Jangeldın aýdanyndaǵy «Almas» sharýa qojalyǵynyń basshysy Qaırat Raıysovtyń aıtýynsha, kıikter qojalyqqa qarasty alqapqa jazdaı damyl bermegen.
– Bıyl jaǵdaıymyz asa aýyr bolyp tur. Sebebi jazdaı eginimizdi kıik jep, kıikten qorǵanyp júrgende, shegirtke qaptap kelip eginniń dymyn qaldyrmaı jep qoıdy. Biz alty sharýa qojalyǵy birigip 10 myń 500 gektar jerge egin sepkenbiz. Sonyń bári shegirtkege jem boldy. Shegirtke keshe túske taman kirgen. Búgin bir agregat kómekke keldi. Onyń óziniń shashatyn ýy joq. Ar jaǵymyzda turǵan ushaqtyń ushatyn kerosıni joq. Osylaısha, eginimiz typ-tıpyl boldy. Bul áńgime shegirtke kirgen mezetten bastap biraz jerge aıtyldy. Biraq qozǵalǵan bir jan joq. Osy kıik pen shegirtkeden qorǵanamyz dep shóp te shaba almaı otyrmyz. Shabatyn shóp te joq, kıik jep bitirdi. 200-ge tarta mal basy bar edi, qysta qyryp alyp júrermiz, túgel etke ótkizetin shyǵarmyz dep otyrmyz, deıdi ashynǵan sharýa.
Aýyl sharýashylyǵy mınıstrligine qarasty Memlekettik ınspeksııa komıteti Qostanaı oblystyq aýmaqtyq ınspeksııasynyń málimetinshe, búginge deıin óńirde 1 mln 625 myń gektar jerge zertteý jumystary júrgizilip, nátıjesinde, 445,174 myń gektar alqapty shegirtke basqany anyqtalǵan. «Onyń ishinde, 266,118 myń gektar alqaptaǵy shegirtkeniń zııankestiktiń ekonomıkalyq sheginiń joǵary ekendigi anyqtaldy. Jangeldın aýdanyndaǵy 241, 978 myń gektar alqapty ekonomıkaǵa joǵary qaýip tóndiretin úıirli shegirtke basyp qalǵan. Búginge deıin Jangeldın aýdanyndaǵy 226,043 myń gektar, Amangeldi aýdanyndaǵy 14,275 myń gektar alqapqa shegirtkege qarsy dári shashyldy. Jangeldın aýdanyndaǵy úıirli shegirtkeniń Naýyrzym aýdanyna qarasty egin alqaptaryna da kóshkeni týraly málimet tirkeldi. Alaıda úıirli shegirtke egistikke aıtarlyqtaı zııan tıgizgen joq. Qazirgi ýaqytta úıirli shegirtkeniń deni aýylsharýashylyq alqaptaryn tastap, Jangeldın aýdanyndaǵy dalalyq aımaqqa qaraı kóshti», delingen aýmaqtyq ınspeksııadan kelgen hatta.
Aýmaqtyq ınspeksııa shegirtkege qarsy is-sharalardyń kún saıyn atqarylyp jatqany týraly málimet berip otyr. Alaıda jaýyn-shashyn, kúshti jel, aptap ystyq kedergi keltirgendikten, hımııalyq óńdeý jumystaryn tıisinshe júrgizýge múmkindik bolmaı otyr.
Alqapty hımııalyq óńdeý jumystary ádette +25 gradýstan tómen temperatýrada, tańerteń nemese keshqurym mezgilde ǵana júrgiziledi eken. Oǵan jaýapty ınspeksııanyń málimetinshe, qazir Jangeldın men Naýyrzym aýdandarynda 6 jerden dári shashqysh, 2 ushaq, 5 gaz generatory shegirtkege qarsy dárileý jumystaryn atqaryp jatyr. Qajetti tehnıkalyq quraldar men hımııalyq zattar da jetkilikti kórinedi. Úıirli shegirtkeniń shekten tys taralyp ketý qaýpin joıýdyń naqty sharalary qabyldanǵan.
Alaıda «Almas» sharýa qojalyǵynyń basshysy Qaırat Raıysov: «Osy shegirtkege qarsy ý shashatyn mekeme qyzmetkerleriniń ýy joq, ýy bolsa, agregaty joq, agregaty bolsa, janarmaıy joq. Biz qaıda baryp shaǵym aıtyp, kimnen qoldaý suraıtynymyzdy bilmeı otyrmyz. Osy Jangeldın aýdanyndaǵy alqaptardy eki jyldan beri ýlap jatyr. Sodan beri búkil aýdanǵa qarasty alqapty ýlap bitetin ýaqyt boldy. Bilmeımin, bizde bir jaıbasarlyq bar. Eriksiz aýmaqtyq ınspeksııa mamandary ózderine senip tapsyrylǵan mindetti durys atqaryp jatqan joq degen kúmán týady. Olarǵa memleket tarapynan shegirtkege qarsy dári, janarmaı bólinedi. Sol janarmaı men dári tıisti maqsatqa jumsalmaı, orta jolda satylyp ketti me degen kúmánimiz bar. Meniń ózime de bir-eki ret kelip, arzan ý bar, alasyńdar ma dep usynys jasaǵan adamdar da bolǵan. Ony satyp alýǵa meniń arym jibermedi», deıdi.
Qostanaı oblysy
