Sondaı-aq talantty tulǵanyń «Beket», «Aqan seri – Aqtoqty» operasy, «Ǵasyrlar úni» oratorııasy, «Daýyl» sımfonııasy jáne taǵy basqa da órnegi ózgeshe órilgen týyndylary ulttyq mýzykanyń mereıin asyrdy. «Aldar kóse», «Botakóz», «Rábıǵa», «Sáýle» atty qoıylymdar men «Ana men bala», «Biz Jetisýdanbyz», «Partızan qyzy» kınofılmderine jazǵan mýzykasy da shynaıylyǵymen, mazmundylyǵymen kórermen kóńilinen shyqty.
Ásirese onyń 1952 jyly jazǵan «Qýanysh Otany» atty sımfonııalyq poemasy jastar men stýdentterdiń Býharestte ótken Dúnıejúzilik festıvalinde oryndalyp, kompozıtor esimi elimizge ǵana emes, shet memleketterge de tanyldy.
Jalpy, mýzykatanýshylar Muhamedjanov shyǵarmashylyǵyna vokaldy janr jaqyn ekenin aıtady. Máselen, 1958 jyly Máskeýde ótken Qazaq óneriniń onkúndiginde aıtýly kompozıtordyń orkestrge arnalǵan konserti onyń áýendik stıliniń ár qyryn erekshe kórsetip, tyńdarmandaryn tánti etti.
Kompozıtordyń 1964 jyly jazǵan «Aısulý» atty komedııalyq operasy sol kezde týǵan qazaq mýzykasynyń shoqtyǵy bıik shyǵarmasy ataldy. Bul týyndynyń sahnalanýy ulttyq opera ónerindegi mańyzdy oqıǵa sanaldy. Sydyq Muhamedjanov «Aısulý» operasyn talantty opera ánshisi, Qazaqstannyń halyq ártisi Aısulý Baıqadamovaǵa arnap jazǵan. Aısulýdyń ózi osy operada «Aısulý» partııasyn oryndap, jurtshylyqtyń joǵary baǵasyna ıe bolǵan.
Kórnekti kompozıtor opera arnaǵan Aısulý Baıqadamova kim? Qazir bul ánshiniń esimin eresek adamdar bolmasa, keıingi jastar bile qoımaıdy. Aty da kóp aıtylmaıdy. О́mirden ótkenine de otyz jyldan asa ýaqyt bolǵan. Alaıda talantty ánshiniń ónerdegi izi ulttyq opera tarıhynda máńgi qaldy.
Ánshiniń ósken ortasy da án men kúıge kenelgen ólke. Týǵan aǵasy Baqytjan Baıqadamov – ataqty kompozıtor. Apasy Kúnimjan Baıqadamova óz esteliginde onyń bala kúninen ónerge jaqyn bolǵanyn jazypty:
«Aısulý – Almatydaǵy qazirgi Sh.Ýálıhanov atyndaǵy №12 qazaq orta mektebiniń tabaldyryǵyn attady. Bul keńes kezeńinde qaladaǵy jalǵyz qazaq bilim uıasy boldy. Baqytjan aǵamyz joǵary oqý ornyn bitirgennen keıin qaladaǵy №38 mektepke muǵalim bolyp ornalasyp, Aısulýdy soǵan aýystyryp aldy. Aǵam osy mektepten kórkemóner úıirmesin uıymdastyrdy. Nurǵısa Tilendıev, Narıman Qarajigitov, Aısulý Baıqadamova sekildi belgili tulǵalar ónerdegi qadamyn osy úıirmeden bastady. Ol osy úıirmege qatysyp júrip, qazaq sahnasynyń bulbuly Kúlásh Baıseıitovamen tanysty. Kúlásh apa onyń daýysyna tánti bolyp, oǵan «Qyz Jibek» rólinde oınaǵanda kıgen taqııasyn syılady».
Aıtpaqshy, osy úıirme músheleri «Qyz Jibek» qoıylymyn sahnalaǵanda Jibekti – Aısulý, Bekejandy – Nurǵısa Tilendıev oınaǵan eken.
Daryndy ánshi Máskeý konservatorııasynda bilim alǵannan keıin Qazaq opera jáne balet teatryna ornalasyp, onyń úlken sahnasynda óner jolyn bastady. Áp degennen kózge túsip, juldyzy jandy. Kúrdeli partııalardy oryndady. Elge talantymen tanyldy.
Jalpy, názik jandy ánshilerdiń eń joǵary daýysy vokal tilinde soprano dep atalady. Qazaq ánshileri arasynda Kúlásh Baıseıitova men Aısulý Baıqadamovanyń daýystary tembrlik boıaý sazyna qaraı sırek kezdesetin lırıkalyq sopranoǵa jatady.
Qazaqstannyń eńbek sińirgen ártisi Keńes Baqtaev onyń daýysy sondaı taza, ashyq, dıapazony keń bolǵanyn aıtady.
«Aısulý apaımen «Qyz Jibek» operasynda sahnaǵa birge shyqtym. Ol Jibekti, Narıman Qarajigitov – Tólegendi, men – Shegeni beıneledim. Daýysy óte keremet. Qulaǵymnan áli kúnge deıin ketpeıdi. Bıik notalardy da erkin alady. Ol kisi teatrda Kúlásh Baıseıitovadan keıingi ánshi boldy», dep eske alypty.
Aısulý Baıqadamova – opera jáne balet teatry sahnasynda jany názik lırıkaǵa beıim keıipkerlerdiń qaıtalanbas obrazdaryn somdady. Ol oryndaǵan E.Brýsılovskııdiń «Qyz Jibegindegi» – Jibek, A.Jubanov pen L.Hamıdıdiń «Abaıyndaǵy» – Ajar, M.Tólebaevtyń «Birjan-Sarasyndaǵy» – Sara, E.Rahmadıevtiń «Qamar sulýyndaǵy» – Qamar, N.Rımskıı Korsakovtyń «Patsha qalyńdyǵyndaǵy» – Marfa, K.Delıbtiń «Lakmesindegi» – Lakme, M.Glınkanyń «Rýslan men Lıýdmılasyndaǵy» – Lıýdmıla, Dj.Pýchchınıdiń «Chıo-Chıo-Canyndaǵy» – Chıo-Chıo-San partııalary ulttyq opera óneriniń injý-marjanyna aınaldy.
