Oblysqa arnaıy issaparmen kelgen Senat spıkeri Máýlen Áshimbaev Jetisý oblysynyń jurtshylyǵymen kezdesti. Kezdesý barysynda óńirdi damytý máseleleri, Memleket basshysynyń tapsyrmalaryn iske asyrý jospary, Tekeli qalasynyń ınfraqurylymyna qatysty problemalar jáne Senat pen máslıhattardyń ózara is-qımylynyń keleshegi talqylandy. Palata spıkeri el Prezıdentiniń bastamasymen qolǵa alynǵan reformalardyń iske asyrylýyn sapaly túrde qamtamasyz etý Palata men máslıhattardyń birlesken jumysyndaǵy asa mańyzdy mindet ekenin atap ótti.
«Memleket basshysynyń bastamasymen elimizde aýqymdy ózgerister oryn alyp jatyr. Bul rette bizdiń basty maqsatymyz – barshaǵa teń múmkindik beretin Ádiletti Qazaqstan qurý. Osylaısha, elimiz damýdyń jańa kezeńine qadam basyp otyr. Osyndaı ortaq maqsat jolynda el bolyp jumylyp, bekem birlik tanytý aıryqsha mánge ıe. Bul memlekettiligimizdi nyǵaıtyp, Táýelsizdigimizdi baıandy etý úshin qajet», dedi M.Áshimbaev.
Sondaı-aq ol Senattyń zań shyǵarý qyzmetine toqtalyp ótti jáne óńirlermen tıimdi ózara qarym-qatynas ornatýdyń mańyzdy ekenine nazar aýdardy.
«Prezıdentimiz Qasym-Jomart Toqaev obektıvti jáne táýelsiz sot ádiletti memlekettiń negizi ekenin aıtty. Soǵan sáıkes Senat janynan sot júıesin reformalaýdy zańnamalyq turǵydan qamtamasyz etý úshin jumys toby quryldy. Bul baǵytta qabyldanatyn zańdar táýelsiz, ashyq jáne kásibı sot júıesin qurýǵa yqpal etedi dep senemiz. Jańa sessııada senatorlardyń bastamasymen ázirlengen birqatar zań jobasyn qaraımyz. Olardyń qatarynda jaıylymdyq jerlerdi paıdalaný, organıkalyq ónim óndirý máseleleri boıynsha zań jobalary bar. Osyndaı aýqymdy jumysta óńirlerdegi áriptesterimizdiń tájirıbeleri men pikirleri asa mańyzdy. Sondyqtan biz máslıhat depýtattarymen belsendi ári tyǵyz jumys isteýdi kózdep otyrmyz», dedi M.Áshimbaev.
Palata tóraǵasy Senat janyndaǵy Jergilikti ókildi organdarmen ózara is-qımyl jasaý jónindegi keńes pen «О́ńir» depýtattyq tobynyń jumysyna da toqtaldy. Atalǵan eki ınstıtýttyń qyzmeti aımaqtardaǵy problemalardy sheshýge yqpal etýge arnalǵan. О́ńirlerdegi túıtkilderdiń basym bóligi ınfraqurylymǵa, áleýmettik nysandarǵa jáne memlekettik baǵdarlamalardyń iske asyrylýyna qatysty ekeni belgili. Degenmen óńirdiń ótken jeti aıdyń naqty kórsetkishterine kóz salatyn bolsaq, áleýmettik-ekonomıkalyq salanyń barlyǵynda ósim bar. Máselen, ónerkásip kólemi 8,9%-ǵa artqan. Aýyl sharýashylyǵy ónimi 1,4%-ǵa ósip, qurylys jumystarynyń kólemi 1,7 esege ulǵaıǵan. Turǵyn úıdi paıdalanýǵa berý kórsetkishi – 18,1 paıyz, saýda 1,7 esege ósken. Jyl basynan beri oblys ekonomıkasyna 119,6 mlrd teńge ınvestısııa tartylypty.
«Bul kórsetkishter – Jetisý jurtshylyǵynyń, ákimshilikterdiń, máslıhat depýtattary, qoǵamdyq keńes músheleri men úkimettik emes uıymdarymen birlese atqarylǵan ortaq jumystardyń nátıjesi. Jalpy, bıylǵy jyly ótken barlyq deńgeıdegi depýtattar saılaýynyń nátıjesinde Jetisý oblysynyń depýtattar quramy 75%-ǵa jańaryp, 6 saıası partııa fılıaldarynyń ókilderi endi. Jyl basynan barlyq deńgeıdegi ákimderdiń turǵyndarmen oflaın, onlaın baılanysta 1 215 kezdesýi uıymdastyryldy. Oǵan 116 106 adam qatysyp, turǵyndar tarapynan 4 607 másele kóterildi. Sonymen qatar, 1 188 jeke qabyldaý ótkizildi. Aldaǵy ýaqytta da el ıgiligi jolynda atqaratyn sharýalarymyz az emes», deıdi óńir ákimi Beıbit Isabaev.
Kezdesýde óńir depýtattary Lepsi-Balqash tasjolynyń jóndeý jumystarynyń salǵyrttyǵyn jáne Aqshı aýylyndaǵy jaryq jelileriniń eskirgenin jetkizdi. Sondaı-aq Taldyqorǵan qalasynyń irgesindegi saıajaılarǵa mártebe berilýin surady. Senat spıkeri bul máseleler kóp uzamaı sheshimin tabatynyn jetkizdi.
Odan keıin Senat tóraǵasy Tekeli qalasynyń turǵyndarymen kezdesti. Bul kezdesýde de óńirdi damytý máseleleri keńinen sóz boldy. Onyń ishinde qalanyń ınfraqurylymyna qatysty máseleni sheshý barysyna erekshe kóńil bólindi.
«Qalada kanalızasııalyq-tazartý nysany ábden tozǵan. Búginde bul óte ózekti másele ekenin bilemiz. Osy problemany sheshý úshin jańa tazartý stansasy salynyp jatyr. Aldaǵy ýaqytta bul baǵyttaǵy jumys Senattyń baqylaýynda bolady. Oblystyń 2025 jylǵa deıingi damý josparynda ekonomıkany damytý jáne ınfraqurylymdy jaqsartýmen birge áleýmettik salaǵa da erekshe basymdyq berilgen. Soǵan baılanysty aldaǵy úsh jylda óńirde birqatar turǵyn úı, mektep, medısınalyq mekemeler salynbaq. Osy oraıda oblys basshylyǵy Tekeli qalasynyń da damýyna erekshe mán beredi dep senemiz», dedi Palata spıkeri.
Sapar barysynda Máýlen Áshimbaev Jetisý oblysynyń bochchashylarymen de kezdesti. Qazirgi tańda óńirde atalǵan paralımpıadalyq sport túrinen eki arnaıy úıirme jumys isteıdi. Kezdesýde Senat tóraǵasy elimizde ınklıýzıvti qoǵam qurý baǵytynda atqarylyp jatqan jumystar jóninde aıtty.
Odan bólek, Palata spıkeri Quljabaı Qasymov atyndaǵy №28 IT mektep-lıseıine bardy. Oqý ornynda ótken kezdesýde oqýshylar men pedagogterdiń ózin-ózi damytý tásilderin únemi jetildirip otyrý jáne ákimdik tarapynan mektepterdegi oryn tapshylyǵy máselesin sheshý jaıynda sóz qozǵaldy.
Jetisý oblysy
