Dýnaı men Sava ózenderiniń toǵysqan jerinde ornalasqan Belgrad qalasynda jalaýy jelbiregen jarys Qazaqstan quramasy úshin sátti aıaqtaldy dep aıtýǵa tolyq negiz bar. О́ıtkeni elimizdiń erkin kúres sheberleri óz tarıhynda tuńǵysh ret álem chempıonatynyń bas júldesine qol jetkizdi. Kezinde bul – Ábilseıit Aıhanov, Amanjol Buǵybaev, Amankeldi Ǵabsatarov armandaǵan asý edi. Keńes odaǵynyń solaqaı saıasatynyń saldarynan asyl aǵalarymyzǵa dúnıejúzilik dodalarda baq synaý baqyty buıyrmady. Bul – Máýlen Mamyrov pen Islam Baıramýkov, Aqjúrek Tańatarov pen Nurlan Bekjanov, Dáýlet Nııazbekov, Dáýren Jumaǵazıev, Nurıslam Sanaev, Qorlan Jaqansha, Danııar Qaısanov, Nurqoja Qaıpanov bastaǵan beldi balýandarǵa baǵynbaǵan bıik beles edi. Sonyń ushar shyńyna 19 jastaǵy qazaqtyń ór minezdi uly Rızabek Aıtmuhan kóterildi. Tarıhı jeńis!
Úndemeı júrip, úlken is tyndyratyn Azamat Dáýletbekov qatarynan ekinshi márte álem chempıonatynyń qola medalin moınynda jarqyratty. Alash jurty úshin bul júldeniń de jóni bólek. Meırambek Qartbaı (57 kılo) men Bolat Saqaev (79 kılo) qola medal úshin talasty. Biraq ataqty qarsylastaryna jol berip, besinshi oryndy qanaǵat tutty. Osy derekterdiń ózi-aq byltyr ǵana ulttyq komandamyzdyń bas bapkeri bolyp taǵaıyndalǵan Madııar Quramysovtyń qysqa ǵana merzimde jaqsy komanda jasaqtaǵanyn ańǵartyp tur.
Jarystyń sońǵy kúni taǵy eki salmaq dárejesi boıynsha túrli-tústi medalder sarapqa salyndy. О́kinishke qaraı, Ádil Ospanov (65 kılo) pen Álisher Erǵalı (97 kılo) el senimin aqtaı almady. Ádil tusaýkeser kezdesýinde álem chempıonatynyń eki dúrkin qola júldegeri, Eýropa chempıony Ismaıl Mýsýkaevtan utyldy. Majarstannyń týy astynda óner kórsetip júrgen balqar balýany fınalǵa shyǵyp, sonyń arqasynda jerlesimiz jubanysh básekesinde beldesti. Olımpııa oıyndary men álem birinshiliginiń jeńimpazy Takato Otogýro Ospanovpen kúresýden bas tartty. Biraq kóp keshikpeı qazaq sportshysy reseılik Shámil Mámedovten utyldy. Al Álisher alǵashqy aınalymdarda qytaılyq qandasymyz Ábýsaıman Habıla men úndistandyq Sanıl Sanıdi san soqtyrǵanymen, shırek fınalda álem chempıonatynyń qola jáne Eýropa oıyndarynyń kúmis júldegeri, qurlyq chempıony grýzııalyq Gıvı Macharashvılıden jeńildi.
Eń sońǵy eki salmaqta myna balýandar júldeli oryndardy ıelendi: 65 kılo – 1. Ismaıl Mýsýkaev (Majarstan), 2. Sebastıan Rıvera (Pýerto-Rıko). 3. Shámil Mámedov (Reseı) pen Vazgen Tevanıan (Armenııa). 97 kılo – 1. Ahmed Tajýdınov (Bahreın). 2. Magomedhan Magomedov (Ázerbaıjan), 3. Kaıl Snaıder (AQSh) men Gıvı Macharashvılı (Grýzııa).
Erkin kúresten ótken jarystyń jalpykomandalyq esebinde AQSh-tyń apaıtósteri aldaryna jan salmady. Olar 3 altyn, 1 kúmis jáne 3 qola medal oljalady. Ekinshi oryndy Reseı (2+1+1) ıelense, úshinshi satyǵa Iran (1+2+1) jaıǵasty. Tórtinshi jáne besinshi oryndardy Qazaqstan men Serbııa (1+0+1) ózara bólisti. Altynshy jáne jetinshi satylarǵa Bahreın men Majarstan (1+0+0) turaqtady. Sondaı-aq júldege qol jetkizgender qatarynda Grýzııa (0+2+2), Ázerbaıjan (0+2+0), Japonııa (0+1+1), Pýerto-Rıko (0+1+0), Armenııa (0+0+3), Túrkııa (0+0+2), Albanııa, Qyrǵyzstan, Bolgarııa, Ýkraına jáne San-Marıno quramalary (0+0+1) bar.
Al joldamalar jaıynda aıtar bolsaq, AQSh pen Reseıdiń – tórt, Irannyń – úsh, Serbııa, Japonııa, Grýzııa, Túrkııa jáne Armenııanyń eki balýany kelesi jyly Parıjde alaýy tutanatyn Olımpııa oıyndaryna qatysý qurmetine ıe boldy. Qazaqstan quramasyna bir ǵana lısenzııa buıyrdy. Onyń ıegeri – 86 kılo salmaqta kúsh synasqan Azamat Dáýletbekov. San-Marıno, О́zbekstan, Albanııa, Grekııa, Pýerto-Rıko, Majarstan, Bahreın jáne Ázerbaıjannyń ókilderi de jalqy joldamany qaltaǵa basty. Alda áli eki birdeı lısenzııalyq týrnır ótedi. Bizdiń balýandar sol olqylyqtyń ornyn qurlyqtyq nemese álemdik irikteý týrnırlerinde toltyrady dep úmittenemiz.
Erkin kúres sheberleriniń jarysy támamdalar tusta áıelder kúresinen básekeler bastaldy. Boz kilemge shyqqan Maral Táńirbergenova (50 kılo) men Ankara Jańataeva (76 kılo) tusaýkeser kezdesýlerinde súrindi. Maral úndistandyq Nılamǵa, Ankara belorýssııalyq Anastasııa Zımıankovaǵa jol berdi. Sol sekildi Aınur Áshimova (57 kılo) ózbekstandyq Láılohon Sobırovadan, al Irına Kazıýlına (65 kılo) ýkraınalyq Oksana Hergelge ese jiberdi.
