Prezıdentke vedomstvonyń bıylǵy úshinshi toqsannyń basynan beri atqarǵan jumystarynyń negizgi nátıjesi men buǵan deıin berilgen tapsyrmalarynyń oryndalý barysy jáne aldaǵy kezeńge arnalǵan jospary týraly málimet berildi.
Qasym-Jomart Toqaevqa Qazaqstan aýmaǵynda lańkestik áreket jasaýdy josparlaǵan radıkaldy toptyń quryqtalǵany týraly baıandaldy. Terrorıstik qylmystar boıynsha 7 sotqa deıingi tergeý amaldary bastaldy jáne 3 ekstremıst sottaldy.
Ermek Saǵymbaevtyń aıtýynsha, terrorızmge qarsy is-qımyl sharalaryn jetildirý maqsatynda UQK Terrorızmge qarsy ortalyǵy 103 oqý-jattyǵý jıynyn uıymdastyrdy.
Sonymen qatar Memleket basshysyna krımınogendik ahýaldy jaqsartý jumystarynyń nátıjeleri týraly baıandaldy. Atap aıtqanda, qoǵamǵa qaýip tóndirgen 5 qylmystyq top áreketiniń joly kesildi. Zańsyz qarý aınalymyna qatysy bar 2 arna joıyldy. Ulttyq qaýipsizdik organdary polısııamen birlesip, qarý jasyrylǵan 12 oryndy anyqtady. Jalpy sany 59 qarý, 3 granata jáne 3 339 oq-dári tárkilendi.
Esirtkige qarsy kúres barysynda 7 zerthana, 8 halyqaralyq jáne aımaqtyq esirtki tasymalynyń joly kesildi. 660 keliden astam esirtki jáne 17 tonnadan asa prekýrsor tárkilendi.
Budan bólek, memlekettik shekarany qorǵaý jáne zańsyz kóshi-qonmen kúres salasynda 4 257 quqyq buzýshy ustaldy. Quny 3,8 mıllıard teńgeden asatyn valıýta men taýarlardyń zańsyz tasymaldanýyna jol berilmedi. Sondaı-aq qarý, oq-dári jáne esirtki alyp ótýge qatysty 120 áreketke tosqaýyl qoıyldy.
Aqparattyq qaýipsizdikti qamtamasyz etý barysynda elimizdiń asa mańyzdy ınfraqurylym nysandaryna jasalǵan 36 mıllıonnan astam kıbershabýyl men 866 DDoS-shabýyl toıtaryldy.
Kezdesý sońynda Qasym-Jomart Toqaev ulttyq qaýipsizdik organdarynyń jumys baǵyttary boıynsha birqatar naqty tapsyrma berdi.
