Foto: gov.kz
«Memleket basshysy óziniń alǵashqy Qazaqstan halqyna Joldaýynda úlken saıası ózgerister týraly jarııalady. Sebebi eldiń qoǵamdyq-saıası ómirin jańǵyrtpaıynsha, ekonomıkalyq reformalardy júrgizý múmkin bolmaıtyn edi. Azamattyq qoǵamdy damytý tujyrymdamasy iske asyrylyp jatyr. Bul qujat demokratııany nyǵaıtýdyń jańa kezeńi jáne kóppartııalyqty damytý men básekeli saılaýdy ótkizý jolyndaǵy alǵashqy qadam boldy. Prezıdent janyndaǵy Ulttyq qoǵamdyq senim keńesiniń jumysyn jalǵastyrý úshin jalpyulttyq deńgeıde Ulttyq quryltaı quryldy», dedi Álıhan Smaıylov.
Budan soń ol beıbit jınalystardy uıymdastyrý men ótkizýdiń jańa tártibi zańnama deńgeıinde rettelgenin aıtty.
«Alǵash ret zań júzinde sybaılas jemqorlyq qylmys oryn alǵan memlekettik organ basshysynyń jaýapkershiligi bekitildi. Ákimshilik rásimdik-prosestik kodeks qabyldandy. Ol azamattar men bıznestiń múddesin qorǵaýdy qamtamasyz etedi. Zań júzinde azamattardyń quqyqtaryn qorǵaý kepildigi artyp, qylmystyq proseste taraptardyń saıyskerligi jáne teńdigi qamtamasyz etildi. Alǵash ret memlekettik organdar úshin azamattardyń ótinishterimen jumys isteýine arnalǵan biryńǵaı aqparattyq júıe engizildi. Aýdandyq mańyzy bar qalalar, aýyldar, kentter jáne aýyldyq okrýgter ákimderin saılaý ınstıtýty engizildi. Onyń aıasynda 1576 aýyl ákimi saılandy», dedi Úkimet basshysy.
Sondaı-aq ol jer kodeksine tıisti túzetýler engizý arqyly sheteldikterge jáne sheteldik zańdy tulǵalarǵa aýyl sharýashylyǵy jerlerin berýge túpkilikti tyıym salynǵanyn sóz etti.
