Eýrokýbok oıyndarynda «Astana» men «Dınamo» komandalarynyń joly jasyl alańda osymen ekinshi ret túıisip otyr. Alǵash ret eki ujym osydan bes jyl buryn, ıaǵnı 2018 jyly Chempıondar lıgasynyń úshinshi kezeńinde kezdesip, eki retinde de horvatııalyq fýtbolshylar myqtylyq tanytqan edi – 3:0 (1:0, 2:0). Sol kezdegi «Dınamonyń» quramyn qazirgimen salystyrǵanda áldeqaıda myqty bolsa da, Zagreb klýby jerlesterimizdiń qaqpasyna nebári úsh-aq gol soǵýǵa shamalary jetken-di. Qazir de «Dınamo» fýtbolshylarynyń deńgeıi nasharlap ketti dep aıta almaımyz, biraq bes jyl burynǵy zagrebtikter emes ekeni anyq. Soǵan qaramastan, «Dınamonyń» jas fýtbolshylary keshegi oıynda «Astana» qaqpasyna tórt gol saldy. Alda áli qarymta oıyn bar ekenin umytpaıyq.
Otandyq fýtbol jankúıerleriniń pikiri boıynsha, keshegi oıynda «Astananyń» jeńilisine birden-bir sebepker – bas bapker Grıgorıı Babaıan. О́ıtkeni matchtan bir kún burynǵy baspasóz máslıhatyna qatysqan bas jattyqtyrýshy bul kezdesýde dınamolyqtardyń aıqyn favorıt ekenin aıtyp, olarǵa eki oıynda da qarsylyq kórsetý múmkin emes ekenin ashyq moıyndaǵan-dy. Tipti komandanyń kóshbasshysy sanalǵan horvatııalyq Marın Tomasov ta Chempıondar lıgasynyń ekinshi kezeńine deıin jetý «Astana» úshin úlken mártebe ekenin aıtyp, tómengi lıgalardyń birinde oınaýdy maqsat tutyp otyrǵandaryn málimdegen-di.
«Biz Tbılısıdiń «Dınamosyn» jeńgennen keıin Chempıondar lıgasyndaǵy óz mindetimizdi oryndadyq. О́ıtkeni Chempıondar lıgasynyń toptyq kezeńine shyǵatyndaı múmkindigimiz joq. Sondyqtan Eýropa lıgasynyń nemese Konferensııa lıgasynyń toptyq kezeńiniń birinde oınaǵymyz keledi», degen bolatyn M.Tomasov sheteldik basylymǵa bergen suhbatynda.
Bas bapkerdiń de, komanda negizgi oıynshysynyń da «Dınamomen» ótetin oıyn aldyndaǵy osyndaı keritartpa pikirinen keıin jankúıerlerdiń «Astanadan» bul oıynda jeńis kútýiniń ózi de ábestik bolar edi. Match bastalmaı jatyp «jeńilgen» elordalyqtar, báseke kezinde de túk isteı almady.
Matchty bes qorǵaýshy, tórt jartylaı qorǵaýshy jáne bir ǵana shabýylshymen bastaǵan «Astana» fýtbolshylary alań ıeleriniń qarqynyna tek 35 mınýt qana shydap berdi. Jarty saǵat boıy Iosıp Chondrıch qaqpasynyń mańaıynda birneshe márte qaýipti shabýyl uıymdastyrǵan «Dınamo» fýtbolshylary 36-mınýtta óz degenderine jetti. Brýno Petkovıchtiń aıyp alańynyń syrtynan tepken doby jerlesterimizdiń birine tıip, qaqpa torynda týlady. Arada bes mınýt ótkende Lýka Ivanýshes «Astana» qaqpasyna óz komandasynyń ekinshi dobyn engizip, úzilis aldynda «Dınamoǵa» aıqyn basymdyq syılady. Jergilikti jankúıerler Ivanýshes golyna shattanyp bolamyn degenshe dál sol fýtbolshy «Astana» qaqpasyna dýbl jasap, esepti 3:0-ge jetkizdi. «Astana» fýtbolshylary alǵashqy taımda qarsylas qaqpasyna qaraı bir ret bolsyn dál soqqy jasaı almaı pushaıman boldy.
Ekinshi taımdy da «Dınamo» oıynshylary belsendi bastady. 56-mınýtta 24 jastaǵy shabýylshy Ivanýshes alystan dál soqqy jasap, kezdesýdegi úshinshi golyn toılady. Tórtinshi gol qaqpaǵa engen soń «Astananyń» bas bapkeri alańǵa Dýshan Iovanchıch pen Elhan Astanovty shyǵardy. Osy fýtbolshy matchqa aralasqannan keıin «Astananyń» oıyny jandanyp shyǵa keldi. Nátıjesinde, 69-mınýtta buryshtamadan keıin Dýshan Iovanchıch qaqpaǵa jata-jastana joıqyn soqqy jasady. Biraq dop qaqpadan qıys ketti. Bul – «Astananyń» 90 mınýt ishinde jasaǵan tórt soqqynyń ishindegi eń qaýiptisi edi. Sóıtip, «Astana» men «Dınamo» arasyndaǵy alǵashqy match 4:0 esebimen aıaqtaldy.
Endi qarymta kezdesý bir aptadan soń, ıaǵnı 2 tamyz kúni «Astana Arenada» ótedi. Al búgin «Ordabasy» men «Aqtóbe» komandalary Konferensııa lıgasyndaǵy alǵashqy oıyndaryn ótkizedi. Shymkenttik ujym óz alańynda Polshanyń «Legııa» klýbyn qabyldasa, «Aqtóbe» syrt alańda Grýzııanyń «Torpedo Kýtaısı» komandasymen kezdesedi. Sonymen qatar birinshi kezeńnen sátti ótip, ekinshi kezeńge shyqqan «Tobyl» Shveısarııada «Bazelmen» jasyl alańda jolyǵady.
