Buqaralyq aqparat quraldary qyzmetkerleriniń kásibı merekesine oraı teledıdar arqyly esimi kópke tanys jýrnalısterdi kórip, solardaı bolsam dep armandap, sol armany órge jetelep, búginde aqparat aıdynynda ózindik orny bar «Juldyz FM» radıosynyń bas redaktory Anar Myńbaeva týraly áńgimelemekpiz.
«Biz mektepte oqyp júrgende sol ýaqyttaǵy qazaq televızııasynyń bet-beınesin qalyptastyrǵan Qymbat Hangeldına, Qymbat Dosjan, Jaına Slambek sekildi tanymal telejýrnalısterdi kórip, qyzyǵatynbyz. Men de teledıdardan halyqtyń aldynda sóılesem degen bala arman boldy. Ol kezde jýrnalıstıkanyń shyn mán-maǵynasyn tereń uǵynbasaq ta, mektepti bitirgen soń, jýrnalıst bolam degen maqsatqa nyq bekingenim esimde. Bunyń úlken jaýapkershilik jáne ózindik tárbıe quraly ekendigine ýnıversıtetke oqýǵa túskennen keıin ǵana kóz jetkizdik», deıdi áriptesimiz.
Anardyń osy saladaǵy eń alǵashqy eńbek joly stýdent kezinde elordalyq telearnalardyń birinde bastalǵan edi. Degenmen keıin qyzmet joly kúrt ózgerip, radıo salasyna birjola bet burdy. «Radıoǵa júrek qalaýymmen keldim dep aıta almaımyn. О́zimdi teledıdardyń adamymyn dep sanaýshy edim. Biraq otbasyn qurýyma baılanysty elordadan Almaty qalasyna qonys aýdarǵan soń, ońtústik astanamyzdan buıyrǵan alǵashqy jumysym radıo boldy. Degenmen, radıonyń bir sıqyry bar ma, kim bilgen, buryn-sońdy tanys ta beıtanys jańa álemge bir bas suqqannan keıin ózimniń janyma eń jaqyn, kóńilim qalaıtyn kásibimniń osy ekenine kózim jetti. Sodan beri, mine, osy salada júrgenime 15 jyl boldy», deıdi ol.
Búginde jańa medıa qaryshtap damyp, jan-jaǵyn jaıpap kele jatqan zaman. Soǵan baılanysty dástúrli BAQ-tyń órisi burynǵydan tarylyp, oqyrmany men kórermeni azaıǵany belgili. Degenmen shyntýaıtyna kelsek, jańa medıanyń damýy radıo salasyna keri áserin tıgizbegenin, kerisinshe onyń burynǵydan da keńirek tanymal bolýyna túrtki bolǵanyn kórip otyrmyz. О́ıtkeni radıo baspasózden keıin ekinshi bolyp ómirge kelgen kónekóz buqaralyq aqparat quraly bolǵanyna qaramastan, qazirgi kúni aqparat maıdanynan óz ornyn taýyp, jańa medıa múmkindikteriniń arqasynda tanymaldyǵyn arttyra túsken.
– Radıonyń ózge buqaralyq aqparat quraldarynan birqatar aıyrmashylyǵy bar, – deıdi Anar Myńbaeva. – Máselen, teledıdarda jýrnalıst ózi kóterip otyrǵan máseleni halyqqa jetkizý úshin tek sóılep qana qoımaı, ony vıdeo arqyly súıemeldeıtin bolsa, radıojýrnalıst munyń bárin tek daýyspen ǵana jetkizedi. Halyqqa túsinikti tilmen, mádenıetti de naqty ári yqsham sóıleý arqyly oıymyzdy jetkizýimiz kerek. Abaı atamyzdyń «Tilge jeńil, júrekke jyly tıip, tep-tegis jumyr kelsin aınalasy» degen sózin radıojýrnalısterdiń sóz qoldanysyna qatysty aıtsaq ta bolady. Taban astynda qıynnan qıystyryp sóz tabý, tyńdarmanǵa jaǵatyn ári jaǵymdy daýyspen ádemi sóıleý bilý – sheberlikpen qosa tájirıbeni talap etedi...
Anardyń aıtýynsha, radıonyń bir artyqshylyǵy – basqa BAQ-tyń úni jete qoımaıtyn oryndarǵa da taralý múmkindigi. Máselen, búginde kóp adam radıony kóbine kólikte otyryp tyńdaıdy. Kólik quraldarynyń basy bútin «monopolısine» aınaldy desek te, artyq aıtqandyq emes. Odan bólek, tabıǵat aıasynda, saıabaqta, kóshede júrip te radıo tyńdaýǵa bolady. Sondyqtan onyń aıasy keńirek ekenine shúbá joq.
– Radıonyń kópshilik kóńiline jol tabar erekshelikteriniń biri – ondaǵy kóńil kóterý baǵdarlamalary. Mundaı habarlar tek tikeleı efırde ótetini belgili. Sol sebepti bul jýrnalısterden úlken jaýapkershilikti jáne sheberlikti, jınaqylyqty talap etedi. Seniń mindetiń – tyńdarmandardyń kóńilin kóterý bolǵandyqtan, ózińniń kóńil kúıiń bolmasa da, ómirińde qandaı da bir problema bolsa da, efırge shyǵar aldynda onyń bárin syrtqa qaldyrýyń qajet. О́ıtkeni tyńdarman júrgizýshiniń kóńilsiz otyrǵanyn, aıtqan sózderiniń shynaıy emestigin de sezedi. Sol sebepti basqa dúnıeniń bárin umytyp, efırdi tyńdap otyrǵan halyq úshin óz kóńil kúıin «qurbandyqqa» shalý – bizdiń mindetimiz, – deıdi Anar Myńbaeva.
