Foto: gov.kz
«Jolaýshylar tasymaly» AQ parki otandyq jańa jolaýshylar vagondarymen tolyqty. Sý jańa vagondardy Qazaqstannyń «ZIKSTO» zaýyty jasap shyǵarǵan. Vagondar zamanaýı talapqa saı jasalynǵan. Atap aıtqanda, kondısıoner, aýany tazartý súzgileri, datchıkter, tambýrlardaǵy beınebaqylaý júıesi, elektr rozetkalarymen qamtamasyz etilgen. Komıtet tóraǵasynyń aıtýynsha, qazirgi ýaqytta jolaýshylar vagondarynyń parki shamamen 2500 birlikti quraıdy.
«Mınıstrlik tarapynan jolaýshylar tasymalyna arnalǵan temir jol parkin jańartý boıynsha jumystar turaqty negizde júrgizilip keledi. Osy rette vagondardy otandyq óndirýshilerdi qoldap, solardan alýymyz qýantarlyq jaǵdaı, árıne. «ZIKSTO»-men jasalǵan shartqa sáıkes 50 jańa jolaýshylar vagony satyp alyndy. Bul sharalar tasymaldaý prosesin júzege asyrý kezinde jolaýshylarǵa barynsha jaǵdaı jasaý maqsatynda qolǵa alynyp otyr», dedi A.Áli.
Jańa jyljymaly quram plaskart jáne kýpe vagondarynan turady, qyzmet etý merzimi 40 jylǵa deıin.
«Kelesi jyldyń basynda «ZIKSTO» AQ jolaýshylar tasymalyna arnalǵan taǵy 100 vagon jasap shyǵarady», dedi sóz kezeginde «Jolaýshylar tasymaly» AQ bas dırektory Jánibek Taıjanov.
Aıta keterligi, sońǵy 10 jylda temir jol kóligi parki 50 paıyzǵa jańartylǵan. Osy ýaqyt aralyǵynda zamanaýı halyqaralyq talaptarǵa sáıkes keletin 1200-den astam vagon satyp alynǵan.
