Foto: https://experience.tripster.ru/
Jıynda ınvestısııa tartý máselesine erekshe nazar aýdaryldy. Elorda ınvestısııa tartýda taý-ken emes óńirler arasynda kóshbasshy orynda tur. Osy jyldyń 7 aıynda ınvestısııa kólemi 9,2%-ǵa artyp, 678,5 mıllıard teńgege jetti.
Prezıdent atap ótkendeı, qazirgi kezeńde eń mańyzdy mindet eldiń berik ónerkásiptik qańqasyn qalyptastyrý bolyp sanalady. Jyl sońyna deıin óńdeý ónerkásibi salasyndaǵy 15 jobany qosa alǵanda, jalpy somasy 87 mıllıard teńgege 25 jobany qoldanysqa berý josparlanyp otyr.
Astana sonymen qatar shaǵyn jáne orta bıznestiń óńirlik ekonomıkaǵa qosqan úlesi boıynsha kóshbasshy ornyn saqtap otyr. Kásipkerlikti damytýdyń ulttyq jobasy aıasynda bıyl jyl basynan beri jalpy somasy 44,9 mıllıard teńgege 700-ge jýyq jobaǵa qoldaý kórsetildi.
Sonymen qatar týrıstik salany damytý mańyzdy baǵytqa aınalyp keledi. Iskerlik jáne medısınalyq týrızmdi damytýdy jalǵastyrý, Astana brendin ilgeriletý jáne qajetti ınfraqurylym men servıs qurý josparlanyp otyr. Medısınalyq týrızmdi damytý úshin respýblıkanyń 46 klınıkasy men medısınalyq uıymdaryn biriktiretin qaýymdastyq quryldy, ol 10 sheteldik qaýymdastyqpen yntymaqtastyq qarym-qatynasta.
15-17 qyrkúıek aralyǵynda ótetin «Comic Con» festıvali shyǵarmashylyq ındýstrııanyń mańyzdy oqıǵasy bolmaq jáne 70 myńnan astam kelýshini tartady.
Memleket basshysy Qasym-Jomart Toqaev sıfrlandyrý men ınnovasııalarǵa erekshe nazar aýdardy. Maqsaty – Qazaqstandy IT-elge aınaldyrý. Internetti jaqsartý jumysy kemshilikterdi eki ese azaıtýdy jáne 300 shaqyrymnan astam talshyqty baılanys jelisin salýdy qamtıdy. Sondaı-aq astanalyq IT-kásipkerlerdiń jobalaryn qoldaý basymdyqqa ıe.
Energetıkalyq qaýipsizdikke toqtalsaq, qalanyń jańa qurylysyn senimdi elektrmen qamtamasyz etý úshin jeti qosalqy stansııa salý josparlanyp otyr. Sondaı-aq JEO-3 jáne gaz jylý stansııalarynyń qurylysy júrgizilýde, bul qalany qosymsha jylý qýatymen qamtamasyz etedi.
Sondaı-aq №2 káriz-tazartý qurylysy jobalanýda, onyń bastalýy bıyl qazan aıyna josparlanǵan, bul qalanyń shetin de, jańa qurylys aýdandaryn da ortalyqtandyrylǵan sý burý júıesimen qamtýǵa múmkindik beredi.
Damý tujyrymdamasynyń mańyzdy aspektisi sý tapshylyǵyn joıýdy, qorshaǵan ortaǵa taraıtyn qaldyqtardy azaıtýdy jáne qaıta óńdelgen qaldyqtardyń úlesin 40%-ǵa deıin arttyrýdy esepke alǵanda «jasyl ekonomıkaǵa» kóshý bolyp sanalady.
Búgingi keńestiń qorytyndysy boıynsha Astana ákimi Jeńis Qasymbek Prezıdent Qasym-Jomart Toqaevtyń «Ádiletti Qazaqstannyń ekonomıkalyq baǵdary» atty Qazaqstan halqyna Joldaýyn iske asyrýdyń egjeı-tegjeıli josparyn ázirleýdi tapsyrdy.
