Foto: https://primeminister.kz/
Is-sharaǵa ShYU elderiniń mınıstrleri, halyqaralyq qonaqúıler, otandyq jáne sheteldik týroperatorlar, áýe kompanııalar jelileriniń basshylary, sondaı-aq ınvestorlar, halyqaralyq sarapshylar, dıplomatııalyq korpýs jáne memlekettik organdardyń ókilderi qatysty.
Úkimet basshysy forýmda memlekettiń týrızmdi damytýǵa, tól mádenıetimiz ben dástúrlerimizdi nasıhattaýǵa úlken mán berip otyrǵanyn atap ótip, el Prezıdenti Qasym-Jomart Toqaev óziniń jýyrda jarııalaǵan halyqqa Joldaýynda bul salada serpindi jobalardy iske asyrýdy tapsyrǵanyn jetkizdi.
«Biz «zákirlik» jobalar iske asyrylatyn mańyzdy 10 týrıstik aımaqty anyqtadyq. Olardyń biri – Kaspıı teńiziniń jaǵalaýy. Bul - erekshe faýnasy, kórkem jaǵajaılary men ejelgi kórikti jerleri bar erekshe meken. Biz kez kelgen qonaq úshin barynsha qolaıly jaǵdaı jasaýǵa nıettimiz. Memlekettiń de, jeke sektordyń da kúsh-jigeri osyǵan baǵyttalǵan. Mundaı kúsh-jigerdiń jarqyn mysaly – Ile-Alataý, Sharyn jáne Altyn-Emel sııaqty oryndarda vızıt-ortalyqtary men eko-qonaqúılerdiń paıda bolýy. Ekologııalyq turaqtylyq negizderin basshylyqqa ala otyryp, biz týrısterdiń sanynan góri olardyń saıahattarynyń sapasyn arttyrýǵa kóshý jolynda jumys istep jatyrmyz», dedi Á.Smaıylov.
Ol Qazaqstanda azamattary vızasyz júre alatyn memleketterdiń sany 80-ge deıin artqanyn eske saldy. Sonymen qatar halyqaralyq áýe qatynasynyń geografııasy keńeıip kele jatqanyn da aıtty. Keıingi úsh jylda salaǵa $4 mlrd kóleminde ınvestısııa tartylyp, 400-den astam týrıstik nysan salynyp, Hilton, Marriott, Wyndham, Accor jáne t.b. sııaqty 20-dan astam tanymal halyqaralyq qonaq úı jelileri iske qosylǵanyn atap ótti.
«Vızalyq jáne kóshi-qon rejımin odan ári jetildirý jóninde sharalar qabyldaý, vıza alý rásimderi men áýejaılarda baqylaýdan ótýdi de jeńildetý qajet. Túrli týrıstik baǵyttardy ınfraqurylymmen qamtamasyz etý úlken mańyzǵa ıe ekenin kórip otyrmyz. Bul týraly bıznes tarapy da udaıy kóterip keledi. Biz bul máselege respýblıkalyq deńgeıde de, jergilikti deńgeıde de qoldaýdy arttyrýǵa nıettimiz», dedi Premer-mınıstr.
Týrızmdi damytý jolynda servıs pen qyzmetterdiń sapasyn arttyrý úshin sıfrlandyrýdy jandandyrý qajet ekenin de eske saldy.
Sóziniń sońynda Á.Smaıylov sheteldik delegasııa ókilderin kelesi jyly Astana qalasynda ótetin Dúnıejúzilik kóshpendiler oıynyn qonaq retinde kelýge shaqyrdy. Forým qorytyndysynda týrızm salasyndaǵy qazaqstandyq jáne sheteldik kompanııalar ózara yntymaqtastyq týraly kelisimderge qol qoıdy.
