Foto: Facebook/Qýat Borash
Tabylǵan qoljazba túrki tilindegi musylman teologııasy boıynsha jazylǵan.
«Qoljazba jeti taraýdan turady. Árbir bólim ıslamnyń qasıetti keıipkerlerine qatysty bir nemese birneshe hıkaıalarmen tolyqtyrylǵan. Bul eńbek XV ǵ. sońynda ózbek-qazaq sultany Qasym Jahangırge (Qasym han) úılengen Tımýrıdterdiń bıleýshisi Sultan Hýseın Myrzanyń qyzy Aısha sultan hanym-begimge arnalǵan. Qoljazba – Aısha sultan hanym-begimniń jeke kitaphanasynda saqtalǵan. Kitap Shaıbanıdter Maýerennahrǵa kelgennen keıin Orta Azııadan qashqan Tımýrıdter arqyly Úndistanǵa jetken. Qoljazbany XIX ǵasyrda Fransııanyń Ulttyq kitaphanasy satyp alǵan. Qasym sultan men Hýseın Baıqara arasyndaǵy dıplomatııalyq qarym-qatynas belgisi jáne Qasym sultan men Aısha Begimniń (Hýseın Baıqaranyń qyzy) úılenýiniń boljamdy kúnin Hondemırdiń "Habıbý Sııar" kitabynan baıqaýǵa bolady», dep jazdy Arhıv, qujattama jáne kitap isi komıtetiniń tóraǵasy Qýat Borash óziniń Facebook paraqshasynda.
Qýat Borashtyń jazýynsha, kitapty túpteý jumystary 2 aptaǵa sozylǵan. Kóshirmeniń jekelegen betteri biriktirilip, bútin blokpen maqta jibin qoldaný arqyly tigildi. Muqabasyna arnaıy batıst matasy qaptalyp, karton qaǵazy men qanyq jasyl tústi tabıǵı bylǵary qoldanyldy.
Aıta ketsek, bul qoljazbanyń túpnusqasy Parıj Ulttyq kitaphanasynda saqtaýly tur. Qoljazba shamamen 1501-1515 jyldary jazylǵan.
