Foto: Atyraý oblysy ákimdigi
QR Premer-mınıstri Álıhan Smaıylovtyń tóraǵalyǵymen ótken Úkimet otyrysynda oblys ákimi Serik Shápkenov aımaqtaǵy bilim berý uıymdarynyń jańa 2023-2024 oqý jylyna daıyndyǵy týraly baıandama jasady.
Aımaq basshysynyń aıtýynsha, oblysta jańa oqý jylyna 143 myń oqýshyny qabyldaý josparlanǵan. Bıyl bilim berý uıymdarynyń materıaldyq-tehnıkalyq bazasyn nyǵaıtýǵa 4 544 527,0 mln teńge bólingen. Oǵan qosa jańa oqý jylynda shalǵaı aýylda turatyn 4 561 oqýshyny tasymaldaý úshin jańa avtobýstar satyp alynady.
«О́tken jyly oblysta oqýshylardy 49 avtokólik tegin tasymaldady. Endi jańa oqý jylynda 60 eldi mekende 4 561 oqýshyny tasymaldaý josparlanyp, qosymsha 23 avtobýs satyp alý úshin 1,1 mlrd teńge bólindi. Kólikter qyrkúıek aıynda paıdalanýǵa beriledi. Oqýlyq jáne oqý-ádistemelik keshendermen qamtý úshin 1 676 370,0 myń teńge bólindi. Oqýlyqtar 25 tamyzǵa deıin tolyqtaı jetkizilip, taratylady. Oblystaǵy túpkilikti sheshilgen máselelerdiń biri - 1-4 synyp oqýshylaryn tolyq, 5-11 synyptaǵy áleýmettik az qamtylǵan otbasy balalaryn tegin ystyq tamaqpen qamtý. Atalǵan shara jańa oqý jylynan bastap júzege asyrylady. Bıyl 21 mektepte ınternet jyldamdyǵyn arttyrý josparlanyp, 108 332,1 myń teńge bólindi. Nátıjesinde 20 Mbıt/s jáne odan joǵary jyldamdyqtaǵy ınternetpen qamtamasyz etý paıyzy 43,3% quraıtyn bolady», dedi oblys basshysy.
Aıta keteıik, Atyraý oblysynda modernızasııalaý jumystaryna jatatyn 25 mekteptiń búgingi kúni 5-eýi tolyqtaı aıaqtalǵan. Qalǵan 20 mektepte birneshe baǵytta jumystar júrgizilip jatyr. Modernızasııalaý baǵytyndaǵy jumystar jyldyń aıaǵyna deıin iske asyrylady.
Úkimet otyrysynan keıin oblys ákimi jaýapty sala basshylaryna modernızasııalaýdan ótip jatqan mektepterdiń jumys qarqynyn jedeldetýdi tapsyrdy. Sondaı-aq Atyraý qalasy ákimine 25 tamyzǵa deıin barlyq mektepke oqýlyqtar jetkizý qajettigin basty nazarda ustaýdy mindettedi.
