Kókshedegi sabantoı

Qýanysh kópke ortaq. Jyl saıyn ótkiziletin dás­túrli merekede túrli etnos ókil­deri bas qosyp, bir jadyrap qaldy. Bul meıram túbi bir túrki ha­lyq­tarynyń kún­tiz­besindegi aı­ryqsha mańyzdy oqıǵalardyń biri bolyp sanalady. Sóz arasynda oblysta 17 myńǵa jýyq ta­tar-bashqurt ókilderiniń tu­ratynyn aıta ketelik.

– Mereke ótetindigi týraly habar qulaǵyma tıgen soń úıde jata almadym, – deıdi Aq­kól aýdanynyń turǵyny Razıda Ahmetjanova, – kon­serttik baǵdarlamada kóp­shilik nazaryna usynylǵan myń buralǵan bıdiń naqyshy ádemi áser etti. Ulttyq bı­diń ushqyny saǵynysh oty laý­laǵan júregimdi eljiretip jiberdi. Ulttyq dastarqandy jaınatyp jibergen tatar-bashqurttyń as máziri qandaı?

Syrly sazǵa toly ta­tar-bashqurt halqynyń án­deri oryndalyp, jasyndaı jar­qyldaǵan jigerli bıleri kórermen qaýymnyń kó­ńilin kóterdi. Eńkeıgen káriden eńbektegen balaǵa deıin birin-biri quttyqtaı júrip, ózderi pana tapqan qa­zaq dalasyndaǵy kilkip tur­ǵan baýyrmaldyqqa aq al­ǵystaryn aıtyp jatty.

– Búgingi merkege elimizdiń ár óńirinen uzyn-yrǵasy eki myńǵa jýyq meıman kelip, ortaq toıdyń qyzyǵyn kúm­pildetip jatyr, – deıdi tatar-bashqurt etno-mádenı bir­les­tiginiń tóraǵasy Rafaıl Sýl­karnaev, – ulttyq oıyndarmen birge bıylǵy jyly tuńǵysh ret báıge ótkizdik. Keler jyly halyqaralyq deńgeıde sabantoı merekesin keń kólemde atap óte­miz be degen josparymyz bar. Bú­gin aqsaqaldarymyz bas qosyp, osy jaıdy talqylamaqpyz.

Uly ónerdiń shapaǵaty arqyly dostyq dánekeri bekı túspek. Mereke barysynda kórermen nazaryna usynylǵan qolóner buıymdary, tatar-bashqurt halqynyń erterekte tutynǵan turmystyq zattary, tól mádenıeti arqyly jalpaq jurt týysqan halyqtyń bolmysyna tereńirek kóz jet­kizgendeı. Ulttar men ulys­tardy uly maqsat tóńireginde uıys­tyratyn birliktiń bekem­delýi de osyndaı tanyp-bi­lýden shyǵar bálkim.

KО́KShETAÝ