp, elimizge aman-esen oralýyn tileımiz. Alla Taǵala elimiz ben jerimizge berekesin jaýdyryp, shalǵan qurbandyqtarymyzdy, bergen sadaqalarymyzdy aıt kúnderi amalǵa asyrǵan árbir ıgi isterimizdi qabyl etkeı!» dep túıindedi ol.
