MAEK Aqtaý qalasynyń jáne Mańǵystaý oblysynyń basqa da eldi mekenderiniń turǵyndaryn elektr jáne jylý energııasymen qamtamasyz etedi. Sondaı-aq kásiporynnyń tushylandyrý kesheni aýyz sý, ystyq jáne tehnıkalyq sý beredi.
MAEK-tiń negizgi energetıkalyq jabdyqtary ótken ǵasyrdyń 60-90-shy jyldary paıdalanýǵa berilgen, onyń tozý deńgeıi búgingi kúni 80%-dan asady. Osyǵan baılanysty Memleket basshysy kásiporyndy jańǵyrtý týraly tapsyrma bergen bolatyn. Atalǵan jumys aıasynda ákimdik rezervinen elektr stansııasynyń ábden tozǵan jabdyqtaryn, tushylandyrý qondyrǵylarynyń sorǵy jabdyqtaryn jáne t. b. aýystyrýǵa 2,6 mlrd teńge bólindi.
Kombınatty aralaý barysynda Álıhan Smaıylov Mańǵystaý oblysynyń ákimi Nurlan Noǵaev pen «MAEK» JShS bas dırektory Jasulan Súıinshálıevtiń JES-tegi qazirgi ahýal týraly, sondaı-aq bolǵan apattyń saldaryn joıý boıynsha júrgizilip jatqan jumystar týraly baıandamalaryn tyńdady. Jóndeý jumystary keste boıynsha júrgizilip jatqany atap ótildi, 7 shildede energııa blogyn tolyq jumys rejımine shyǵarý josparlanyp otyr.
Premer-mınıstr MAEK-tiń energetıkalyq jabdyqtarynyń tozýynan jabdyqtar jıi isten shyǵyp, apatty jaǵdaılarǵa ákeletinin atap ótti. 3 shildede №1 energobloktyń toqtap qalýy saldarynan Mańǵystaý jáne Atyraý oblystaryndaǵy nysandar jaryqsyz qaldy.
«Úkimet energetıkalyq jabdyqtardy jańǵyrtý úshin 4,9 mlrd teńge bólý týraly sheshim qabyldady. Bul kásiporyn jumysynyń turaqtylyǵyn arttyrady. Ákimdik barlyq ónerkásip kásiporyndarynyń jumysyn tez arada qalpyna keltirýi qajet», dedi Álıhan Smaıylov.
