Horezm, Buhara, Naýaı, Jyzaq, Syrdarııa jáne Tashkent oblysynan kelgen mádenı ortalyq basshylary men ult zııalylary mańyzdy is-sharada ózara pikir almasyp, óz oılaryn ortaǵa saldy.
Kezdesýde «Otandastar qorynyń» shettegi jáne eldegi atqarǵan jumystary men josparlary týraly áńgimelegen qoǵam prezıdenti Abzal Saparbekuly Memleket basshysy Qasym-Jomart Toqaevtyń Túrkistanda ótken ulttyq quryltaıdaǵy «Sheteldegi qandastarymyzben tyǵyz qarym-qatynas ornatyp, rýhanı baılanysty nyǵaıta beremiz. Bul másele – meniń jeke nazarymda» degen sózin eske salyp, qandas jastarǵa, elge kóship keletin qandastarǵa arnalǵan memlekettik qoldaýǵa keńinen toqtaldy.
О́z kezeginde qandastarymyz qazaq mektepterindegi muǵalimderdiń biliktiligin arttyrý, jastardyń qazaqstandyq JOO-ǵa túsý úshin UBT tapsyrýdaǵy qıyndyqtary, qazaq tilinde kitaptar men mádenı is-sharalarǵa degen suranystar týraly oılarymen bólisip, usynystaryn jetkizdi.
Jıyn sońynda Qazaqstan Respýblıkasynyń Prezıdenti Qasym-Jomart Kemeluly Toqaevtyń alǵys hattarymen «Nurly jol» gazetiniń redaktory Ǵulamzákir Iýsýpov pen «Kenımeh tańy», «Tamdy sharýageri» gazetiniń shyǵarýshy redaktory Gúldana Narynbetova marapattaldy.
Sondaı-aq birqatar qazaq ortalyqtaryna ulttyq bı kóılek toptamalary men Otandastar qorynyń «Ár qazaqqa bir kitap» aksııasy sheńberinde jınalǵan kitaptar tartý etildi.
