Mysaly, eki ǵasyrlyq tarıhy bar Seker sulý kesenesi – solardyń biri. Ras, búginge deıin kúmbezi saqtalmasa da, qabyrǵalary áli de qasqaıyp tur.
Jergilikti ólketanýshylardyń aıtýynsha, Seker sulý 1786 jyly Oıylda dúnıege kelgen eken. Onyń rýy Sherkesh-Jaýǵashty. Ol – Baısaly degen myńǵyrǵan maly bar baıdyń qyzy. Ákesi baı bola tura óte meıirimdi jan bolǵan desedi. Malyn urlaǵandardy jazalamaı, oǵan kóńil aýdarmaýǵa tyrysypty. Baısalynyń Aqbultysh pen Aqtompysh degen eki áıeli bolǵan. Birinshi áıelinen bala bolmaǵan. Al, ekinshisinen Seker sulý týǵan. Ony ákesi erkeletip ósiripti. Qyzy úsh jasqa tolǵanda Sherkesh-Qosymnyń Aqsholaq degen baıy quda túsýge kelgen.
Onyń uly Aqseıit ol kezde bes jasta bolypty. Seker sulý 15 jasqa kelgende ony Aqseıil alyp ketýge keledi. Qyz uzatý toıy onyń qazirgi beıiti ornalasqan jerde ótedi. Toı úsh kúnge sozylǵan. Al, tórtinshi kúni Baısalynyń birinshi áıeli qorqynyshty tús kóredi. Túsinde Seker bir top adammen birge ketip bara jatyr eken. Bir qyzyǵy, olardyń bári de áldeqashan ómirden ótip ketken. Bul tús týraly sulýdyń ózi bilmegen. Sóıtip, tańerteń Oıyl ózenine barady. Sýǵa shomylǵan soń kıinip jatqanda ony jylan shaǵyp alady. О́leriniń aldynda ózi uzatylǵan jerge jerleýin surapty. Sońynan Aqseıil de «Sekerdeı sulý endi týar ma?!» degen ókinishpen qaıtys bolady.
Bul tek ańyz ǵana. Al, shyn máninde qalaı bolǵany naqty belgisiz. Biraq mahabbatta joly bolmaǵandar áli de bolsa osynda barady. Olar bul jerge sulý qaıtys bolǵan 14 tamyz kúni barýǵa tyrysady eken.
