– Buryn negizinen hat-habar jáne sálemdemeler jetkizýmen aınalysqan poshta qyzmeti búginde zamanaýı baǵytta qyzmetin damytyp jatyr. «Qazposhta» AQ-nyń qazirgi aıaq alysy qalaı?
– Qazir álem boıynsha poshta arqyly hat-habarlar men merzimdi basylymdy jetkizý qyzmetine suranys tómendegen. Bul jaǵdaı bizdi de aınalyp ótken joq. Ol óz kezeginde qarjylyq áleýetimizge áser etetindikten, biz qyzmetti ártaraptandyrý boıynsha jumysty qolǵa alyp jatyrmyz jáne osy jolda ár klıenttiń suranysyna qulaq asýǵa daıynbyz. О́tken jylǵy jumys nátıjesine toqtalar bolsam, «Qazposhta»
62 mln-nan astam gazet-jýrnaldy, 38 mln dana hat-habar, 12 mln-ǵa jýyq sálemdemeni jetkizdi. 2022 jyly biz Ortalyq Azııadaǵy eń iri poshta qyzmetiniń operatory mártebesin saqtap qala aldyq. Aıta keteıik, «Qazposhta» – 20 myńnan astam qyzmetkeri bar úlken komanda. Biz poshta qyzmetinen bólek qarjylyq, brokerlik, sıfrlyq jáne logıstıkalyq qyzmetti usynamyz. Búginde 300 myńnan astam zańdy tulǵa bizdiń qyzmetimizge júginedi. Jeke tulǵalarǵa kelsek, shamamen 7 mln turaqty klıentimiz bar.
Jańa qyzmetter spektri týraly aıtsaq, osy jyly biz gazetter men jýrnaldarǵa onlaın jazylý servısin iske qostyq. Endi Post.kz mobıldi qosymshasy arqyly kez kelgen adam merzimdi basylymǵa jazylyp, poshta bólimshesine kelmeı-aq tólem jasaı alady. Sosyn sálemdemeler men hattardy «Kúnbe-kún» jetkizý servısi iske qosyldy. Bul servıstiń suranysqa ıe ekenin atap ótkim keledi. Ázirge ol Astanadan Almatyǵa jáne kerisinshe baǵytta qoljetimdi. Tikeleı kýrerlik qyzmetti qaıta qurý da josparymyzda bar. Taǵy bir jaǵymdy jańalyqpen bóliskim keledi. Biz «V-Post» vırtýaldy mekenjaılar qyzmetin «KazPost Keruen» jańa brendi boıynsha qaıta qurǵaly otyrmyz. Ol turǵyndarǵa túrli eldiń taýarlaryna tapsyrys jasaýǵa múmkindik beredi.
– Ortalyq Azııanyń eń iri poshta operatory retinde aımaqtyq logıstıka tizbegindegi róli qandaı?
– Birinshiden, «Qazposhta» kópke sozylǵan karantınnen keıin «Qorǵas» ShMHO aýmaǵynda bondtyq qoımany damytý baǵytynda jumys istep jatyr. Osy baǵytta biz Sıngapýr jáne Dýbaı tájirıbesine súıenemiz. Jalpy, osyndaı alańnyń ashylýynyń arqasynda elimizdiń tranzıttik áleýetin damytyp, ınvestısııa tartýǵa qolaıly jaǵdaı jasaı alamyz. Al bul óz kezeginde jańa jumys oryndarynyń ashylýyna múmkindik beredi. Ekinshiden, biz kompanııanyń damý vektoryn kýrerlik jáne sálemdemelerdi jetkizý kólemin arttyrýǵa baǵyttaımyz. Bıyl negizgi strategııalyq bastamalar elektrondyq kommersııany damytý salasyna arnalady. Osy oraıda sapanyń jańa standarttaryn engizip, ony synaqtan ótkizemiz. Sodan keıin salynǵan ár teńgeniń tıimdiligin baǵalaımyz.
Men «Qazposhtany» Ortalyq Azııa óńirindegi barlyq sálemdemege «qaqpa» retinde kóremin. Eger qarapaıym tilmen aıtsaq, biz «esikti aıqara ashyp», el turǵyndaryna álemniń kez kelgen marketpleısinen taýar satyp alý múmkindigin usynyp, qysqa merzimde qoljetimdi baǵamen jetkizilimdi qamtamasyz etýimiz qajet. Bul maqsatta «Qazposhta» halyqaralyq poshta bıznesine basa mán berip otyr. Máselen, álemniń jetekshi halyqaralyq alańdary – «Amazon», «Aliexpress», «Iherb», taǵy basqalarmen kelissóz júrgizip jatyrmyz. Qazir qolaıly ınterfeısi bar «QazPost» qosymshasyn ázirleýge eń úzdik IT mamandary eńbektenip jatyr. Ol klıentterge yńǵaıly servısteri bar qosymshaǵa aınalady dep senemin.
– Kóp jaǵdaıda qala turǵyndary ınternet arqyly saýda jasap jatady, al aýyl turǵyndaryna ne isteý kerek? Osy rette, aýyldaǵy poshta bólimshelerin qalaı damytýdy kózdep otyrsyzdar?
– Elimiz boıynsha búginde «Qazposhtanyń» 2940 bólimshesi jumys isteıdi. Olardyń ishinde 196 bólimshe seriktestik negizde qyzmet kórsetedi. Osylaısha, kompanııa óz qyzmetimen barlyq el turǵynyn qamtamasyz etedi. Bólimshelerde azamattar poshta jáne qarjylyq qyzmetterden bólek, logıstıkalyq, brokerlik, agenttik jáne e-commerce qyzmet terin ala alady.
Shynynda, aýyldyq jerlerdegi bólimshelerdi ustap turýdyń paıdasynan góri shyǵyny kóp. Biz tıimsiz bolsa da, aýylǵa jetkizilim marshrýttaryn saqtap qalýǵa májbúrmiz. Sebebi aýyl-aımaqtarynda shamamen 7 mln-ǵa jýyq adam turady. Olarǵa da sapaly poshta, qarjylyq, agenttik jáne memlekettik qyzmetter usynylýǵa tıis. Bul baǵytta telemedısınany, oqytý baǵdarlamalaryn damytý, túrli sala boıynsha keńes berý, t.b. qyzmetterdi iske qosý ıdeıasy bar. Osy jyly Sıfrlyq damý, ınnovasııalar jáne aeroǵarysh ónerkásibi mınıstrliginiń qoldaýymen, «One Web» kompanııasy arqyly batys óńirlerdegi aýyldarǵa spýtnıktik ınternet ornatý boıynsha alǵashqy qanatqaqty jobany iske qosamyz. Jalpy, elektrondyq saýda tek qalalarda emes, barlyq jerde damýy kerek. Klıentte taýardy eldiń kez kelgen núktesinen 48 saǵat ishinde satyp alyp, qol jetkizý múmkindigi bolýǵa tıis.
– Soǵan keńirek toqtala ketseńiz? Máselen, elimizdiń aýmaǵynda ǵana emes, álemniń kez kelgen memleketinen zat satyp alsaq, ony jetkize alasyzdar ma?
– Qazirgi kúni tanymal álemdik dúkenderdiń barlyǵy birdeı elimizge jetkizilim jasamaıdy. Sebebi Ortalyq Azııa elderiniń naryǵy shaǵyn. Jahandyq bıznespen ıntegrasııaǵa túsý úshin búkil el kóleminde belsendilik tanytýymyz qajet. «Qazposhta» azamattardyń álemniń kez kelgen núktesinen taýarǵa tapsyrys berýine ońtaıly marshrýt jasaı alady. Qazir shetelden zatty jetkizý merzimi 45 kúnge deıin sozylsa, bolashaqta biz ony 10-12 kúnge deıin qysqartýdy kózdep otyrmyz, ıaǵnı jetkizý ýaqytyn 70%-ǵa qysqartamyz. Bul turǵyda biz ózimizdiń geografııalyq artyqshylyǵymyzdy paıdalanamyz – «Qazposhta» álemdik marketpleıster úshin suryptaý-qoıma habyna aınalyp, Batys pen Shyǵysty baılanystyratyn bolady.
– «Qazposhta» jumysyna qatysty gazet-jýrnaldar redaksııalarynyń, oqyrmandardyń shaǵymy kóp. Basylymdardyń ýaqytynda jetkizilmeıtini aıtylady. Osynyń sebebi nede? Bul problemany túbegeıli sheshýge bolmaı ma?
– Ýaqtyly jetkizilmeý sebebiniń biri – poshtashylar men kýrerler jalaqysynyń tómendigi, osyǵan baılanysty keıbir ýchaskelerde ol oryndar bos tur. Sonymen qatar redaksııalar tarapynan basylymdardyń baspadan shyǵý kestesin buzý nemese qarjylyq qıyndyqqa baılanysty nómirlerdi biriktirý jaǵdaıy jıilep ketti. Odan bólek, keıbir mekenjaılarda, ásirese jańa úılerde poshta jáshikteriniń bolmaýy, úı nómirleriniń durys kórsetilmeýi, kópqabatty úılerge kirýge múmkindik bolmaýy da basylymdardyń der kezinde jetkizilmeýine áser etedi. Bul problemalardy sheshý úshin jergilikti atqarýshy organdar múlik ıeleriniń birlestikterimen birlesip, abonenttik poshta jáshikterin túgendeý, kópqabatty turǵyn úılerdiń kireberisterine poshtashylardyń kirýi úshin domofondarǵa ámbebap kilt berý jaǵyn qarastyrýy qajet.
– «Qazposhta» baspasózge jazylý naýqanyn uıymdastyrýǵa nege belsene atsalyspaıdy? Buryn jazylym naýqanynda gazettermen birlesken is-sharalar jıi ótetin. Qazir ondaı is-sharalar nege uıymdastyrylmaıdy?
– «Qazposhta» óz tarapynan gazet-jýrnalǵa jazylý isine atsalysyp keledi. Atap aıtqanda, jyl saıyn jyldyq nemese jartyjyldyq jazylý naýqany kezeńinde respýblıkalyq jáne jergilikti basylymdardyń redaksııalarymen birlesip, «Jazylýshylar kúni» sııaqty is-sharalar ótkizedi, onda aksııalar, jazylýshylar arasynda utys oıyndary, basylymdarmen tanystyrý is-sharalary qolǵa alynady. Odan bólek, joǵaryda aıtqanymdaı, gazet-jýrnalǵa onlaın jazylý tetigi iske qosyldy. Ol «Qazposhta» saıty jáne kez kelgen smartfonmen mobıldi qosymsha arqyly qoljetimdi. Sonymen qatar jazylym tırajdaryn ulǵaıtý maqsatynda «Qazposhta» qyzmetkerlerin yntalandyrý júıesi ázirlendi. Osy sharalar aldaǵy ýaqytta baspasózge jazylý kólemin arttyrady dep senemiz.
– Áńgimeńizge rahmet.
Áńgimelesken
Eskendir ZULQARNAI,
«Egemen Qazaqstan»
