Shahmat • 26 Shilde, 2023

Oqýshylardyń álem chempıonaty

223 ret

kórsetildi

2 mın

oqý úshin

3-8 tamyz kúnderi Aqtaýda mektep oqýshylary arasynda shahmat tarıhynda alǵash ret «World Schools Team Championship» jarysy ótedi. Qart Kaspııdiń jaǵalaýynda uıymdastyrylatyn álem birinshiliginiń basty ereksheligi, jahandyq dodaǵa shahmat úıirmeleri men seksııalarynyń tárbıelenýshileri emes, shahmatty unatatyn áýesqoı mektep oqýshylary ǵana qatysa alady.

Álı BITО́RE

Álem chempıonatynda sportshylar eki jas sanaty boıynsha (12 jáne 18 jasqa deıin) bas júldelerdi sarapqa salady. Aqtaýda alǵash ret jalaýy jelbireıtin dúnıejúzilik jarysqa qazirdiń ózinde álemniń 50 memleketinen 300-ge jýyq shahmatshy qatysýǵa nıet bildirgen. Olardyń arasynda Perý, Madagaskar, San-Tome, Prınsıpı sekildi elderdiń ókilderi de bar ekenin aıta ketken jón. Bul jerde tórt qurlyqtyń mektep oqýshylary óz mektebiniń jáne eliniń namysyn qorǵaý úshin baryn salady.

Bul synda el namysyn 6 qalada ornalasqan 10 mektep ókilderi qorǵaıdy. Atap aıtar bolsaq, Aqtaý qalasyndaǵy IT mektep-lıseıi men N.Marabaev atyndaǵy №7 mektep-lıseıi, Almatydaǵy M.Gandı atyndaǵy №92 mamandandyrylǵan lıseıi, Respýblıkalyq fızıka-matematıka mektebi, fızıka-matematıka baǵytyndaǵy Nazarbaev zııatkerlik mektebi, elordadaǵy №72 mektep-lıseıi men Respýblıkalyq fızıka-matematıka mektebi, Atyraý oblystyq «Bilim-ınnovasııa» lıseı-ınternaty, Pavlodar qalasyndaǵy daryndy balalarǵa arnalǵan №8 lıseı-mektebi jáne Shymkent qalasyndaǵy O.Joldasbekov atyndaǵy №9 IT lıseıi.

Aldaǵy álem birinshiligine mektep komandalarynyń tıimdi daıyndalýy úshin Qazaqstan shahmat federasııasy birinshilik qarsańynda oqýshylarǵa Býrabaıda arnaıy oqý-jattyǵý jıynyn uıymdastyrady.

Uıymdastyrýshylardyń aıtýynsha, aldaǵy týrnır oqýshylardyń shahmatqa degen qyzyǵýshylyǵyn arttyryp qana qoımaı, komandalyq rýhty kúsheıtýine múmkindik beredi. Máselen, pavlodarlyq oqýshy Vadım Derksen aıaǵynyń synǵanyna qaramastan, komandasyn qolaısyz jaǵdaıda qaldyrmaý úshin Aqtaýǵa barýǵa bel býyp otyr. Sondaı-aq Shymkent qalasyndaǵy O.Joldasbekov atyndaǵy №9 IT lıseı oqýshysy Nurıslam Aınaqul men Meksıkadan keletin Rıkardo Gael Brıto De La óz týǵan kúnderin úılerinen jyraqta, chempıonat barysynda ótkizýge daıyn ekendikterin aıtqan.

Elimizde tuńǵysh ret ótkeli otyrǵan oqýshylar arasyndaǵy oılylar oıyny Halyqaralyq jáne Qazaqstan shahmat federasııalarynyń muryndyq bolýymen, Mańǵystaý oblysy ákimdiginiń qoldaýymen uıymdastyrylmaq. Al jarystyń bas seriktesi jáne basty demeýshisi – «Freedom Holding Corp».