Úkimet basshysyna temirjol ınfraqurylymynyń birqatar nysanyn memleket menshigine qaıtarý barysy týraly baıandalyp, olardy básekege qabiletti ortaǵa berý týraly mámile sot tarapynan jaramsyz dep tanyldy. Atap aıtqanda, senip tapsyrylǵan múlikti ysyrap etý faktileri anyqtaldy. Qylmystyq is aıasynda tergeý organdary túpkilikti prosessýaldyq sheshim qabyldanǵanǵa deıin QTJ basqarmasyna bere otyryp, aktıvterge tyıym saldy. Múlik keshenin qorǵaý qamtamasyz etildi.
Premer-mınıstr respýblıkanyń basqa óńirinde uqsas nysandar boıynsha jumysty kúsheıtýdi tapsyryp, tıisti kásiporyndar qyzmetkerleriniń barlyq tehnologııalyq úderisi men qyzmetin saqtaýdyń mańyzyn atap ótti.
Sonymen qatar otyrysta densaýlyq saqtaý salasyndaǵy uıymdy respýblıka menshigine qaıtarý máselesi qaraldy. Aldyn ala málimetter boıynsha aktıvti basqarýdy óz moınyna alǵan jekemenshik kompanııa uzaq ýaqyt boıy óz fýnksııalaryn oryndamaı kelgen jáne kelisilgen ınvestısııalyq baǵdarlamanyń sharttaryn buzǵan. Talqylaý qorytyndysy boıynsha basqarý tıimdiligine tekserý júrgizý úshin vedomstvoaralyq komıssııa qurý týraly sheshim qabyldandy. Onyń nátıjeleri boıynsha shartty buzýdyń jáne aktıvti memleket menshigine qaıtarýdyń durystyǵy týraly sheshim qabyldanatyn bolady.
Aıta ketsek, elimizde ekonomıkany demonopolızasııalaý jáne zańsyz ıemdenilgen aktıvterdi memleketke qaıtarý jumystary qarqyndy júrip jatyr. Qazirgi kúni óńirlerde halyqpen júzdesip jatqan Májilis depýtattary da osy baǵytta jumystar júrgizip jatyr. Máselen, birer kún buryn depýtat Sergeı Ponamorev óziniń áleýmettik jelidegi paraqshasynda Almaty qalasy mańynda Ile-Alataý ulttyq parki aýmaǵyndaǵy jekemenshikke satylǵan 10 myń gektar jerdiń zańdylyǵyn tekserýge kelgenin jarııalaǵan bolatyn. Onyń aıtýynsha, kórse kóz toımaıtyn, tumsa tabıǵaty aıryqsha bul jerler aldymen jalǵa berilgen, keıin 2015 jyly Baýyrjan Baıbek ákim bolyp turǵan ýaqytta bir adamǵa satylyp ketken. Depýtat bul jerdiń qanshalyqty zańdy jolmen satylǵany kúmán týdyratynyn aıtady. Eger buǵan baqylaý bolmasa, erteńgi kúni munda qurylys jumystary bastalyp, tabıǵatqa nuqsan kelýi ábden múmkin. Biz depýtattardyń bastamasy aıaqsyz qalmaı, sońyna deıin jetetinine senemiz.
