Foto: akorda.kz
Prezıdent, eń aldymen, Hakan Fıdandy Túrkııanyń Syrtqy ister mınıstri laýazymyna taǵaıyndalýymen quttyqtap, onyń qazaq-túrik qatynastaryn odan ári damytýǵa eleýli úles qosatynyna senim bildirdi.
Sonymen qatar Qasym-Jomart Toqaev bıyl Túrkııa Respýblıkasynyń qurylǵanyna 100 jyl tolatynyn atap ótip, bul baýyrlas memleket úshin tarıhı beles ekenin jetkizdi.
«Bir ǵasyrdyń ishinde Anadoly saıası, áleýmettik-ekonomıkalyq jáne mádenı-gýmanıtarlyq salada orasan zor tabysqa jetti. Aımaqtyq jáne jahandyq máselelerdi sheshýge belsendi jáne tabandy túrde atsalysyp, álemniń bedeldi memleketine aınaldy. Men Túrkııanyń ǵasyrlyq merekesine oraı Astana kósheleriniń birin «Anadoly» dep ataýdy tapsyrdym», dedi Qasym-Jomart Toqaev.
Memleket basshysy Túrkııa – bizdiń asa mańyzdy strategııalyq seriktesimiz ekenine nazar aýdaryp, eki el basshylarynyń kezdesýinde joǵary deńgeıdegi kóptegen ýaǵdalastyqqa qol jetkizilgenin aıtty.
«Baýyrlas elderimizdiń qarym-qatynasy keńeıtilgen strategııalyq áriptestik deńgeıine kóterildi. Túrkııa elimizdiń negizgi tórt saýda seriktesiniń birine aınaldy. Byltyr ekijaqty taýar aınalymy 54 paıyzǵa ósip, 6,3 mıllıard dollarǵa jetti. Osy kórsetkishti jaqyn arada 10 mıllıardqa jetkizýge kelistik. Eki el arasynda ınvestısııalyq yntymaqtastyq qarqyndy damyp kele jatyr. Túrkııa – Qazaqstannyń eń iri 10 ınvestorynyń biri. Qazir jalpy quny 2,8 mıllıard dollardan asatyn 36 joba boıynsha jumys júrip jatyr. Sondyqtan eki el arasyndaǵy yntymaqtastyqtyń bolashaǵy zor dep oılaımyz», dedi Prezıdent.
О́z kezeginde Hakan Fıdan Memleket basshysyna Prezıdent Rejep Taııp Erdoǵannyń sálemin jetkizip, Túrkııa tarapy ortaq kúsh-jigerdiń nátıjesinde eki eldiń ózara yntymaqtastyǵyn, sondaı-aq aımaqtyq jáne halyqaralyq arenadaǵy áleýetin budan da joǵary deńgeıge jetkizýge nıetti ekenin aıtty.
Sonymen qatar ol Prezıdent Rejep Taııp Erdoǵannyń bıyl qarasha aıynda ótetin Túrki memleketteri uıymynyń sammıti aıasynda ózara strategııalyq qarym-qatynas máselelerin keńinen talqylaýdy josparlap otyrǵanyn jetkizdi.
