«Jyl bastalǵaly oblys aýmaǵyndaǵy sý aıdyndarynda 26 adam qaza boldy, olardyń 19-y – eresek, jeteýi – bala. Bul oqıǵalardyń deni qaýipsizdik erejelerin óreskel buzýdan bolyp otyr», deıdi oblystyq TJD azamattyq qorǵanys basqarmasy bastyǵynyń mindetin atqarýshy Jandos Júginisov.
Qapersizdik degennen shyǵady, oqys oqıǵa qurbany qataryndaǵy bir bala esik aldyndaǵy aryqqa túsip ketse, taǵy biri septıkke qulap ketken, Árıne, «Jazym bolsa, bylamyqqa da tis synatyny» anyq. Sonda da oınap júrgen balaǵa baqylaý jasasaq, mundaı jaǵdaı azaıar edi.
Departament bastyǵynyń buıryǵyna sáıkes oblystyq polısııa departamenti, Ulttyq ulannyń 5547 áskerı bólimi, jergilikti atqarýshy organ, «Qyzylorda eriktileri» qoǵamdyq qory ókilderi birlesip, oblys aýmaǵyndaǵy sý aıdyndarynda kúndelikti reıd júrgizedi. Osyǵan deıin 517 reıd ótkizilip, 36 myńnan astam adamǵa sýdaǵy qaýipsizdik erejeleri boıynsha túsindirme jumystary júrgizilip, únparaqtar taratylypty.
Syrdarııanyń oblys aýmaǵymen ótetin bóliginiń uzyndyǵy ؘ– 1 274 shaqyrym. Buǵan 19 iri, 220 shaǵyn kanal jáne 201 kóldi qosyńyz. Bıylǵy jazǵy sýǵa shomylý maýsymyna jedel qutqarý jasaǵynyń júzý quraldary, súńgýir jaraqtary men jabdyqtary 27 sáýir kúni daıyndyqqa keltirildi. Jasaqta 69 qutqarýshy, 19 avtokólik, 23 júzý quraly, 34 súńgýir jaraǵy bar. Arnaýly avtokólikter qajetti qutqarý qural-jabdyqtarmen tolyq jaraqtandyrylǵan. Al oqys jaǵdaıdy taldaǵan mamandar kóp oqıǵanyń sebebi – qaýipsizdik erejelerin óreskel buzý ekendigin aıtady.
Árıne, aspan aınalyp jerge túserdeı ystyqta oıyn balasy tyıymyńdy tyńdamaıtyny ras. Jyl on eki aı balalar arasynda kezdesý ótkizetin tótenshelikter jyl basynan beri 115 740 oqýshynyń qatysýymen «Sýdaǵy qaýipsizdik erejeleri», «Sýda zardap shegýshilerdi qutqarý, alǵashqy dárigerge deıingi medısınalyq kómek kórsetý tásilderi» taqyryptary boıynsha 212 ınteraktıvti sabaq ótkizgen.
«Oblys sý aıdyndaryndaǵy 63 qaýipti aımaqqa 310 eskertý taqtaıshasy qoıylyp, 68 bılbord ornatyldy. Oblystyq polısııa departamentimen birlesip, sýǵa shomylý maýsymy kezeńinde «Ákimshilik quqyq buzýshylyq týraly» kodekstiń 364-babyna sáıkes 93 adamǵa eskertý berilip, 412-bap boıynsha bir turǵynǵa aıyppul salyndy jáne osy kodekstiń 440-baby boıynsha 2625 azamatqa ákimshilik shara qoldanyldy», deıdi Jandos Shaıymuly.
Jalpy, ózender men sý aıdynyndaǵy sýǵa ketý jaǵdaılary ábden saralanyp baryp, ondaǵy qaýipti aýmaqtar belgilenedi. Osy kúni 63-ke jetip otyrǵan osyndaı oryn qatary taǵy artýy múmkin.
Bıylǵy jańalyq, oblys ákiminiń qaýlysyna sáıkes Shıeli aýdanynda Aqorda, Syrdarııa aýdanynda Qalǵandarııa, Qarmaqshy aýdanynda Muratbaev jáne Qazaly aýdanynda Qashqan sý aýmaqtary kommýnaldy jaǵajaı bolyp ashyldy. Al 300 myńǵa jýyq turǵyny bar oblys ortalyǵynda maýsym boıyna 2-aq jaǵajaı jumys isteıdi. Qyzylordada sýǵa túsetin aýmaqtardy kóbeıtý, kommýnaldyq jaǵajaı ashý jóninde aıtylyp júrgeli biraz jyl boldy. Bul baǵytta tıisti oryndarǵa túrli usynys ta berilgen. Biraq ázirge aıtylǵan sózdiń iske aınalýy qıyn bolyp tur. Keler jyly qalanyń dál irgesindegi Edelveıs saıajaıyndaǵy kól osyndaı jaǵajaıǵa aınalýy múmkin degen úmit bar.
Qyzylorda
