Japan túzge baryp túren salǵandardyń arasynda taý-ken ınjeneri Jaılaýbaı Synasapovtyń esimi aıryqsha atalatyn. О́ıtkeni ol alǵashqy sátten bastap kenishti paıdalanýǵa bergenge deıingi barlyq istiń basy-qasynda júrgen azamat edi.
J.Synasapov eńbek jolyn 1985 jyly Qaraǵandy polıtehnıkalyq ınstıtýtynyń Jezqazǵan fılıalyn bitirgen soń, Jezqazǵan shahtoprohodkalaý tresinde taý-ken sheberi bolýdan bastady. Keıin isine myǵym, bilikti maman qyzmet satysynda kóterilip, birqatar basshylyq laýazymda da boldy. II jáne III dárejeli «Kenshi dańqy» tósbelgisimen marapattaldy. Bir ǵajaby, ol qandaı laýazymda júrse de ózin eshqashan qatardaǵy jumyskerden joǵary ustaǵan joq. Muny sol jumyskerler áli kúnge aıtady. О́kinishtisi sol, J.Synasapov 2013 jyly ómirden ozyp ketti.
«Qashan bolsyn aramyzda júrdi, istiń yńǵaıyn qalaı júrgizse durys bolatynyn aqyldasyp otyrýdan arlanbady, ózimbilemdikke salynbady. Bul kez kelgen basshyda kezdese bermeıtin alabóten erekshe qasıet edi. Jumysqa kelgende ol eń aldymen árqaısymyzdyń aman-saýlyǵymyzdy, otbasymyzda ne bolyp jatqanyn suraıtyn», dep ol týraly Janat Núrkeev, Jumabek Baımuhanov, Talǵat Yryspaev esimdi jumyskerlerdiń eske alǵanyna kýá bolǵanymyz da bar edi. Jaılaýbaı Synasapovtyń rýhyna degen áriptesteriniń kóńili sol qalpynda saqtalyp qalǵanyna jýyrda taǵy bir márte kózimiz jetti.
«Jomart» kenishinde ashylǵan alleıaǵa Jaılaýbaı Qulshanulynyń esimi berilip, eskertkish taqta ornatyldy. Ol eńbek etken trest qazir Sosıalıstik Eńbek Eri Ǵazız Omarovtyń esimin ıelenedi, «Ǵ.Omarov atyndaǵy Shahtoprohodkalaý tresi» dep atalady. Al ózi bastan-aıaq qurylysyn qolymen atqarǵan «Jaman Aıbat» kenishi de ataýyn ózgertip, «Jomart» atanǵan búginde.
Alleıanyń ashylý saltanatyna jınalǵandar Jaılaýbaı Qulshanuly týraly tebireniske toly estelik aıtty.
«Jaılaýbaıdyń júreginiń aqtyǵy árqashan sezilip turatyn. Ol kiside ótirik aıtý, jalǵan sóıleý degen bolmaıtyn. Aıtsa, aıtqan sózinde turatyn. Sol sebepti de jumyskerler onyń aınalasyna úıirsektep, janyna jaqyn júretin. Ádette bastyq kele jatyr dese, kózge kórinbeýge tyrysatynymyz ras qoı. Al Jákeńniń jóni bólek-tin. Jumystan sál bosaǵanda aıtatyn áńgimesi qandaı ádemi edi. Ázil áńgime aıtyp, ózi de kúlip, ózgeni de kúldirip degendeı bir raqattanyp qalýshy edik. Onyń kúlkisi de erekshe bolatyn. Ol kúlgende raqattana kúletin, al jumystyń reti bolmaı qalǵanda, bolmasa jumyskerlerdiń áldebir máseleleri týyndasa, barynsha muńaıatyn. Ol bizge sonysymen qadirli edi», degenge toqaılasty.
«Eńbegi bardy el umytpaıdy» degen osy. Árıne, bul rette keshegi áriptesteriniń rýhyn áspetteı bilgen Ǵ.Omarov atyndaǵy Shahtoprohodkalaý tresi basshylyǵynyń kóregendiligin aıta ketkenniń de artyǵy joq.
Ulytaý oblysy
