10 myńnan asa jankúıer tamashalaǵan «Sıbır-Arena» sport keshenindegi matchtyń birinshi kezeńi teń dárejede ótti. Kezdesýdiń nebári tórtinshi mınýtynda «Sıbır» hokkeıshisi Pavel Gogolev oıynnyń esebin ashqanymen, úziliske deıin Raılı Barber san basymdyǵyn júzege asyryp, tarazy basyn teńestirdi. Ekinshi kezeńde de eki komandanyń aıqyn basymdyǵy baıqala qoıǵan joq. Tek oıynnyń 32-mınýtynda aıdyn ıeleri bir oıynshyǵa kóp bolyp oınaǵan sátti paıdalanyp, esepte taǵy da alǵa shyǵyp aldy. Shaıba avtory – Ivan Klımovıch. О́kinishke qaraı, «Barys» oıynshylary bul kezeńde gol soǵa almady.
Úshinshi 20 mınýttyqta aıdyn ıeleri muzaıdynda erkin kósilip, «Barys» qaqpasyn eki márte dál kózdedi. 45-mınýtta Endı Andreoff taǵy da san basymdyǵyn júzege asyrsa, oıynnyń aıaqtalýyna bir mınýt qalǵanda Teılor Bek básekeniń núktesin qoıdy. 50-mınýtta Raılı Barber ekinshi márte kózge túsip, esep aıyrmasyn qysqartqanymen, komandasyn jeńilisten qutqaryp qala almady. Qorytyndy esep – 4:2.
Jerlesterimiz kelesi oıynyn búgin Nıjnekamskide «Neftehımıkpen» ótkizip, elordaǵa oralady.
