Foto: Senattyń baspasóz qyzmeti
Kún tártibine sáıkes otyrys barysynda «2007 jylǵy 6 qazandaǵy Ujymdyq qaýipsizdik týraly shart uıymynyń bitimgershilik qyzmeti týraly kelisimge ózgerister engizý týraly hattamany ratıfıkasııalaý týraly», «Ujymdyq qaýipsizdik týraly shart uıymyna múshe memleketterdiń aýmaǵynda ujymdyq qaýipsizdik júıesiniń kúshteri men quraldary quralymdarynyń ýaqytsha bolýyna baılanysty ister boıynsha ıýrısdıksııa jáne quqyqtyq kómek kórsetý máseleleri jónindegi kelisimdi ratıfıkasııalaý týraly» jáne «Ujymdyq qaýipsizdik týraly shart uıymynyń áskerlerin (Ujymdyq kúshterin) birlesken materıaldyq-tehnıkalyq jáne medısınalyq qamtamasyz etý týraly kelisimdi ratıfıkasııalaý týraly» zańdar qaraldy.
Atalǵan zańdardyń birinde «úılestirýshi memlekettiń» bolýyn kózdeıtin norma bar. Bul UQShU-nyń bitimgershilik kontıngentiniń BUU aıasyndaǵy bitimgershilik operasııalarǵa qatysýy úshin qoıatyn Birikken Ulttar Uıymynyń talaby ekenin atap ótken jón. Mundaı memleket logıstıka, kontıngentti tasymaldaý jáne qarjy máseleleri boıynsha BUU-men ózara is-qımyl jasaý úshin aıqyndalady. О́z kezeginde, UQShU-ǵa múshe ár memleket bitimgershilik operasııalarǵa qatysý dárejesi týraly sheshimdi derbes jáne erikti túrde qabyldaıdy.
«Qaralǵan zańdar Ujymdyq qaýipsizdik týraly shart Uıymynyń qyzmetine qatysty jekelegen máselelerdi retteýge baǵyttalǵan. Atap aıtqanda, Uıymnyń bitimgershilik áleýetin Birikken Ulttar Uıymy sheńberinde qoldaný múmkindigi qarastyryldy. Sonymen qatar zańdar aıasynda múshe-memleketterdiń quqyqtyq kómek kórsetý, materıaldyq-tehnıkalyq jáne medısınalyq qamtamasyz etý salasyndaǵy ózara is-qımyldyń negizderi men sharttary anyqtalady. Osy zańdar Uıymnyń beıbitshilik pen turaqtylyqty nyǵaıtý jolyndaǵy is-sharalarynyń tıimdiligin arttyrýǵa on úlesin qosady dep senemiz», dedi Máýlen Áshimbaev.
Sonymen qatar Palata otyrysynda senatorlar depýtattyq saýaldaryn joldady.
Ǵaýez Nurmuhambetov Qostanaı oblysynda egin jınaý naýqanyna baılanysty problemalar týyndap otyrǵanyn aıtyp, egindi saqtaýǵa qatysty birqatar shara usyndy.
Sultanbek Mákejanov Úkimetti respýblıkalyq bıýdjetten qosylǵan qun salyǵyn qaıtarý múmkindigin qarastyrýǵa shaqyrdy. Senatordyń aıtýynsha, bul jergilikti bıýdjetke qosylǵan qun salyǵynan túsetin táýekelderdi azaıtýǵa múmkindik beredi.
Bekbol Orynbasarov Mańǵyshlaq túbeginde ornalasqan Torysh alqabyn erekshe qorǵalatyn aýmaq dep taný jáne ony Mańǵystaý oblysynyń týrıstik marshrýtyna engizý qajettigin aıtty.
Evgenıı Bolgert elimizdegi jeke medısınalyq mekemelerge qatysty qatań sharalar qabyldaýǵa ákelip soǵatyn táýekelderdi atap ótti. Osyǵan oraı senator Densaýlyq saqtaý mınıstrligine tegin medısınalyq kómektiń kepildik berilgen kólemi sheńberinde alǵashqy medısınalyq-sanıtarııalyq kómek qyzmetterin satyp alý jáne ornalastyrý rásimine jiberý úshin kem degende 10 myń adamdy belgileý jónindegi normany alyp tastaýdy usyndy.
Sultan Dúısembınov ulttyq týrızm salasyndaǵy problemalarǵa nazar aýdaryp, týrıstik áleýetti durys paıdalaný úshin jańa memlekettik baǵdarlama qajet ekenin tilge tıek etti.
Rýslan Rústemov Araldyń kebýin jáne Qyzylorda oblysyndaǵy sý tapshylyǵy problemasyn kótere otyryp, Qaraózek ózeniniń arnasynda salynýǵa tıis sý qoımasyna sý jınaqtaýdyń mańyzdy ekenin aıtty.
Qaırat Tastekeev Qazaqstandaǵy ekrandarda sheteldik serıaldardyń kórsetilýin shekteýdi usyndy. Depýtattyń aıtýynsha, mundaı qadam ulttyq biregeılikti nyǵaıtýǵa jáne dástúrli qundylyqtardy ilgeriletýge oń áser etetin otandyq kınoındýstrııanyń damýyna tyń serpin beredi.
Andreı Lýkın qara metall synyqtaryn eksporttaý salasyndaǵy zańdylyq máselelerine toqtaldy jáne saladaǵy jaǵdaıdy sheshý úshin birqatar shara usyndy.
Álı Bektaev aýyl sharýashylyǵy maqsatyndaǵy jerlerdi paıdalaný salasyna qatysty problemalarǵa nazar aýdardy.
