Qonaqtar áýeli Kóksý aýdanyna qarasty Jarlyózek aýylyndaǵy «Balpyq» JShS aýylsharýashylyq qurylymymen tanysty. 1998 jyly qurylǵan seriktestik búginde bıdaı, júgeri, qyzylsha, kópjyldyq shóp ósirýmen aınalysady, jeke mal sharýashylyǵy bar. JShS basshysy Aıdyn Ádetbekovtiń aıtýynsha, kásiporynda Jarlyózek aýylynyń 70 turǵyny turaqty jumys isteıdi, biraq qosymsha maýsymdyq jumys oryndary da bar. Kóktem men kúzde aýyl sharýashylyq qurylymynda 140 adamǵa deıin jumys isteıdi. Eńbekkerler bir jumys kúnine 7,5 myń teńge esebi boıynsha jalaqy alady, al aıyna ortasha jalaqysy 140 myń teńgeni quraıdy.
Jumyskerlerdiń ózderi jumys berýshimen qarym-qatynasyna kóńili tolatynyn, biraq olardy áleýmettik áriptestik aıasynda nyǵaıtý maqsatynda kásipodaq qurýdy uıǵaryp, jumys berýshi bul sheshimdi qoldaǵanyn aıtady.
«Biz aldymyzǵa oblys qajettilikteriniń basym bóligin ekologııalyq taza organıkalyq aýyl sharýashylyǵy ónimderimen qamtamasyz etý jáne oblystyń aýyl sharýashylyǵyn damytý mindetin qoıdyq. Ujymmen qarym-qatynasta esh qıyndyq joq, degenmen jumyskerlerdiń kásipodaq qurý týraly sheshimin qoldaımyn», dedi A.Ádetbekov.
Eńbek ujymymen tildesken QRKF tóraǵasy Satybaldy Dáýletalın «Balpyq» JShS jumyskerleriniń bastaýysh kásipodaq uıymyn qurý bastamasyn qoldady.
«Kásipodaq – bul adamdardyń eńbek quqyqtaryn qorǵaý maqsatyndaǵy ózin-ózi uıymdastyrýy. Jumys berýshi men kásipodaq áriptester bolyp sanalady jáne búkil kásiporynnyń tabysty bolýy olardyń syndarly ózara árekettestigine baılanysty. Aýyldaǵy eńbek qatynastaryn birlesip damytý qajet. Eńbek etý quqyǵy – árbir azamattyń konstıtýsııalyq quqyǵy. Kásipodaq qurý arqyly siz áleýmettik áriptestikti odan ári damytý úshin ǵana emes, sonymen qatar ózińizdiń eńbek etý quqyǵyńyz úshin, óz ujymyńyzdyń, tutastaı alǵanda búkil kásiporynnyń bolashaǵy úshin jaýapkershilikti alasyz. О́ıtkeni Ádiletti Qazaqstannyń qurylysy onyń árbir azamatynyń jaýapkershiligine baılanysty», dedi S.Dáýletalın.
«Balpyq» JShS basshysy aýyl sharýashylyǵy salasyn odan ári damytýdy tilge tıek etip, jalpy oblys boıynsha aýylda jumyskerler tapshy ekenin qynjyla aıtty. Aýyldyq kásipker mehanızatorlar, kombaınshylar, malshylar jalaqysynyń salystyrmaly túrde tómen bolýyn basty sebepterdiń biri retinde atady. Onyń aıtýynsha, keıbir aýyl sharýashylyǵy kásiporyndarynda tehnıkamen jumys isteıtin mamandar joq. Múmkindikti paıdalana otyryp, A.Ádetbekov QRKF tóraǵasyna aýyl sharýashylyǵy kásiporyndaryn sýbsıdııalaý baǵdarlamasyn qaıta qaraýǵa járdemdesýdi ótinip, memlekettik kómek kórsetý baǵdarlamasyna aýyl eńbekkerleriniń eńbekaqysy qorynyń shyǵyndaryn qosýdy usyndy.
Odan keıin Kásipodaq tóraǵasy Taldyqorǵan qalasyndaǵy Sáken Seıfýllın atyndaǵy oblystyq kitaphanada boldy. S.Dáýletalınmen oblys ortalyǵynda ótken kezdesýge oblys aýdandarynan kitaphanashylar, bastaýysh kásipodaq uıymdarynyń tóraǵalary, mádenıet salasyndaǵy áleýmettik áriptester keldi.
Mádenıet, aqparat jáne sport qyzmetkerleri salalyq kásipodaǵynyń oblystyq fılıalynyń jetekshisi Sáýle Ahmadıevanyń aıtýynsha, Jetisý óńirinde 147 kitaphana bar, onda 399 adam eńbek etedi. Kitaphana qyzmetkerleriniń negizgi problemalary – jalaqynyń tómendigi, sýbsıdııalanǵan turǵyn úı baǵdarlamasynyń joqtyǵy, bilikti kadrlardyń jetispeýshiligi, kásibı attestattaý máseleleri.
«Kitaphana qyzmetkerlerin attestattaý úsh jyl saıyn ótkiziledi. Onyń ústine 20-25 jyl eńbek ótili bar kitaphanashylar jas mamandarmen teń dárejede attestasııadan ótedi. Attestattaý synaqtarynyń mazmunynyń ózi kúmándi, kóbinese kásibı qyzmetke múldem qatysy joq suraqtar týyndaıdy. 20 jyl jáne odan da kóp eńbek ótili bar kitaphanashylardy attestattaýdan bosatýdy kópten surap kelemiz», dedi kitaphanashy Ǵalııa Eshenova.
Onyń áriptesi Ásem Ishambaeva kitaphanashylarǵa medısınalyq kómek kórsetý máselesine toqtaldy. Onyń aıtýynsha, kitaphanashylar jyl saıyn óz qarajaty esebinen mindetti medısınalyq tekserýden ótýi kerek, bul qaltaǵa aıtarlyqtaı zııan tıgizedi. Al salada ortasha jalaqy 120-140 myń teńgeni quraıdy.
«Qazirgi zamanǵy kitaphanalardyń jumysyn baǵdarlamashylarsyz elestetý múmkin emes, olardyń jalaqysy 80 myń teńgege áreń jetedi. Sondyqtan kitaphanalarda kómekshi kadrlardyń aýysýy jıi oryn alady», deıdi oblystyq kitaphana dırektory Samal Shaıahmetova.
Salada qordalanyp qalǵan máselelerdi talqylaý barysynda S.Dáýletalın «Eńbek» depýtattyq tobynyń arqasynda kitaphanashylardy tegin medısınalyq tekserýden ótkizý máselesi qaralyp, kelesi sessııada máslıhattyń sheshimimen kitaphanashylardyń paıdasyna bekitiletinin jetkizdi.
«Biz sizderdiń salalaryńyzdaǵy qyzmetkerlerdiń jalaqysyn kóterý máselesin turaqty baqylaýda ustaımyz. Kásipodaqtar bıýdjettik sala qyzmetkerlerine bazalyq laýazymdyq jalaqy – (BLJ) negizindegi jalaqyny alyp tastaýdy talap etýde. Áleýmettik áriptestermen ózara is-qımyldyń nátıjesinde bul máselede ilgerileýshilik bar, ıaǵnı Eńbek jáne halyqty áleýmettik qorǵaý mınıstrligi men tıisti saladaǵy áleýmettik áriptester tıisti esep-qısaptardy júrgizip jatyr dep sendiredi. Kadr máselesin sheshý tikeleı jalaqy mólsherine baılanysty ekenin de túsinemiz. Bul máseleler ózara tyǵyz baılanysty jáne júıeli sheshimdi talap etedi, biz úkimetke tıisti zańnamany jetildirý boıynsha usynystar paketin engizdik», dedi QRKF basshysy.
Salada áleýmettik áriptestikti damytýdaǵy kásipodaqtardyń rólin Jetisý oblystyq Mádenıet basqarmasy monıtorıng bóliminiń basshysy Janar Talhanova atap ótti.
«Mádenıet jáne óner qyzmetkerleriniń máselelerin sheshý úshin oblystyń kásipodaq ortalyǵymen birlese otyryp kópten beri jumys istep kelemiz. Osydan tórt jyl buryn kásipodaq uıymdary men máslıhattyń qoldaýynyń arqasynda muraǵat qyzmetkerlerine ótemaqy tóleý máselesi sheshildi. Qazirgi tańda basqarma bastaýysh kásipodaq uıymdarynyń usynysy boıynsha kitaphana qyzmetkerlerin qyzmettik baspanamen qamtamasyz etý máselesin qarastyrýǵa daıyn», dedi oblystyq Mádenıet basqarmasynyń ókili.
Jıyn sońynda S.Dáýletalın sala kásiporyndary men uıymdary qyzmetkerleriniń múddelerin qorǵaý boıynsha sóz qaýzap, qoǵamdaǵy Eńbek adamy mártebesin anyqtaý boıynsha kásipodaqtardyń ustanymymen bólisti.
Jetisý oblysy
