Sýretti túsirgen – Erlan OMAR, «EQ»
Eńbek jáne halyqty áleýmettik qorǵaý mınıstrligi málimdegendeı, memlekettik qoldaý sharalary arqyly 2022 jyly ataýly áleýmettik kómek (AÁK) alǵan 100,4 myń otbasy bıyl kedeılik jaǵdaıynan shyqty. Bul rette AÁK-tiń negizgi maqsaty – aqshalaı tólem túrinde qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý ekenin aıta ketken jón.
Atalǵan sharalar mynadaı qadamdardy qamtıdy: tabysy óńirlik eń tómengi kúnkóris deńgeıiniń 70%-dan aspaıtyn azamattarǵa toqsan saıyn áleýmettik kómek taǵaıyndaý; tabysy az otbasylardaǵy 1 jastan 6 jasty qosa alǵandaǵy ár balaǵa 1,5 AEK (5 175 teńge) mólsherinde aı saıynǵy qosymsha tólem berý; jumysqa ornalastyrý, óz isin ashýǵa nıetti otbasylarǵa granttar berý, biliktilikti arttyrý kýrstaryna jiberý jáne basqa da usynystar berý arqyly jumyspen qamtýǵa járdemdesý.
Byltyr AÁK alýshylar sany 141,5 myń otbasyn (728,7 myń adam) qurady. Al osy jyldyń 1 tamyzynda 102,7 myń otbasy AÁK (538,9 myń adam) aldy. О́ńirlik bóliniste bıylǵy jaǵdaı boıynsha, AÁK alýshylardyń eń kóp sany Túrkistan oblysynda – 25,1 myń otbasy (24,4%), Shymkent qalasynda – 11,1 myń otbasy (10,8%), Qyzylorda oblysynda – 8,8 myń otbasy (8,6%), Almaty oblysynda – 8,6 myń otbasy (8,4%), Jambyl oblysynda – 7,2 myń otbasy (7%), Jetisý oblysynda 6,2 myń otbasy (6%) tirkelgen.
Sonymen qatar AÁK taǵaıyndaýlarynyń eń az sany Ulytaý oblysynda – 459 otbasy (0,4%), Atyraý oblysynda – 903 myń otbasy (0,9%), Soltústik Qazaqstan oblysynda – 1,4 myń otbasy (1,3%), Qaraǵandy oblysynda – 1,7 myń otbasy (1,6%) tirkelgen.
AÁK alýshylardyń basym kópshiligi – balalardyń úlesinde, bul – 355,2 myń adam (65,9%), jumys isteıtin azamattar – 80,1 myń adam (14,9%), balalarǵa, qarttarǵa, múgedektigi bar adamdarǵa kútim jasaıtyn adamdar – 70 myń adam (13% ), al qalǵan 6,2%-y – azamattardyń basqa sanattaryna tıesili.
Qabyldanǵan sharalardyń, ásirese jumyspen qamtýǵa járdemdesýdiń belsendi sharalaryna tartýdyń nátıjesinde 2022 jyly ataýly áleýmettik kómek alǵan 141,5 myń otbasynyń ishinen óz ómirin qalypqa keltirý úshin berilgen múmkindikti sátti paıdalanǵan 100,4 myń otbasy kedeıliktiń sheginen shyqty. Solardyń biri – ońtústik óńirden kóship kelgen, qazir Soltústik Qazaqstan oblysy Qyzyljar aýdanynyń turǵyny Aqnıet Altynbaıdyń otbasy. Erli-zaıyptylar mal sharýashylyǵymen aınalysýǵa sheshim qabyldap, osy maqsatta olar shaǵyn nesıe aldy.
«Bizdiń kámeletke tolmaǵan tórt balamyz bar. Biz AÁK alýshylar qatarynda bolǵan edik. Kúıeýim mal sharýashylyǵyn damytyp, ózim dekrettik demalysta júrgen kezimde úıde pisiriletin un ónimderi men kondıterlik ónimderdi daıarlaýmen aınalysyp, otbasylyq merekeler men meıramdarǵa tapsyrystar qabyldadym. Keıinnen orta mektepke áleýmettik pedagog retinde jumysqa ornalastym. Nátıjesinde, búginde otbasymyz – AÁK alýshylar qatarynda emes», dedi Aqnıet.
