Elordadaǵy Travmatologııa jáne ortopedııa ulttyq ǵylymı-zertteý ortalyǵynyń baspasóz qyzmeti zardap shekken eki áıeldiń qazirgi jaǵdaıy týraly aqparat berdi.
«Naýqastardyń jaǵdaıy aýyr. Resmı jaýap eki kún ishinde berilýi múmkin, óıtkeni bir naýqas áli de jansaqtaý bóliminde jatyr», dep jaýap berdi baspasóz qyzmeti.
Aıta keteıik, keshe, 16 shilde kúni «ALJIR» mýzeıinde lıft qulap, eki áıel jaraqat aldy. Aqmola oblysynyń polısııa departamenti usynǵan aqparatqa qaraǵanda, 1940 jylǵy elorda turǵyny men 1969 jylǵy Aqmol aýyly turǵynynyń túrli dene múshesi synǵan. Belgili bolǵandaı, olar «ALJIR» mýzeıin aralap júrip, kenetten lıft qulaǵan kezde aýyr jaraqat alǵan.
«Selınograd aýdany Aqmol aýyly «ALJIR» mýzeıinde lıfttiń qulaý faktisi boıynsha QR QK 306-baby 2-bólimi 2-tarmaǵy «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý» boıynsha sotqa deıingi tergeý jumystary bastaldy», dep habarlady Aqmola oblystyq PD baspasóz qyzmeti.
