Sýretti túsirgen Aıaýjan Ýteýlınova
Kezekti jumys saparynda aımaq basshysy aldymen Ulan aýdanynyń ortalyǵy Qasym Qaısenov kentindegi jańadan berilgen 40 páterli úıdiń mańaıyn kórdi. Turǵyndardyń aıtýynsha, kóp qabatty úıde bálendeı problema joq. Áıtpese, keıingi on jylda boı kótergen jańa úılerdiń sapasy syn kótermeı jatqanyn jaqsy bilemiz.
– Memlekettik baǵdarlama boıynsha eki bólmeli páter aldyq. Ekinshi naryqtaǵy úıden alaıyq desek, bólmeleri tar, baǵasy qymbat. Sondyqtan bizge baǵdarlama arqyly alý tıimdi boldy. Páterdiń jalpy quny – 14 mln teńge, – deıdi jańa úıge qol jetkizgen Dana Baıshýaqova.
Budan keıin oblys basshysy E.Kósherbaev Mádenıet úıinde aýdan halqymen kezdesti. Kezdesýge kelgen turǵyndar aýdandaǵy problemalardy tizip berdi. Máselen, ortalyqtandyrylǵan aýyz sý júıesi sheshilgenimen, sýdyń sapasy óte tómen eken. Tipti sý qubyrlary shydas bermeı shirip ketetin kórinedi. Aýdan turǵyny Lıýdmıla Mıheeva kótergen bul máseleni oblys ákimi dereý qolǵa alý kerek ekenin aıtyp, aýdan basshylyǵyna tapsyrdy. Tapsyrma oryndalsa, aýyz sý qalalyq sý júıesine qosylady. Aıta ketsek, Qasym Qaısenov kenti qalanyń irgesinde ǵana. Demek aýyz sý tartý jumystary durys atqarylatyn bolsa, aıtarlyqtaı qıyndyq týǵyzbaýǵa tıis. Sonymen qatar kent ósip kele jatqanymen, balalardyń bos ýaqytyn ótkizetin oryndardyń azdyǵy da aıtyldy. Bar-joǵy úsh-aq fýtbol alańy bar eken. Onyń bireýi tozyp turǵan kórinedi.
– Kenttegi halyq sany – 7 myńdaı. Balalardyń bos ýaqytyn tıimdi ótkizýdi uıymdastyrý kerek. Ol úshin jańadan boı kóteretin saýda úıleriniń ishine oıyn alańdaryn jasaý qajet. Sondaı-aq mektep sportzaldaryn da balalardyń ıgiligine bereıik. Tek, bilikti jattyqtyrýshy jumys istesin, – dedi azamattardyń suraǵyna jaýap qatqan E.Kósherbaev.
Baıqaımyz, turǵyndar tarapynan qoıylǵan suraqtardyń basym kópshiligi jeke bastyń emes, aýdannyń áleýmettik máseleleri aınalasynda qoıylyp jatqany qýantty. Aıta ketsek, memleket tarapynan ulttyq sportqa kóp kóńil bólinbeı jatqany sóz boldy. О́tip jatqan jarystardyń kóbin halyq ózi uıymdastyryp jatady eken. Bul saýalǵa jaýap bergen oblys basshysy jalpy buqaralyq sportty damytýdy qolǵa alyp, sport basqarmasyna tapsyrma beretinin jetkizdi. Odan bólek oblysta ótkir turǵan máselelerdiń biri – jerasty baılyqtaryn qazyp, ornyn qaıta qalpyna keltirmeı jatqan kompanııalardyń salǵyrttyǵy.
– Jer baılyǵyn alyp jatqan kompanııalar eger zań aıasynda jumys istese, toqtatýǵa bolmaıdy. Eń bastysy, qadaǵalaýymyz kerek. Aýyl turǵyndary tarapynan da qadaǵalaýdy kúsheıtken jón. Biraq shýlap másele sheshe almaımyz. Osy oraıda aıta keteıin, shoshqa fermasyn halyq qoldamasa, ınvestorǵa basqa joldy kórsetkenimiz jón, – dedi aımaq basshysy.
Jalpy, halyqtyń qarsha boraǵan saýaldary men usynystarynan keıin oblys ákimi aýdan basshylyǵyna kentti gúldendirý jóninde tapsyrma berdi. Aıtýynsha, qańyrap qalǵan ǵımarattar halyqtyń kóńil kúıine áser etedi. Ony súrip tastaý qajet nemese úńireıgen terezelerdi jaýyp tastaǵan durys.
Oblys ákiminiń kelesi baǵyty Aıyrtaý aýylynyń kireberisindegi qus fabrıkasy edi. Mundaǵy negizgi másele – qus azyǵy. Jemshóbiniń birazyn shetelden ákelip otyr. Qus fabrıkasynyń bas dırektory Roman Romanov jumys barysymen tanystyra kele, taýyq etine degen suranystyń artyp kele jatqanyn aıtty. Ásirese muzdatylǵan etten góri sýytylǵan etke suranys kóp.
Endigi baǵyt Jańa Qanaı aýylyndaǵy oblystyq psıhıatrııalyq aýrýhanasy edi. Mundaǵy problema – ǵımarattyń tozyǵy jetip turǵan. Ras, bir qabatty ǵımarattyń kúrdeli jóndeýge jaramaıtyny kózge kórinip turdy. Oryn sany da jetkiliksiz kórinedi. Iаǵnı emdelýge oryn tappaǵan psıhıkalyq aýytqýshylyǵy bar azamattar el ishinde júr degen sóz. Olardan tónetin qaýiptiń baryn da nesin jasyramyz? Endeshe, ǵımarat máselesi jedel sheshilýge tıis. Ol týraly aımaq ákimi sala basshylaryna tapsyrma berdi.
Ulan aýdanyn aralap júrgen oblys basshylyǵy jumys saparyn Ýkraınka aýylyndaǵy kúrdeli jóndeýden mádenıet úıi men bekire balyǵyn ósirip otyrǵan «Ost fish» sharýashylyǵynda qorytyndylady. Mundaı aıtylǵan birqatar másele de jýyq arada sheshiletini aıtyldy.
Shyǵys Qazaqstan oblysy,
Ulan aýdany
