«QazMunaıGaz» UK» AQ basqarma tóraǵasy Maǵzum Myrzaǵalıev jumys saparymen Pavlodar munaı-hımııa zaýytyna baryp, júrgizilip jatqan jóndeý jumystarynyń barysymen tanysty. Sondaı-aq zaýyttyń óndiristik mindetterin oryndaýy boıynsha keńes ótkizip, aldaǵy ýaqytta qolǵa alynatyn jańa jobalar jaıyn pysyqtady. Kásiporynnyń keıbir tehnologııalyq úderisteri men jabdyqtaryn jańalaý is-sharalary 19 shildede tolyq aıaqtalyp, munaı óńdeýdi qaıta jalǵastyrady. Kompanııa basshysy óndiris orny toqtap turýyna qaramastan, kólik otyny naryǵyndaǵy qazirgi jaǵdaı turaqty ekenin, áleýmettik mańyzǵa ıe munaı ónimderi boıynsha tapshylyq joqtyǵyn atap ótti. QMG zaýyttaǵy óndiristik sıkldy ýaqtyly iske qosý úshin barlyq josparlanǵan jumystyń qaýipsiz ári sapaly túrde iske asýyna aıryqsha kóńil bólip otyr. Ári zaýyt basshylyǵyna jóndeýdi merziminen buryn aıaqtaý múmkindigin qarastyrý tapsyryldy.
– Qazirgi ýaqytta qorda 525 myń tonna dızel otyny, 300 myń tonnadan astam benzın jáne 100 myń tonnadaı avıa kerosın bar. Traktor otynynyń qory – 35 táýlikke, benzın 23 táýlikke jetedi. Iаǵnı naryqty janar-jaǵarmaımen qamtamasyz etýde eshbir qıyndyq baıqalmaıdy. PMHZ-da keshendi jańartý is-sharalary birtindep qolǵa alynyp jatyr. Josparlanǵan is-sharalar tolyq atqarylsa, 2027 jylǵa qaraı úsh jylda bir ret qana jóndeýge toqtaıdy. О́ńdeýge túsetin munaıdyń sapasy, ónim sapasyna qoıylatyn talaptardyń artýy jáne qysqy dızel otynyn óndirý perspektıvasy – PMHZ úshin basym baǵyttyń biri. Bul rette jaqynda Memleket basshysyna tanystyrylǵan dızel otynyn gıdrotazartý qondyrǵysyn rekonstrýksııalaý jáne sýtegin óndirý qondyrǵysyn salý jobalary QMG-niń «jasyl» energetıkany damytý baǵytyndaǵy bastamalary qatarynda erekshe mańyzǵa ıe. Buıyrsa, jaqyn jyldary pavlodarlyq zaýytta arktıkalyq dızel otyny da óndirile bastaıdy. Ol úshin áýeli jańadan sýtegi qondyrǵysyn turǵyzamyz. Quny 80 mln eýro bolatyn jobamen fransııalyq tanymal kompanııa aınalysady. Onymen bir mezgilde otyndy gıdrotazartý qondyrǵysy da boı kóteredi. Bul eki joba bolashaqta jylyna 160 myń tonna arktıkalyq dızel otynyn shyǵarýǵa múmkindik beredi, – dedi Maǵzum Myrzaǵalıev.
Buǵan qosa, zaýyt aýmaǵynda aldaǵy jyldary bıtým saqtaýǵa arnalǵan jylytylatyn rezervýarlar salý oıda bar eken. Árqaısysy 5 myń tonnalyq 6 rezervýar boı kóteredi dep jobalanǵan. Bul – óńirdegi bıtým tapshylyǵyn joıýǵa baǵyttalǵan mańyzdy qadam. Bıtým arnaıy qoımada uzaqmerzimge saqtalyp, qajet kezde naryqqa bosatylady.
Munaı-hımııa zaýytynda aralyq uıymdardyń kesirinen ishki qyzmet kórsetý quny shekten tys ósip, keıbir nysandardyń zańsyz túrde ózge fırmalarǵa berilgeni týraly buǵan deıin birneshe márte másele qozǵaǵan edik. Maǵzum Maratulynyń aıtýynsha, Memleket basshysynyń tapsyrmasyna sáıkes, Úkimet buǵan basa mán berip otyr. Qazirgi kúni kásiporyndaǵy aýtsorsıng kompanııalardy zaýytqa qaıtadan kóshirý úderisi bastalyp ketken. Onyń naqty nátıjelerin aldaǵy qazan aıynda kórýimiz múmkin.
Kompanııa basshysy bıyl dızel otyny men benzın baǵasynyń qymbattaýyna oraı naryqta jaǵymdy áserler paıda bolǵanyn da atap ótti. Mysaly, ońtústik óńirlerde dızeldi tutyný birden 47 paıyzǵa quldyrasa, el boıynsha ol orta eseppen 20 paıyzǵa kemipti. Bul jaǵdaı osyǵan deıin otandyq munaı ónimderiniń kontrabandalyq jolmen kórshi memleketterge tasylyp kelgenin aıǵaqtasa kerek, deıdi M.Myrzaǵalıev. Taǵy bir mysal, byltyr osy ýaqytta tapshylyq paıda bolǵanda traktor otynynyń qory 250 myń tonnaǵa deıin azaıǵan.
Tolyqtyra keteıik, PMHZ bıylǵy jyldyń alǵashqy jartysynda shamamen 2 mln 772 myń tonna shıkizatty óńdep, 790 myń tonnadan astam benzın, 947 myń tonnadan astam dızel shyǵarǵan. Ishki naryqqa 128 306 tonna bıtým, 287 592 tonna mazýt, 157 765 tonna suıytylǵan gaz, 97 827 tonna avıa otyn bosatqan. Oblys ortalyǵynyń ekonomıkasy úshin zaýyt asa mańyzdy. Sebebi qala qazynasynyń teń jartysy kásiporyn tóleıtin salyqtan quralady.
Pavlodar oblysy
