Sýretti túsirgen Erlan OMAR, «EQ»
Lager meńgerýshisi Bekzada Jańǵylyshevanyń aıtýynsha, balalardyń jazǵy demalys orny 2010 jyldan beri jumys isteıdi. Qazir munda balalardyń demalysyn uıymdastyrý úshin barlyq jaǵdaı qarastyrylǵan. On kún demalýǵa kelgen balalar tańerteńgi saǵat 7.00-de oıanady. Tańǵy asqa deıin jattyǵý jasaıdy. Sodan keıin top-topqa bólinip, úıirmelerge barady. «Uldar bólek, qyzdar bólek jatady. Bir bólmede 20 baladan. Olardyń bólmesinde bir tárbıeshi qonady. Ájethana syrtta ornalasqandyqtan, túnde balalardy dalaǵa shyǵarýǵa týra keledi», deıdi ol.
Erkin eldiń erke ulandarynyń demalysyn sátti ótkizýine yqpal etý maqsatynda 10 túrli úıirme ashylǵan. Ásirese sporttyq úıirmelerge qatysýǵa ynta tanytqan balalardyń qatary kóp. Máselen, ústel tennısi men shahmat-doıby úıirmesiniń árqaısysyna 10 baladan qatysyp jatyr. Al 30 bala samaıdan aqqan terin suq saýsaǵymen silkip tastap, voleıbol oınap júr. Sporttyq oıyndar úıirmesine 28 óren jazylypty. Bári de úıirmege baratyn ýaqytty asyǵa kútedi.
Budan bólek, bolashaǵyn ónermen baılanystyrýdy qalaǵan balalar úshin birneshe úıirme jumys isteıdi. Án salýdyń qyr-syryna qanyqqysy kelgen 20 balanyń vokal men dástúrli án úıirmesinen úıreneri kóp. Tabıǵattyń sulý kórinisin, ózge qubylystardy qalt jibermeı, qylqalamyna arqaý etýdi kózdegen 12 bala sýret úıirmesine qatysyp júr. Munda kitapqumar 12 óren bar. Olar qosymsha bilimdi kitaptan izdep, kórkem shyǵarmalarǵa arqaý bolǵan oqıǵalardy jadyna túıýge bekingen.
Máselen, aǵaıyndy Baıan men Aqjúrek О́temisterdiń qalaýy ózgeshe. Bala bolsa da, baısaldylyqty boıyna sińirgen Baıan án aıtýǵa, Aqjúrek kórkemsóz oqýǵa mashyqtana bastapty. Endi 5-synypqa baratyn Aqjúrek ózi bilim alatyn mektepke aty berilgen zańǵar jazýshy Muhtar Áýezovtiń shyǵarmalaryn, eliniń azattyǵyn ańsaǵan Mahambet babasynyń óleńderin mánerlep oqyǵandy unatady. Ony kórkemsóz oqýǵa Atyraýdaǵy N.Tilendıev atyndaǵy kishi óner akademııasynyń 9-synybynda oqıtyn aǵasy Aıbyn baýlıdy eken.
«Bıyl lagerge alǵash ret keldim. Kóp dostar taptym. Qyzyqty sátter óte kóp», deıdi Shuǵyla Nysanalyqyzy.
Lager tárbıeshileriniń arasynda jigitter de bar. Jigitter degenimizben, olar – mekteptiń muǵalimderi. Máselen, Erasyl Saıfolla M.Sıranov atyndaǵy alǵashqy áskerı daıyndyq páninen dáris beredi. Al Qaıyrbek Kenjálıev Sh.Ýálıhanov atyndaǵy mekteptiń qazaq tili men ádebıeti pánderiniń, Almat Mámbetqalıev ınformatıka pániniń muǵalimi bolyp jumys isteıdi. Qazir lagerge kelgen balalarǵa tárbıeshi bolyp júr. «Balanyń aty – bala. Úıinen alysqa uzap shyqpaǵan soń ata-anasyn saǵynyp, jylap júretinderi bar. Sondaı kezde jylaǵan balaqaıdy qushaqtaımyz, baýyrymyzǵa basamyz. Betinen súıemiz, ulǵa ákesindeı, qyzben anasyndaı sóılesip, jubatýǵa tyrysamyz», deıdi Almat Mámbetqalıev.
«Jas órken» lageriniń aýlasy balalardyń kúlkisinen bir tynbaıdy. Biraq arasynda ata-anasyn saǵynyp, kóz jasyna erik beretinder bar. Munyń syryn lager medbıkesi Araı Dúısenova bylaısha túsindirdi. «Munda kúnine bes mezgil beriletin tamaqtyń sapasy muqııat tekseriledi. Balalar arasynda tamaqtan ushyný deregi tirkelgen joq. Biraq «Ishim, basym aýyrdy» deıtin balalar kezdesti. Bul – qusalyqtan bolatyn aýrý. Balalar úıin, baýyrlaryn, ata-anasyn saǵynǵandyqtan, qusalyqqa salynady», deıdi ol.
Inder aýdandyq bilim bóliminiń sektor meńgerýshisi Shárbaný Sabyrovanyń aıtýyna qaraǵanda, aldaǵy ýaqytta lagerdi jyl boıy jumys isteıtin tásilge kóshirý josparlanǵan. Soǵan baılanysty lager aýmaǵynda kópbeıindi sport alańdaryn salý, amfıteatrǵa jóndeý júrgizý, alańdy qorshaý sekildi jumystardy atqarýdyń smetalyq qujaty jasaqtalyp jatyr. Eski jıhazdardy aýystyrý josparlanǵan.
Al Mahambet aýdanyndaǵy «Araı» lagerindegi ahýal sál ózgerek. Lagerge kúrdeli jóndeý júrgizilgen. Munda ár bólmede úsh baladan jatady. Jatar oryn men ashananyń arasy alshaqtaý. Balalarǵa arnalǵan korpýsta dárethana men dýsh bar.
Oblystyq bilim berý basqarmasynyń baspasóz hatshysy Elmıra Tuńǵatarovanyń málimetinshe, bıyl jazǵy demalyspen 70 myńnan asa balany qamtý josparlanǵan. Bul maqsatqa jergilikti bıýdjetten 760 mln teńge bólingen. «Oblysta 149 mekteptiń janyndaǵy tamaqpen qamtıtyn jáne shıpajaı úlgisindegi lagerlerde 8 466 balanyń demalysy uıymdastyrylyp otyr. Reseı Federasııasynyń Jeleznovodsk qalasy mańyndaǵy «Qazaqstan geologi» lagerinde 2 988, Inder aýdanyndaǵy «Jas órken» lagerinde 1 008, Mahambet aýdanynda ornalasqan «Araı» lagerinde 480 bala demalady. «Jazǵy saýyqtyrý joldamasy» áleýmettik jobasy aıasynda 1000 oqýshy Sh.Esenov atyndaǵy Kaspıı memlekettik ýnıversıteti janyndaǵy Ainaline Camp ortalyǵyna jiberildi», dep málim etti E.Tuńǵatarova.
Atyraý oblysy
