Saltanatty is-shara Beıbitshilik jáne kelisim saraıynda ótti. Astana qalasy ákiminiń orynbasary Eset Báıkenniń tóraǵalyǵymen Din isteri basqarmasy daıyndaǵan kitaptardy tamashalaýǵa elordalyq dinı birlestikterdiń basshylary, ǵylymı-saraptamalyq qoǵamdastyq ókilderi men memlekettik organdardyń qyzmetshileri keldi.
Jıynǵa Astana qalasy máslıhatynyń tóraǵasy Erlan Qanalımov qatysyp, týyndynyń elorda turǵyndary men qonaqtaryna din týraly taptyrmas nusqaýlyq bolatynyn atap ótti.
«Din – halqymyzdyń áleýmettik jáne rýhanı ómiriniń bir bóligi. Qazaq halqynda salt-dústúri men ǵurpy dinmen ushtastyrylǵan. Salıqaly ómir súrý, durys urpaq tárbıeleý, keler urpaqqa durys tárbıe berý, qurmetteý, izet kórsetý qasıetterin qalyptastyrý din men dástúrimizdiń ereksheligi dep aıtýǵa bolady. Bul eńbek elordalyqtarǵa, qala qonaqtaryna jáne din salasynyń zertteýshilerine nusqaýlyq bolady dep oılaımyn», dedi máslıhat tóraǵasy.
Jıynǵa qatysqan qala ákiminiń orynbasary Eset Báıkenniń aıtýynsha, dinı birlestikterdiń tarıhy men kýlttik tájirıbesi týraly jazylǵan týyndy - Astananyń shırek ǵasyrdaǵy jetistigi.
«Búgingi jıyn Astananyń 25 jyldyǵymen tuspa-tus kelip otyr. Din isteri basqarmasymen aqyldasa kele, din salasyndaǵy jetistikterdi kórsetý maqsatynda ensıklopedııa jasaýdy uıǵardyq. Shırek ǵasyrda biz úshin elordada atqarylǵan sharalar jetistik dep bilemin. Úsh jylda bir ótkiziletin Álemdik jáne dástúrli dinder kóshbasshylarynyń sezi elordamyzdy álemdik jáne rýhanı dıalog ortalyǵyna aınaldyrdy. Elordadaǵy 14 dinı konfessııa men 57 dinı birlestiktiń eńbegi arqasynda 25 jylda elordadaǵy din salasy ózindik dara jolyn qalyptastyrdy. Osy jetistikterdi oqyrman nazaryna jetkizýdi jón kórdik», dedi qala ákiminiń orynbasary.
Jańa jınaq 16 taraýǵa bólingen. Ár bólimde elordadaǵy konfessııalar týraly jekelegen tolyq aqparat usynylǵan.
Sondaı-aq jınaqta dinı birlestikterdiń shyǵý tarıhy men búgingi atqaryp jatqan jumysy týraly jazylǵan, túrli dinı oryndardyń, sáýletti ǵımarattardyń fotolary da engen.
