Atalmysh saǵatty daryndy balalarǵa arnalǵan oblystyq mamandandyrylǵan lıseıdiń 9-synyp oqýshysy Dýlat Isabek pen 8-synyp oqýshysy Ádııa Tursynbaı oılap tapqan.
Saǵatqa dene temperatýrasyn, qandaǵy ottegi paıyzyn, júrek qaǵysyn baqylap turý fýnksııalary engizilgen eken. Sondaı-aq naýqas qulap qozǵalyssyz qalǵan jaǵdaıda týysyna nemese jedel járdemge dabyl jibere alady. Eń bastysy, naýqastyń meken-jaıyn, jatqan jerin naqty kórsetip turady.
Naýqastarǵa keıde túrli sebeptermen alǵashqy kómek ýaqytynan keshteý beriletin kezder bolatyny málim. Atalǵandaı jaǵdaılardyń aldyn alý úshin jáne naýqastarǵa kómek qylaıyq degen oımen jas ónertapqyshtar alǵashqy kómektiń jedel kelýin qamtamasyz etetin saǵatty jasap shyǵarǵan.
Eki oqýshynyń ónertabysyn synap kórý úshin kardıolog pen pasıentterdiń portatıvti apparatpen dınamıkalyq baqylaýy júrgizilgen. D.Isabek pen A.Tursynbaı endi «aqyldy saǵatty» adamdar árdaıym taǵyp júrýine yńǵaıly qylyp jasaýdyń ádisterin qarastyrýda.
