ÁMSQ Astana fılıalynyń qyzmetkerlerine SITY klınıkasynyń múmkindikterin tanystyrǵan bas dáriger Qanat Dúısenbaev emhanada óte sırek kezdesetin erekshe operasııalar jasalatynyn jetkizgen. Osyǵan baılanysty ıgilikti istiń mán-jaıyn dárigerlerden surap kórdik.
«CITY emhanasynda 2023 jylǵy 16 mamyrdan bastap osyǵan deıin MÁMS júıesimen adam aıaǵynda bolatyn arterııalyq qan aınalymyn qalpyna keltirý boıynsha 10 kúrdeli operasııa jasaldy», deıdi stasıonar jáne operblok meńgerýshisi Ǵalııa Ábejanova.
Elordadaǵy bul emhana MÁMS júıesi boıynsha tegin em alǵan alǵashqy emdelýshi uzaq ýaqyttan beri aterosklerozdan zardap shekken 82 jastaǵy qart kisi aıaǵynyń tamyrlary tolyǵymen bitelip, sonyń saldarynan aıaǵynda qatty aýyrsyný týdyratyn trofıkalyq jaralar paıda bolǵan. Tipti aýyrsynýdy basatyn dáriler de áser etpeıtin kórinedi.
«Sozylmaly qabynýǵa kez kelgen ýaqytta ınfeksııa túsip, adamnyń búkil aǵzasyna keri áser etedi jáne saý aǵzalardyń jumysyn buzýy múmkin. Mundaı aýrýlardy emdeýdiń túrli ádisteri bar. Biraq aıaqty saqtap qalý múmkin bola bermeıdi. Al bul naýqastyń jaǵdaıynda tipti kúrdeli boldy. Mundaı jaǵdaıda kóbinese aýyr syrqatty eskere otyryp, naýqasqa operasııa jasaýdan bas tartýdy usynýy múmkin», deıdi dárigerler.
Qarttyń naýqasy qatty asqynyp ketkendigine jáne sozylmaly syrqatyna qaramastan, dárigerler jergilikti anestezııa arqyly operasııa jasaýǵa sheshim qabyldaǵan. Osylaısha, dárigerler aıaq tamyrlarynyń qan júrýin qalpyna keltirgen. Nátıjesinde, qysqa ýaqyt ishinde trofıkalyq jaralar tolyq jazylyp, naýqastyń aıaǵyn kesýden saqtap qaldy. Iаǵnı qarııany múgedek bolyp qalýdan aman saqtaǵan.
«Ákemniń aýyrǵanyna 20 jyldan asty. Buryn dárigerler kóptegen dári-dármek taǵaıyndaıtyn, onymen aýyrsynýdy basýǵa bolatyn. Biraq keıingi birneshe jylda dáriler áser etpeıtin boldy. Aýyrsyný basylmaı, ákem uıqydan qaldy. Birneshe tekserýler men konsýltasııalardan keıin biz CITY emhanasyna bardyq. KT zertteýin júrgizý kezinde angıohırýrg Aıdar Parmanov ákemniń aýrýdan zardap shegýiniń sebebi nede ekenin kórsetip, túsindirdi. Bul kezde aıaǵy qaraıyp ketken edi. Dáriger «bizde endi ýaqyt joq, aıaqty aman saqtap qalý kerek» dedi. Sebebi operasııa jasalmasa, derti dendep ketýi múmkin eken. Biz ákemizdiń aıaǵyn saqtap qalýǵa múmkindik bar ekenine qýanyp, dereý qan taldaýlaryn tapsyryp, tekserýlerden ótkizip, hırýrgııalyq emdeýge daıyndaı bastadyq. Aýrýhanaǵa jatqyzǵannan keıin dárigerler ákemizge MÁMS boıynsha tegin operasııa jasady. Qazir ákemiz ózin jaqsy sezinedi jáne biraz jyldan soń túnde tynysh uıyqtaıtyn boldy. Bul rette aq halatty dárigerlerge alǵysymyz sheksiz!» deıdi naýqastyń balalary.
Mamandardyń aıtýynsha, mundaı operasııa qan tamyrlary tájirıbesinde óte sırek jasalady. Bul óz kezeginde elordada qan tamyrlary hırýrgııasy ádisteriniń odan ári damýyna, qazirgi zamanǵy álemdik deńgeıde hırýrgııalyq kómektiń damyǵan ádisterin ıgerýge jáne engizýge senimdilik beredi. Sondaı-aq atalǵan emhananyń angıohırýrg dárigeri 76 jáne 85 jastaǵy naýqastarǵa da osyǵan uqsas operasııa jasapty. Bul operasııalar da medısınalyq saqtandyrý qory esebinen júrgizilgen.
«Bul operasııalar jergilikti anestezııa arqyly jasaldy. Operasııanyń negizi tásili naýqastyń qan aǵymyn qalpyna keltirý úshin onyń óz kúretamyryn qoldanamyz. Ol daıyndalǵannan keıin arterııalarǵa tigiledi, nátıjesinde kúretamyr shýnt qyzmetin atqarady, odan keıin ol arterııalanady da, aǵzalardy qanmen qamtamasyz etedi. Bul jaǵdaıda kúretamyrdy tolyǵymen oqshaýlaýdyń qajeti joq, óıtkeni bul operasııalar klassıkalyq túrinde jasalady», deıdi angıohırýrg Aıdar Tólegenuly.
P.S: 2018 jyly issaparmen Shymkent qalasynda júrgenimizde sol jerdegi bir qalamger aǵamyzdyń úıinde qonaqta boldyq. Kóp taǵylymdy áńgime aıtyp, shyǵaryp salǵan edi. Arada alapat kovıd indeti boldy, sóıtip byltyr Shymkentke taǵy jolymyz tústi. Bul joly aǵamyzǵa arnaıy sálem bere ketýge ózimiz barǵanbyz. Qazaq mádenıetine eleýli eńbek sińirgen aǵamyz bir aıaǵymen otyr, ekinshi aıaǵy sanynan tómen joq. Bizdiń júzimizdegi suraqty oqyp qoıǵan aǵamyz mán-jaıdy birden túsindirdi. Aıaqtaǵy qan tamyrlardyń bitelýi jáne jarylýy saldarynan bashpaıdan bastap qaraıyp, shirı bastaǵan. Bul shirý ekinshi aıaqqa áser etse, eki aıaǵynan birdeı aıyrylady degen dárigerler bir aıaǵyn kesip tastapty. Joǵaryda aıtylǵan operasııany estigende oımyzǵa osy qalamger aǵamyzdyń jaǵdaıy eriksiz oıǵa oralyp edi.
