Foto: gov.kz
Elorda ákimdigi Astananyń kez-kelgen JOO-da jeke jáne memlekettik deńgeıde tegin oqı alatyn mektep túlekterine myńnan astam grant bóledi.
Qalanyń joǵary oqý oryndarynda kúndizgi oqý nysanyna aqy tóleýge sertıfıkattar Astana qalasynyń jalpy bilim beretin mektepteriniń bıylǵy túlekterine beriledi:
- jetim balalar,
- balalar úıiniń túlekteri,
- bala kezinen múgedekter,
- ata-anasynyń qamqorlyǵynsyz qalǵan balalar,
- kópbalaly otbasylardan shyqqan balalar – jan basyna shaqqandaǵy ortasha tabysy eń tómengi kúnkóris deńgeıinen aspaıtyndarǵa aqshalaı tólemder túrinde – 213 240 teńge.
Bıylǵy oqý jylynda oqýdy 30 stýdent aıaqtady, onyń 29-y dıplomyn alsa, 1-eýi respýblıkalyq grantqa kóshti. 2008 jyldan bastap barlyǵy 359 stýdent maman bolyp tirkeldi.
«Dálirek aıtsaq búgingi tańda 359 maman shyǵaryldy. Jyl saıyn bul baǵytqa qarajat qarastyrylady. 150-den astam adam oqyp jatyr. Túlekterimizdiń bári, ıaǵnı 359-ynyń ishinde 320 adam jumysqa ornalastyryldy», dedi elordanyń jumyspen qamtý jáne áleýmettik qorǵaý basqarmasy basshysynyń mindetin atqarýshy Erlan Júsipov.
Azamattardyń jekelegen sanattarynyń túlekteri (onyń ishinde oqýyn jalǵastyrýshylar) 2023-2024 oqý jylyna bekitilgen mamandyqtar tizbesine sáıkes basym mamandyqtar – medısınalyq, pedagogıkalyq jáne tehnıkalyq mamandyqtar boıynsha oqıdy.
«Bul maǵan berilgen oqý múmkindigi, al ata-anama úlken jeńildik bolmaq. Bul bizdiń otbasymyz úshin óte mańyzdy. Sapaly bilim alyp, kókjıegimdi keńeıtip, bilikti maman bolamyn dep oılaımyn», dep atap ótti grant ıegeri Lázzat Temirbolatova.
Bul joly grant sertıfıkattary 19 mekteptiń túlekterine dızaın, aqparattyq júıeler, qazaq tili men ádebıeti, kóliktik logıstıka, jalpy medısına, psıhologııa mamandyqtary boıynsha berildi.
