«Qazanatta» ótken alaman

Jarysty tamashalaýǵa Aqparat jáne qoǵam­dyq damý mınıstri Darhan Qydyráli, Ult­tyq sport qaýym­das­tyǵynyń prezıdenti Islam­bek Saljanov pen respýblıkalyq «Báıge» federa­sııasynyń prezıdenti Qanat Kópbaev arnaıy keldi. Alaman dodanyń ashylý saltanatynda sóz alǵan Aqparat jáne qoǵamdyq damý mınıstri Darhan Qydyráli keıingi jyldary elimizde ult­tyq sport túrleriniń tanymdylyǵy artyp kele jatqanyn tilge tıek etti.

«Biz – jelmen jarysqan, jylqy­nyń jalynda ósken jurttyń jurnaǵymyz. Sondyqtan jylqy dese, báıge dese bári­miz­diń delebemiz qozyp otyra­dy. Jylqy bizge qanat baılaıdy, at – bizdiń rýhymyz. Sol rýhqa qyz­met etip júrgen Ulttyq sport qaýym­­das­tyǵy men respýb­lıkalyq «Báıge» fede­ra­sııasynyń basshylaryna óz rı­zashy­lyǵymdy bildiremin! Qazaq­tyń rýhy árdaıym bıik bolsyn! Búgingi báıge­niń jeńimpazdaryn shyn júrek­ten qut­tyqtaımyn», dedi Darhan Qýandyquly.

Sonymen qatar saltanatty is-sha­ra­da Ulttyq sport qaýymdas­tyǵy­nyń prezıdenti Islambek Sal­janov ja­rys­tyń mańyzdylyǵyna toqtalyp ótti.

«Ulttyq sporttyń artynda ult­tyń rýhy, ult­tyń namysy, tarıhy, mádenıeti men dástúri tur. Memleket basshysy Qasym-Jomart Kemeluly Toqaevtyń tikeleı qoldaýymen keıingi jyldary elimizde ulttyq sport túrleri qarqyndy damyp keledi. Búgingi bizdiń jarysymyzdy tamashalaýǵa arnaıy kelgen Aqparat jáne qoǵamdyq damý mınıstri Darhan Qýandyqulyna alǵys aıtamyn.

Barshańyzǵa belgili, qazirgi tańda biz elimiz­diń barlyq óńirlerinde báıge­den jarys uıymdastyryp júrmiz. Osynaý jaýapty ári ıgi jumystyń basynda bolyp, bar­lyq jarystar­dyń joǵary deńgeıde ótýine atsaly­syp júrgen respýblıkalyq «Báıge» feder­asııasynyń prezıdenti Qanat Shoqanulyna da rızashylyǵymdy bildirgim keledi. Kelesi jyly elimizde besinshi Dúnıejúzilik kóshpeliler oıyn­dary ótedi. Bul – biz úshin de, elimiz úshin de – mańyzdy joba. Bul jaýapty is-shara barysynda jarystardyń kóptep ótýi ulttyq spor­tymyzdyń damýyna zor paıdasyn tıgizedi. Odan bólek te, aldaǵy ýaqytta biz iri-iri dodalardy uıymdastyramyz. Osy­laısha ulttyq spor­tymyzdy bolashaq­ta álemge tanytsaq deımiz», dedi Islam­bek Tóleýbaıuly.

Respýblıkalyq «Báıge» federa­sııa­­synyń pre­zıdenti Qanat Kópbaev sońǵy ýaqytta báıge sportynan ótetin jarystarǵa keletin kórermender sany artyp jatqanyn qýana jetkizdi.

«Elimizdiń óńirlerinde báıge sporty­nan jarystardy turaqty túrde ótkizip kelemiz. Maqsatymyz – ulttyq sportymyz báıgeniń ta­nym­dylyǵyn arttyryp, mártebesin ósirý. Bir qýanarlyǵy, kún sanap báıgege qyzyǵýshylyq tanytyp jatqan kórermender qarasy kóbeıip jatyr. Bul – bizdiń durys baǵytta jumys istep jatqan­dyǵymyzdyń aıqyn kór­setkishi», dedi Qanat Shoqanuly.

Júlde qory 23 500 000 teńgeni quraǵan alaman báıgege elimizdiń birneshe óńirinen 80-ge jýyq tulpar qatysyp, «Qunan báıge», «Top báıge», «Jorǵa jarys», «Alaman báıge» bo­ıynsha saıysqa tústi.

Jarys nátıjelerine keler bolsaq, 9 shaqy­rymdyq «Jorǵa jarysynda» «Salkúreń» esimdi tulpar (ıesi Jan Qoqanbaev) top jarsa, «Mesıas maı» (Álııa Asqarova) men «Juldyz» (Shýaq Jaılaýbek) júldeli oryndardan kórindi. 10 shaqyrymdyq «Qunan báıge» jarysynda kómbege birinshi bolyp «Lazer» esimdi tulpardy tizgindegen Aldııar Ýaıshan jetse, ekinshi jáne úshinshi oryndy Aslanbek Abdyqal («Qaraqat») men Nurmuqash Dilnur («Mamlıýk») ózara bólisti. Al 16 shaqyrymǵa jalǵasqan «Top báıgede» «Moı mır» esimdi tulpardyń ıesi Ámir Serik bas júldeni ıelendi. Ekinshi orynda Aslanbek Abdyqal («Abyraı») enshilese, úshinshi oryn Bekzat Dildáhanǵa («Sakýra») buıyrdy.

Ulttyq sport jankúıerleri taǵat­syzdana kút­ken 23 shaqyrymdyq «Alaman báıgede» «Talhız» esimdi tulparymen Bekzat Dildáhan márege birinshi jetip, kópshiliktiń qoshemetine bólendi. Odan keıingi oryndardy Arnat Murathan («Semser») men Arnur Samatuly («Samal») ıelendi. Sonymen qatar jarysty uıymdastyrýshylar ár báıgede júldeli oryndarǵa synyq súıem jetpeı, 4 jáne 5-oryn alǵan shabandozdardy da aqshalaı syılyqpen marapattady.

Odan bólek, jarys barysynda kórermender ulttyq kıim baı­qaýyn tamashalady. Bul saıystyń jeńimpazdaryna uıymdastyrýshylar jalpy kólemi 1 mıllıon teńge syıaqyny tabystady.