Kollajdy jasaǵan Záýresh SMAǴUL, «EQ»
Qazir elimizdiń ónerkásip kásiporyndaryna memlekettik qoldaý arqyly eńbek ónimdiligin ulǵaıtatyn tehnologııalardy engizýge barynsha jaǵdaı qarastyrylǵan. Bul ónim óndirisiniń tıimdiligin jaqsartýǵa arnalǵan shyǵyndardyń belgili bir bóligin óteý aıasynda qolǵa alyndy. Mundaı qyzmetti «QazIndustry» – Qazaqstandyq ındýstrııa jáne eksport ortalyǵy kórsetip keledi.
Kaizen-niń negizgi ıdeıasy – kásipti tıimdi basqarý, ıaǵnı shyǵynǵa ákeletin úderisterdi aldyn alý, sonymen qatar ár qyzmetkerdiń jumysyn jeńildetip, tutynýshyǵa baǵdarlanǵan qyzmetti jolǵa qoıý. Oǵan basshylardan bastap tehnıkalyq personalǵa deıin qatysýy mańyzdy.
«Zaýyt jylyna 30 mln keramıkalyq kirpishtiń 3 túrin shyǵaryp keledi. 2018 jyly kásiporynda jańǵyrtý jumystary júrgizilgenimen, keıbir ýchaskelerde fýnksıonaldy qyzmetke baılanysty belgili bir qıyndyqtarǵa tap boldyq. Sondyqtan qajetsiz shyǵyndardy aldyn alyp, tártipti retteý qajet boldy», dedi «Astana Ceramic» JShS joba jetekshisi, eńbek qaýipsizdigi jáne eńbekti qorǵaý jónindegi ınjener Serik Qojahanov.
Sol sebepti zaýyt basshylyǵy joǵaryda aıtalǵan kúnshyǵys eliniń iskerlik fılosofııasyn engizýdi quptaǵan. Osy maqsatta 2022 jyly Japonııadan bilimin jetildirip kelgen arnaıy sarapshy shaqyrtylypty. Kásiporynda eki apta boıy joǵary jáne orta býyndaǵy personalǵa arnalǵan oqytý semınarlary ótkizilip, nátıjesinde ózekti ýchaskelerde birqatar jańashyldyq engizilgen.
Sondaı-aq orta jáne joǵary býyndaǵy basshylarǵa Kaizen boıynsha jumystaryn júıeleý úshin tehnıkalyq keńes quryldy. Al sehtarda 5S jumys keńistigin uıymdastyryp, ońtaılandyrý júıesi engizildi. Oǵan 5 qadam kiredi: suryptaý, tártip pen tazalyqty saqtaý, standarttaý jáne jetildirý.
Bul arqyly «QazIndustry» «Astana Ceramic-tiń» atalǵan júıeni óndiriske engizýge baılanysty shyǵyndarynyń 30%-yn ótep berdi. Osy oraıda japondyq júıe engizilgennen keıin kásiporynda ónim óndirisi 15%-ǵa artyp, elektr energııasy 10%-ǵa jáne shıkizat pen komponentterdi únemdeý 5%-ǵa jetken. Sonymen qatar maman tapshylyǵy 10%-ǵa azaıyp, qosalqy bólshekterdiń shyǵyny 15%-ǵa tómendepti. Qolǵa alynǵan amal arqyly zaýyt tolyq óndiris qýatyna shyqty.
«Astana Ceramic» JShS 2007 jyly Aqmola oblysyndaǵy «Boshan» kirpish zaýytynyń negizinde qurylǵanyn aıta ketken oryndy. Munda kirpish óndirisine qajetti shıkizat Úshkól ken ornynyń mańynan jetkizilip otyrady. Shyǵarylǵan ónimder qurylys salasynda keń qoldanylyp keledi. Kásiporyn Aqmola oblysynda iri kólemdegi keramıkalyq bloktar óndirýmen aınalysatyn jalǵyz zaýyt sanalady. Qazir óndiris ornynda 70 adam jumyspen qamtylǵan. Aldaǵy ýaqytta zaýyt ınfraqurylymdy damytý arqyly áleýmettik jobalarǵa da qatysýdy josparlap otyr.
