Foto: jambyl_tjd
26 tamyzda Baýyrjan Momyshuly atyndaǵy saıabaqta ashylǵan eskertkishtiń saltanatty rásimine Jambyl oblysynyń ákimi Nurjan Nurjigitov, M.Aımanovtyń týystary, áriptesteri, qala turǵyndary qatysty.
Aıta ketsek, Azamattyq qorǵaý polkovnıgi Meıirjan Aımanov oq-dáriler qoımasyndaǵy órti sóndirýge qatysyp, órt sóndirý jumystaryn basqardy jáne tikeleı áskerı bólimde azamattardyń qaza bolýynyń aldyn aldy. Jarylys jáne aýqymdy órt saldarynan erlikpen qaza tapty. M.Aımanovqa qaıtys bolǵannan keıin Prezıdenttiń jarlyǵymen «Halyq qaharmany» qurmetti ataǵy berildi jáne «Otan» ordenimen marapattaldy.
Sondaı-aq Jambyl oblystyq Tótenshe jaǵdaılar departamentiniń qyzmetkerleri eki jyl buryn 26 tamyzda bolǵan oqıǵa saldarynan qaza tapqan Meıirjan Aımanov, Aleksandr Mıkropýlo,
Sergeı Zaıkın, Táńirbergen Tórebekov,
Jánibek Turmanov, Ǵafan Qýatbek, Arnur Temirbolatov, Arnur Serikuly, Álibı Keńes, Eldos Sandybaev esimdi áriptesterin saǵynyshpen eske alyp, estelikterin bólisti.
«Bul órt sóndirýshilerdiń ómirindegi sońǵy kezekshilik boldy. Olardyń árqaısysy úıge aman-esen oralady degen senimmen qyzmetke ketti. Biraq ókinishke qaraı, bizdiń 48 qyzmetkerimiz ártúrli dárejede jaraqat alyp, 10-y qaza tapty. 10 qaharman, 10 órt sóndirýshi, 10 keremet adam endi bizdiń esimizde máńgilik saqtalady», dep jazdy oblystyq TJD baspasóz qyzmeti.
