Ekonomıkalyq qaýipsizdikke nazar aýdaryldy

Prezıdent el ekonomıkasyn damytý­ǵa qatysty naqty zerttelgen, eseptelgen aýqymdy joba-josparymen tanystyryp, bul baǵyttaǵy árbir máselege jeke-jeke toq­taldy. Árbir ózekti túıtkildiń eko­nomı­kamyzdyń damýyn qalaı tejep otyr­ǵanyna mysaldar keltirip, ony sheshýdiń naqty joldaryn kórsetti.

Joldaýda eń aldymen ulttyq ekono­mıkanyń qurylymyna qatysty refor­ma­nyń basty baǵyttary ashyq aıtyldy. Eli­mizdiń ekonomıkalyq qaýipsizdigi, azyq-túlik qaýip­sizdigi, ulttyq ekonomıkanyń ishki jáne syrtqy syn-qaterlerge tózimdiligi aldyń­ǵy qatarǵa shyǵaryldy. Munyń sebebi, qa­zir­gi kezde geosaıası ahýal ýshyǵyp, álem­dik na­ryqta ekonomıkalyq tejelý anyq baı­qalady.

Memleket basshysy «Eshkim de syrttan kelip, Qazaqstandy kórkeıtip jibermeı­di» deı kele, barlyq ekonomıkalyq júıeni shuǵyl túrde túpkilikti qaıta qarap, ózgertý jolymen ǵana órkendeıtinimizdi qadap aıtty. Ekonomıkamyz ózimizdi tolyq qamta­ma­syz ete alatyn jaǵdaıǵa jetý úshin qan­daı qadamdar jasaýymyz qajettigin jipke tizgendeı etip, egjeı-tegjeı túsindirip berdi. Mysaly, jańa ónerkásip saıasatyn júrgizip, elimizdegi jumysqa otandyq shıkizatty, ta­ýar men kadrlardy paıdalaný kerektigin aıtty. Shyndyǵyna kelsek, qazir biz aýlalardy abattandyrýǵa qajetti taýarlardy (balalar alańyndaǵy qural-jabdyq­tar) Reseıden tasymaldap otyr­myz. Arzan jumys kúshi ese­­binde qurylysqa kadrlardy О́zbekstan, Qyrǵyzstannan shaqyrtamyz. Bul úrdiske tosqaýyl qoıatyn kez keldi.

Prezıdent ulttyq qaýip­sizdik máselesi­ne erekshe nazar aýdardy. Bul baǵyttaǵy mańyzdy máseleniń biri – qorǵanys-óner­ká­sip keshenin jan-jaqty nyǵaıtý. Biz qazir qorǵanys ónerkásibin­de ımportqa táýeldilikten aryla almaı otyrmyz. Áskerı tehnıkany kórshiles elder­den satyp alamyz. Prezıdent óz áskerimizdi zamanaýı áskerı tehnıkamen, qarý-jaraqpen qamtamasyz etý úshin jergilikti óndiristi damytýdy birinshi orynǵa qoıyp otyr. Bul oraıda Arnaýly qorǵanys-ónerkásip keshenin damytý qory arqyly óz kásiporyndarymyzǵa tikeleı qarjylyq qoldaý kórsetiletinin málimdedi.

Bul Joldaýdyń eki jańalyǵy – jańadan eki mınıstrlik qurylady. Prezıdent eko­no­mıkanyń strategııalyq jaǵynan mańy­zy zor eki salasy – kólik-logıstıka jáne sý sharýashylyǵyn damytýǵa aıryqsha toqtaldy. Qazirgi tańda elimiz kólik-lo­gıs­tıka salasynyń áleýetin tolyq paıda­lana almaı otyrǵanyna dálel-dáıekter kel­tirdi. Sonyń biri – syn kótermeıtin avto­joldar qurylysy, osy saladaǵy jem­qorlyqtyń artýy. Prezıdent salany tıimdi basqarý úshin Kólik mınıstrligi qurylyp, oǵan jol ınfraqurylymyn salý mindeti de qosylatynyn aıtty.

Keıingi kezderi baspasóz­de jıi kóterilgen máseleniń biri – sý. О́ıtkeni kún saıyn kúlli álemde sýdyń quny da, mańyzdylyǵy da birneshe esege artyp barady. Halyq sa­ny ósse, sýdy da kóbirek tu­ty­namyz. Sonyń bir dáleli, elor­dadaǵy sý máselesiniń birinshi orynǵa shyǵýy. Prezıdent 2040 jyldarǵa qaraı Qazaqstandaǵy sý tapshylyǵy 12-15 mıllıard tekshe metrge jetýi múmkin ekenin málimdedi. Sýǵa kelgende transshekaralyq sý kózde­rine táýeldi bolǵandyqtan ádil, tıimdi sý saıa­satyn júrgizbesek, keıin bar­maq shaınap qala­tynymyzdy alǵa tartty. Bul salada bizde másele shash-etekten. Sol sebepten Memleket bas­shysy Sý resýrstary jáne ırrıgasııa mı­nıstrligi qurylyp, sala aıasynda Ulttyq gıd­rogeo­logııa qyzmeti qaıta jumys isteıtinin súıin­shiledi.

Budan bólek, Prezıdent elimizde IT-salany damytý, ekojúıege durys kózben qaraý, kreatıvtik ındýstrııa men orta kásip­kerlikti órkendetý sekildi túıtkili mol máse­lelerge keńinen toqtaldy. Bul jumysty atqa­rý úshin bizge birlik, yntymaq, yqylas, kúsh-jiger, otanshyldyq sııaqty qasıetter qajet­tigin aıtty.

Bıbigúl JEKSENBAI,

Senat depýtaty