Ystanbulda ótken IASA-ICTMD birlesken forýmynda yntymaqtastyqty damytý máselesine keńirek úńilip, jahandyq ózgerister jaǵdaıynda aýdıovızýaldy mádenı murany saqtaý jáne qorǵaý salasynda seriktestik baılanysty nyǵaıta otyra onyń (Dástúrli mýzyka) áleýeti men tarıhı materıaldardy qujattaý jáne muraǵattaý salasynda tıimdi basqarý tetikteri talqylandy. «Túrkııa men Túrki álemindegi muraǵattyq zertteýler men aýdıovızýaldy muraǵattardyń ótkeni men bolashaǵy» taqyrybyn forýmnyń basty baǵyty retinde qarastyrdy.
Forýmda Ystanbul ýnıversıtetiniń rektory, professor Osman Bıýlent Zýlfıkar, ICTM Prezıdenti Svanıbor Pettan, IASA Prezıdenti Tre Bernı, Túrksoıdyń burynǵy Bas hatshysy Dúısen Qaseıinov sóz sóıledi. Halyqaralyq IASA-ICTM forýmyna álemniń 50 elinen 400-den astam zertteýshi ǵalymdar, ǵylymı ortalyqtar men dybystyq muraǵat basshylary, tanymal dástúrli oryndaýshylar men bı ujymdary qatysty. Forým baǵdarlamasy aıasynda dóńgelek ústelder men pikirtalastar, vorkshoptar men sheberlik saǵattaryn qosa qamtydy.
Halyqaralyq dybystyq jáne aýdıovızýaldy muraǵattar qaýymdastyǵy (IASA) — álemdik dybystyq jáne aýdıovızýaldy murany uzaq merzimdi qorǵaý, qol jetkizý jáne saqtaý standarttaryn belgileıtin kásibı qaýymdastyq.
Halyqaralyq dástúrli mýzyka jáne bı keńesi (ICTMD) — IýNESKO-men resmı konsýltatıvtik qarym-qatynasta bolatyn úkimettik emes ǵylymı uıym, onyń maqsaty barlyq elderdiń dástúrli mýzykasy men bılerin odan ári zertteý, tájirıbe almasý, qujattaý, saqtaý jáne nasıhattaý bolyp tabylady.
IASA-ICTMD forýmynyń aıasynda Túrki áleminiń kórnekti mýzykanttary men bıshileriniń konserti ótkizilip, kórmeler uıymdastyryldy. Konsertke túrki elderiniń belgili ártisteri - Roza Amanova (Qyrǵyzstan), Raýshan Orazbaeva, Erlan Rysqalı, Qaırat Aıtbaev, Ernar О́miráli (Qazaqstan), Mýgam ansambli – Sabına Arablı, Rashad Ibragımov, Sııavýsh Karımov, Tabrız Iýsýbov (Ázerbaıjan), sondaı-aq Túrkııanyń mádenıet jáne týrızm mınıstrliginiń memlekettik halyq bı ansambli men «Irfan ve Meydan meşkleri» toby (Túrkııa) óner kórsetti.
2008-2022 jyldar aralyǵynda halyqaralyq TÚRKSOI uıymynyń bas hatshysy qyzmetin atqarǵan professor Dúısen Qaseıinov óz sózinde: «Túrki álemine kiretin baýyrlas halyqtar úshin kókeıkesti máselelerdiń ishindegi eń mańyzdysy ortaq dástúrli mádenı murany qorǵaý jáne saqtaý bolyp tabylady. Tamyry bir ortaq dástúrli mádenıetimizdiń qadirin uǵynyp, zerttep, zerdelep, óskeleń urpaqqa saf kúıinde amanattap, asyl muramyzdy bolashaq ıgiligine jaratý óte mańyzdy. Bul máseleler oń sheshimin tapsa Túrki balasynyń óneri men mádenıetiniń bolashaǵynyń jarqyn bolary aqıqat», dep túıindedi.
