2024 jyldyń sońyna deıin 207 jaıly mektep salynyp, paıdalanýǵa beriledi. Qazir úsh seısmıkalyq jáne eki klımattyq aımaq boıynsha 32 úlgilik JSQ ázirlenýde. SK Construction basshysynyń aıtýynsha, jobalyq-smetalyq qujattamalardy ázirleý qyrkúıektiń sońy jáne qazan aıynyń basynda aıaqtalady.
«Sarapshylar jaıly mektepterdiń jobalyq-smetalyq qujattamalary boıynsha saraptama qorytyndysyn 45 kúnniń ornyna 15 kún ishinde berýge daıyn, biraq olar sapaly ázirlengen jaǵdaıda ǵana. Bul "Jaıly mektep" ulttyq jobasyn iske asyrý qazir basymdyqqa ıe ekenin bildiredi. Sondyqtan biz tapsyrys berýshi retinde JSQ ázirleý sapasyn qatań qadaǵalaımyz», dedi Aımanbetov.
Ol jobalyq-smetalyq qujattamany ázirleýge ádette 9 aıǵa deıin ýaqyt ketetinin atap ótti. Alaıda, Ulttyq jobada bul úderis ERS-kelisimshart esebinen jedeldetiledi, óıtkeni barlyq úderister bir ýaqytta júredi, bul ýaqytty únemdeýge múmkindik beredi.
Sondaı-aq mektepter paıdalanýǵa berilgennen keıin keshendi saraptamanyń oń qorytyndysyn alǵan jaıly mektepterdiń daıyn jobalyq-smetalyq qujattamalary qurylys komıtetiniń bankine kiredi. Bolashaqta qajet bolǵan jaǵdaıda osy mektepterdiń daıyn jobalaryn alýǵa bolady.
Tikeleı efır barysynda Aımanbetov mektepterdiń sany nege qysqarǵanyn túsindirdi. Bastapqyda ulttyq joba aıasynda 401 bilim berý nysanynyń qurylysy josparlanǵan edi. Ońtaılandyrý júrgizilgennen keıin olardyń sany 369-ǵa deıin qysqardy. SK Construction basshysynyń aıtýynsha, mektepterdiń sanyn Oqý-aǵartý mınıstrligi bekitedi.
«Buǵan deıin óńirlerde egjeı-tegjeıli tekserý júrgizilip, keıbir ákimdikter ótinim berý kezinde mektepterdiń sanyn qajettilikten asyra kórsetkeni belgili boldy. Mysaly, aýylda bir mektep bar, onyń ózinde oqýshy sany az. Buǵan qaramastan jergilikti atqarýshy organdar «Jaıly mektep» jobasy boıynsha taǵy bireýin salýǵa ótinim bergen. Osy jáne ózge de jaǵdaılardyń bárin eskere otyryp, mektepterdiń jalpy sany azaıdy», dedi ol.
Basqarma tóraǵasy qurylysty keshiktirgen merdigerler qandaı jaýapkershilikke tartylatynyn aıtty. Eger merdiger JSQ ázirleý nemese qurylys jumystaryn oryndaý merzimin kem degende eki ret 7 kúnnen artyq ýaqytqa keshiktirse, kelisimshart birjaqty tártippen buzylady. Al mekteptiń qurylysy konkýrsta ekinshi oryn alǵan kompanııaǵa beriledi. Ol talaptarǵa saı kelmegen jaǵdaıda, jańa merdiger bir kózden satyp alý arqyly anyqtalady. Barlyq jaıly mektepterdi ýaqytyly salyp, tapsyrý úshin osyndaı qatań sharalar qabyldanyp jatyr.
«Onyń ústine, eger merdiger shart talaptaryn oryndamaı, jumysty ýaqytyly atqarmasa, bizde banktik kepildik bar. Iаǵnı, merdiger josyqsyz bolǵannyń ózinde, bıýdjet aqshasy dalaǵa ketpeıdi», dep sendirdi Máýlen Aımanbetov.
«Jaıly mektep» ulttyq jobasyna 2,3 trln teńge bólindi. Onyń ishinde 461 mlrd teńge Ulttyq qordan, al 1,8 trln teńge respýblıkalyq bıýdjetten beriledi.
Búgingi tańda 116 jaıly mektep boıynsha konkýrstyq rásimderdiń qorytyndysy shyǵarylyp, merdigerlermen sharttar jasaldy. Olar aldyn-ala tólem alyp, qurylysqa daıyndyq jumystaryn bastady. Qalǵan nysandar boıynsha baıqaý qorytyndysy men shart jasasý 2023 jyldyń 10 tamyzyna deıin josparlanǵan.
Ulttyq jobany iske asyrýdyń ekinshi kezeńinde 2025 jyldyń sońyna deıin 152 mektep salý josparlanǵan. Qazir bastapqy derekterdi jınaý jáne ýchaskelerdi rásimdeý jumystary júrgizilip jatyr.
