Sýretti túsirgen – Arlan OLJABAI
Aqsaqaldyń armany
Keshegi «Astana Arenaǵa» jınalǵan 30 myńnan asa jankúıerdiń tilegi bireý ǵana boldy. Ol – Qazaqstannyń jeńisi. FIFA reıtınginde 55-orynda turǵan fınderdi qoldaýǵa kelgen azyn-aýlaq jankúıerdi aıtpaǵanda, 30 myń jankúıer sııatyn «Astana Arenada» ıne shanshar jer bolǵan joq.
Stadıonǵa eńbektegen baladan eńkeıgen qartqa deıin aǵylyp keldi. Jastar «Qazaqstan, alǵa!», dep urandasa, jetpistiń ústindegi aqsaqal Saılaý Maqsutuly buryn mundaı jetistik bolmaǵanyn, qartaıǵan shaǵynda el quramasyn Eýro-2024 dodasynda kórgisi keletinin nemeresine aıtyp kele jatyr eken. Dereý aqsaqaldy sózge tarttyq.
– Buryn Almatyda turǵanymda KSRO chempıonatynda synǵa túsken «Qaıratqa» jankúıer bolatyn edik. Qazir el chempıonatyn sırek kóremin. Al quramaǵa únemi jankúıerlik tanytamyz. Shúkir, el quramasy búginde táýir nátıje kórsetip júr. Mundaı jetistikti biz buryn kórmegenbiz. Buryn Azııada júrgende de myqty degen qarsylastarymyzǵa jol beretin edik. Egerde Fınlıandııa men Soltústik Irlandııany fýtbolshylarymyz jeńse, onda nátıjemiz birshama jaqsaryp, Eýroǵa shyǵýǵa múmkindik týar edi. Meniń armanym osy, – deıdi aqsaqal.
Stadıonnyń ishindegi atmosferany aıtyp jetkizý múmkin emes. 30 myń jankúıerdiń qolyndaǵy jelbiregen Qazaqtyń kók týy «Astana Arenanyń» sánin keltirdi. Al 30-mınýtta barlyq jankúıer «Atameken» ánin birdeı shyrqady. Bir qyzyǵy, eki komanda arasynda match aıaqtalsa da, stadıonǵa jınalǵan jankúıerler «Qazaqstan», «Qazaqstan» dep fýtbolshylarǵa qoldaý kórsetti.
1-taım
Oıyndy eki qurama óte saq bastady. Alǵashqy 5 mınýt qos qurama bir-birin barlaýmen boldy. Ásirese dopty fınder kóbirek baqylaýda ustady. Tek oıynnyń 6-mınýtynan bastap bizdiń jigitter belsendilik tanyta bastady. 7-mınýtta Abat Aıymbetovten ádemi pas alǵan Bahtıer Zaınýtdınov shamamen 25 metrdeı jerden qarsylas komandanyń qaqpasyn kózdegen bolatyn. О́kinishke qaraı, Bahtıerdiń baǵyttaǵan doby qaqpadan bıik ketti. Al oıynnyń 9-mınýtynda Islambek Qýatta esepti ashatyn tamasha múmkindik bolǵan edi. Alaıda Islambek dopqa jetpeı qaldy. 14-mınýtta Nuráli Áliptiń áýelete asyrǵan doby Bahtıer Zaınýtdınovke jetpedi. Al 28-mınýtta eki birdeı qorǵaýshyny aldap ótken Abat Aıymbetovte gol soǵatyn zor múmkindik boldy. Abat tepken dop qaqpashynyń qolynan tabyldy. Artynsha Iаn Vorogovskıı (29-mınýtta) alystan keremet soqqy jasap kórip edi, qaqpashy dopty tóbesinen asyryp jiberdi.
Sen soqpasań, saǵan soǵady! 34-mınýtta úsh oıynshymyzdy aldap ótken Teemý Pýkkı óziniń komandalas áriptesi Olıver Antmanǵa keremet pas bergeni sol edi, Antman kóp oılanbaı esep ashty. Abyroı bolǵanda soǵylǵan gol esepke alynbady. VAR nusqaýyna súıengen tóreshi Radý Petreský shabýyl kezinde dop alańnan shyǵyp ketkenin baıqady.
Oıynnyń 41-mınýtynda alańnyń orta tusynan ózine yńǵaılap alǵan dopty Aslan Darabaev qaqpaǵa jaqyndap shirene teýip edi, qaqpashy Lýkas Gradeskı ornynan tabyldy.
2-taım
Ekinshi kezeńde bizdiń fýtbolshylar sharshańqyrap shyqqandaı kórindi, bizge. Sebebi fınder aınaldyrǵan birneshe mınýt ishinde 3-4 shabýyl jasap úlgerdi. Ásirese 62-mınýtta qonaqtardyń №11 oıynshysy Rasmýs Shýller ózine yńǵaıly kelgen dopty qaqpaǵa baǵyttap kórdi. Abyroı bolǵanda, qaqpashymyz Igor Shaskıı qaýiptiń betin qaıtara bildi. Alaıda jeńiske degen qulshynysy joǵary bolǵan fındikter 78-mınýtta degenderine jetti. Sol qaptal arqyly sýyrylyp shyqqan Rasmýs Shýller esep ashyp, komandasyn alǵa shyǵardy. Shýller Eýro-2024 irikteý aıasynda úshinshi márte qaqpanyń sańylaýyn taýyp otyr. Osy goldan keıin ekinshi taımda alańǵa shyqqan Samorodov, Tapalov, Orazov, Chesnokov jáne Dosmaǵambetov belsendi bolǵanymen esep ózgerissiz qaldy – 0:1, Fınlıandııa quramasy mańyzdy 3 upaıyna ıelik etti.
Oıynnan keıingi baspasóz máslıhatynda Qazaqstan quramasynyń bas jattyqtyrýshysy Magomed Adıev oıynnyń qıyn bolǵanyn, oıynshylar kerek emes qatelik jibergenin aıtty. Sondaı-aq ol az ýaqyt ishinde Soltústik Irlandııaǵa qarsy jigitterdi daıyndaıtynyn jetkizdi.
– Búgin bizdiń jolymyz bolmady. Oıynnan keıin jigitterge ótkendi umytyp, kelesi oıynǵa daıyndalý kerek ekenin aıttym. Eki quramaǵa da upaı aýadaı qajet edi. Bul keshte fınderdiń mereıi ústem boldy. Iá, jigitter qatelikter jiberdi. Bul – fýtbol, oıyn qateliksiz bolmaıdy. Ekinshi taımda bizdiń múmkindikterimiz birinshi taımǵa qaraǵanda kópteý boldy. Oıyndy erteń qaıta qarap, taldap, qateliktermen jumys isteımiz. 10 qyrkúıekte Soltústik Irlandııamen bolatyn oıynǵa tyńǵylyqty daıyndalamyz, – dedi bas jattyqtyrýshy M.Adıev.
Statıstıka ne deıdi?
Fınlıandııa quramasy týraly ne aıtýǵa bolady? Osy oıynǵa deıin Fınlıandııa Qazaqstan quramasy sekildi 4 oıynnan keıin 9 upaı jınap, topta birinshi oryndy bólisip turǵan edi. Eki qurama sońǵy úsh oıynda jeńiske jetken edi. Qazaqstan men Fınlıandııa bir-birimen 4 márte kezdesip, barlyq oıynda da fınder jeńis toıyn toılaǵan. Qazaqstan sońǵy ret fınderdiń qaqpasyna 2007 jyly gol soqqan.
