Internet tarıfi de qymbattaıdy

Ookla derekterine sáıkes Qazaq­standa 4G qoljetimdiligi 84,5 paıyzdy quraıdy. Al 5G endi engizilip jatyr. Biraq elimizde ınternet sapasyna qa­tysty shaǵym kóp. Memleket basshysy Qasym-Jomart Toqaev ta jaýapty mınıstr­ge kóptiń kókeıinde júrgen «ınter­net qashan jóndi jumys isteıdi» degen suraqty qoıǵan bolatyn. Baǵdat Mý­sın buǵan tarıf arzan bolǵandyqtan, ınter­net jyldamdyǵy aqyryn degen jaýap aıtty.

– Arzan baılanys operatorlar úshin tıimdi emes ekenin túsiný mańyzdy. Bul bıznes, sondyqtan bıznesti damytý, ıaǵnı jelini qurý jáne sapany jaqsartý úshin ınvestısııa qajet. Kirispen birge ınvestısııalar keledi. Eger tabys tómen bolsa damý úshin ınvestısııa quıylmaıdy, tıisinshe sapa da bolmaıdy. Áleýmettik jelilerdiń damýyna baılanysty, elde tra­fıkti tutyný birneshe ese ósti. Bul neni bildiredi? Bul operatorlar jeli­sindegi júkteme de artty degen sóz. Biraq shyǵyndar tutynylatyn trafıktiń kólemine sáıkes tepe-teń túrde ósken joq. Qazaqstan-mobıldi trafıkti tutyný bo­ıynsha jetekshi elderdiń biri jáne mobıldi jelini qoldaný jaǵynan da aldyńǵy qatarda, dedi Sıfrlyq damý mınıstri.

Osydan soń otandyq uıaly baılanys operatorlary birden tarıf qunyn kóterýdi qolǵa alǵan. «Qazaqtelekom» AQ 2023 jylǵy 1 tamyzdan bastap muraǵattyq tarıfter jelisiniń keıbiri qym­battaıtynyn habarlady. Beeline kompanııasy 15 tamyzdan bastap «Jarqyn 4990» jáne «Jarqyn 5990» tarıfterinde YouTube, Instagram, Facebook, TikTok, WhatsApp jáne basqa da tanymal áleýmettik jeliler men messendjerlerge sheksiz kirý múm­kindigin alyp tastaıdy jáne «Jarqyn 3990» tarıfinde osy resýrstarǵa berilip kelgen 25 GB paketi de toqtatylady. Sondaı-aq kúndelikti paket qunyn 290 teńgege ósirýdi josparlap otyr. Activ.kz uıaly baılanys operatory da 2023 jyl­ǵy 8 tamyzda «Shynaıy sheksiz mu­ra­ǵattyq», «Sýper Komfort mura­ǵattyq», «Suhbat muraǵattyq» ta­rıf­teri boıynsha tólem shartyn óz­gertedi. Al Tele2 22 tamyzdan bas­tap «Start», «JEŃIL Start», «Bárin aýystyr 1990 tg 0419 mu­ra­ǵattyq», «Bárin aýystyr 1990 tg_0619», «JEŃIL Start mura­ǵat­tyq», «Sýper+», «JEŃIL Start mura­ǵattyq 2», «Qosyl», «Bá­rin aýystyr 2490 tg 0419 mura­ǵat­tyq», «Bárin aýystyr 2590», «BÁRI Sýper muraǵattyq», «Ke­regi osy», «Kúshti», «BÁRI Sýper», «Tolyǵymen qosyl 0518», «Toly­ǵymen qosyl», «Bá­rin aýystyr 2590 tg_0619», «Úl­ken muraǵat­tyq 2», «Bárin aýys­tyr 3190_new», «Maksımaldy qosylý», «Bárin ­aýystyr 3290 tg 0419 mura­ǵattyq», «Bárin aýys­tyr 3290 tg_0619», «NAǴYZ Ekstra», «Úl­ken», «NAǴYZ Eks­tra muraǵat­tyq», «Kúshti+», «Bárin aýystyr 3190», «Bárin aýystyr 3690», «Bárin aýystyr 3790», «Sengisiz sheksizdik», «Bárin aýystyr 4190» tarıfteri baǵasyn kóteredi.

– Birqatar faktorǵa, so­nyń ishinde ekonomıkalyq jaǵdaı­ǵa baılanysty biz tarıftik jos­par­­lardyń baǵasyna kishigirim ózge­ris engizý týraly sheshim qa­byl­daýǵa májbúrmiz. Bul sizdiń qara­­jatyńyzǵa áser etýi múmkin eke­nin túsinemiz, sondyqtan biz qo­symsha resýrstar men qyzmetter túrinde ótemaqy usynamyz. Bul ózgerister ınfraqurylymǵa negiz­delgen shyǵyndardyń ósýimen, jańa tehnologııalardyń iske qosy­lýymen, álemdik logıstıkalyq tiz­bekterdiń quldyraýy, ınflıasııa, elektr energııasynyń qymbattaýy, jańa tehnologııany engizý úshin jo­ǵary jıilik quny jáne kompanııamyz úshin syn-qaterler týdyrǵan basqa da jaǵdaılarmen baılanysty. Sondyqtan biz qyzmetterdiń tu­raqtylyǵyn qamtamasyz etý jáne sizge odan da ozyq tehnologııalar men qyzmetterdi usyný úshin ta­rıfterimizdiń baǵalaryn qaı­ta qaraýdy uıǵardyq», delingen Tele2 habarlamasynda.

Uıaly baılanys operatorlary tutynýshylarǵa sapaly qyzmet kórsetý maqsatynda ba­ǵanyń ósip jatqanyn atap ótti. Biraq Sıfrlyq damý, ınnovasııa­lar jáne aeroǵarysh ónerkásibi mınıstri Baǵdat Mýsın qa­zir­diń ózin de 4G syıymdylyǵyna qatysty másele bar – stansalar jetkiliksiz degen. Al ol stansalardy operatorlar salýy kerek. Soǵan qaraǵanda 5G-diń aýyly tipti alys. Baǵanyń birden óskeni sekildi ınternet jyldamdyǵy da jaqyn arada jaqsarsa ǵoı...