Týrızm jáne sport mınıstrligi usynǵan málimetke saı, elimizdegi qolaıly klımattyq jaǵdaı, kún sáýlesi, biregeı mıneraldy qaınar kózder men emdik balshyq oryndary emdeý-saýyqtyrý nysandarynyń damýyna zor septigin tıgizip jatyr. Mysaly, ońtústiktegi Saryaǵash shıpajaıy qabyný prosesin emdeýge jáne adam aǵzasynyń jalpy jaǵdaıyna oń áser etetin, sondaı-aq uzaqmerzimdi aýrýdan keıin ımmýnıtetti qalpyna keltirýge kómektesetin mıneraldy qaınar kózderimen tanymal. Aıta ketý kerek, Saryaǵashtyń Kókterek kenti elimizdegi shıpajaılar eń kóp shoǵyrlanǵan meken sanalady.
Sonymen qatar Shyǵys Qazaqstannyń Katonqaraǵaı aýdanyndaǵy termaldy radon qaınarlary emdik qasıetteri boıynsha halyqaralyq saýyqtyrý oryndarynan kem túspeıdi. Sondaı-aq bul shıpajaı – endokrındik aýrýlardy emdeýge kómektesetin taptyrmas oryndardyń biri. Atalǵan óńirdiń tabıǵaty jazda da, qysta da birdeı. Sondyqtan jergilikti shıpajaı týrısterge kýrortty aımaqtarǵa jyldyń kez kelgen ýaqytynda demalýǵa múmkindik beredi.
Al elimizdiń batysynda ornalasqan shıpajaılar býyn, júıke júıesin, gınekologııalyq jáne ýrologııalyq patologııalardy, sondaı-aq teri aýrýlaryn emdeýge jáne aldyn alýǵa baǵyttalǵan. Býrabaı jáne Qostanaıdaǵy qaraǵaıly ormandarynyń ekologııalyq taza aýasy, emdik balshyǵy, ádemi taýly landshaft jáne biregeı tabıǵı kórikti jerler densaýlyǵyn jaqsartqysy keletinder úshin taǵy bir suranysqa ıe shıpajaı-kýrortty aımaqqa aınalyp keledi.
«Qazaqstan saýyqtyrý týrızimin damytý úshin túrli týrıstik-rekreasııaly resýrstarǵa ıe. Shıpajaı-kýrortty keshenderdiń kópshiligi jyl boıy jumys isteıdi. Bul maýsymnan tys ýaqytta baǵany tómendetýge múmkindik beredi. Sol arqyly demalys pen emdeýdi odan ári qoljetimdi etedi. Keıbir pansıonattar atpen serýendeý, tarıhı jáne tabıǵı kórikti jerlerge ekskýrsııalar júrgizý, ártúrli sporttyq jáne oıyn-saýyq is-sharalaryn uıymdastyrý jáne t.b. birqatar qosymsha qyzmetti de usynady», dedi Týrızm jáne sport vıse-mınıstri Erjan Erkinbaev.
