Qala ákimdigi áleýmettik joba aıasynda Astanaǵa 1000 oqýshy keletinin habarlady. Bul tizimge az qamtylǵan, kópbalaly otbasynda tárbıe kórgen jasóspirimder, jetim, ata-anasynyń qamqorlyǵynsyz qalǵan jáne erekshe qabiletti ári úlgerimi de jaqsy balalar engen. Qonaqtardy qala ákimdiginiń mamandary kútip alyp, sapardyń sátti ótýin qadaǵalaıdy. Jobanyń baǵdarlamasyna saı ár úsh kún saıyn óńirlerden josparly túrde 10-14 jastaǵy 50 bala keledi.
Áleýmettik týrdyń alǵashqy kúninde qala ákimdiginiń mamandary Abaı oblysynan kelgen qonaqtardy «Báıterek» monýmentiniń mańynda qarsy alyp, sát-sapar tiledi. Kópshiliktiń ortasynda Astana qalasy ınvestısııa jáne kásipkerlikti damytý basqarmasy týrızmdi damytý bóliminiń basshysy О́mirzaq Tileýjan keleshekte áleýmettik týrdy dástúrli túrde uıymdastyrýǵa bolatynyn aıtty.
– Áleýmettik týrda elimizdiń barlyq oblysynan, respýblıkalyq mańyzy bar qalalardan 1000 oqýshyny qamtýdy josparlap otyrmyz. Olar úsh kúnde aldyn ala ázirlegen ekskýrsııalyq baǵdarlama boıynsha Astananyń týrıstik, áleýmettik-mádenı nysandaryn aralaıdy. Áleýmettik jobanyń negizgi maqsaty – jasóspirimderge elordany kórsetip, tarıhyn tanytý. Biz keleshekte osy áleýmettik týrdy dástúrli túrde uıymdastyrýdy josparlap otyrmyz. Sol úshin de keıin qandaı da bir eskertý, usynystar bolsa, retteýge nıettemiz.
Abaı oblysy, Aıagóz aýdany, Qosaǵash aýyly, Sh.Ýálıhanov atyndaǵy mekteptiń oqýshysy Qýanysh Sembekov áleýmettik týrda Astanany aralaýmen shektelmeı, jańa dostar tapqanyna qýanǵanyn jasyrmady.
– Astanaǵa buǵan deıin de kelgenmin. Biraq men barmaǵan, kórmegen nysandar bar eken. Baıqaǵanym, elordada jańa ǵımarattar salynyp, jyldan-jylǵa kórkeıip jatyr. Menimen birge Abaı oblysynan kelgen qatarlastarymnyń arasynda buryn-sońdy elordaǵa saparlamaǵandar baryn bildim. Olarǵa elorda týraly kórgen-bilgenimdi aıttym. Búgin tańerteń poıyzdan túsken boıda áýeli qonaqúıge ornalasyp alǵan soń, qalany aralaýǵa shyqtyq. Aqordany, jańadan salynǵan meshitti kórip, «Báıterekke» kelip otyrmyz. Astanadaǵy úsh kún meniń jáne dostarymnyń jadynda qalatyn tarıhı sát dep oılaımyn. Sebebi bıyl eldigimizdiń sımvoly – Elordamyzǵa 25 jyl. О́zim shahmat, dombyra úıirmelerine qatysyp júrmin. Respýblıkalyq óner baıqaýlarynda top jardym. Menimen qelgen dostarym da ónerli ári bilimdi eken. Olardyń ishinde qazirden Astanada bilim alýdy armandap júrgen dostarym bar, – deıdi Qýanysh.
Osylaısha, áleýmettik týrmen Astanaǵa saparlaǵan balalar keste boıynsha «Astana-Báıterek» monýmentinen bastap, «Nur Álem», Qazaqstan Respýblıkasynyń Ulttyq mýzeıi syndy ózge de nysandarǵa barady. Sonymen qatar, balalarǵa arnalǵan saýyqtyrý oryndaryn aralaıdy.
