Sýretterdi túsirgender – Nurǵalı Jumaǵazy, Turar Qazanǵapov (Sportty damytý dıreksııasy)
Altynǵa bastar jol
Úshinshi jarys kúni Qazaqstan quramasy úshin sátti bastaldy. Nysana kózdeýden aralas jupta Islam Sátbaev pen Aleksandra Lı Azııa oıyndarynyń qola medalin jeńip aldy. Júldege talasta olar Iran sportshylaryn 15:11 esebimen utty. Birinshi, ekinshi oryndardy Qytaı men О́zbekstan sportshylary bólisip aldy.
Tapanshamen 25 metrge jyljymaly nysanany kózdeýden komandalyq jarysta (Nazyrqulov/Ibraev/Hýdıakov) Qazaqstan quramasy kúmis medalǵa qol jetkizdi.
Al 10 metrge jyljymaly nysanany kózdeýden (jekeleı synda) Assadbek Nazyrqulov – 4, Baqtııar Ibraev – 8, Andreı Hýdıakov 12-orynnan kórindi.
Tapanshamen nysana kózdeýden (25 metr) qyzdar quramasy irikteýden sátti ótti. Kelesi kezeń búgin ótedi.
Paıdalanbaǵan sońǵy múmkindik
Altyn júlde alatyndardyń qatarynda dzıýdoshylarymyzdyń baryn bilip, tań atysymen aldymen dzıýdo ótetin arenaǵa kelgen edik. Bul jerde bes jerlesimiz tatamıge shyqty.
78 kg salmaqta 1/8 fınalda Arýna Jangeldına ıemendik qarsylasyn 10:0 esebimen utqanymen, 1/4 fınalda ózbekstandyq balýanǵa ese jiberdi. Al jubanysh beldesýde 2018 jylǵy Azııa oıyndarynyń qola júldegeri taılandtyq Ikýmı Oıodadan «ıpponmen» basym tústi. Al úzdikter qatarynan kóriný úshin ol japon qyzy Hýenjı Iongten basym túsý kerek edi. О́kinishke qaraı, boıjetkenimiz «ıppon» ádisine túsip qaldy.
+78 kg salmaqta el namysyn qorǵaǵan Kamıla Berliqash jarysty birden 1/4 fınaldan bastaǵan-dy. Alaıda Kamılanyń alǵashqy aıaqalysy kóńildegideı bolmady. Ol mońǵolııalyq balýanǵa ese jiberip, jubanysh beldesýinde ózbekstandyq Rınota Ismatovany «ıpponmen» jeńgenimen, qola júlde úshin saıysta japon Vakava Tomıtadan jeńilip qaldy.
Al sońǵy eki Olımpıadaǵa qatysyp úlgergen Dıdar Hamza (90 kg) chemodanyn erte qamdaıtyn boldy. Jerlesimiz aldymen 1/8 fınalda ırandyq qarsylasynan basym bolǵanymen, shırek fınalda mońǵolııalyq, al jubanysh beldesýinde ońtústikkoreıalyq sportshylardan eskertýiniń kóptiginen jeńilip qaldy.
100 kg salmaqta tatamıge shyqqan Nurlyhan Sharhannyń joly óte aýyr boldy. Otandasymyz aldymen bahreındik balýandy jeńse, shırek fınalda onyń qarsylasy álem jáne Olımpıada chempıony japondyq Aaron Fılıp edi. Nurlyhan jarady. Japondyq qarsylasy oǵan qarsy eshteńe isteı almaǵan kúıi tóreshilerden úsh eskertý alyp jarysty erte aıaqtady. Alaıda jartylaı fınalda jerlesimizdi taǵy bir myqty dzıýdoshy, 2022 jylǵy álem chempıony Mýzaffarbek Týroboev kútip turǵan edi. Eńgezerdeı ózbek balýanyna tótep bergen N.Sharhan ózi ádis jasaımyn dep «ıpponǵa» túsip qaldy. Al qola úshin talasta ol ońtústikkoreıalyq Výn Jonghýnmen beldesip, «ıppon» ádisin jasap taza jeńiske jetti. Al ózbek dzıýdoshysy óziniń myqty ekenin dáleldep, Azııa oıyndarynyń jeńimpazy atandy.
100 kg salmaqta Ǵalymjan Qyryqbaı alǵashqy beldesýinde Nepal ókilin esh qınalmaı jeńgenimen, 1/4 fınalda ózbekstandyq balýanǵa ese jiberdi, jubanysh beldesýinde mońǵolııalyq balýandy utty. Al qola medal úshin bolǵan kezdesýde koreıalyq qarsylasyna ese jiberdi.
Semserlesýshiler – bir qola
Azııa oıyndarynda semserlesýshilerge úlken senim artylǵan edi. Sebebi, qos jerlesimiz Rýslan Qurbanov pen Elmır Álimjanov álem chempıonattarynda úzdik segizdiktiń qatarynan kórinetin. Alaıda bul joly altyn úshin talasta tek Elmır Álimjanovtyń ǵana múmkindigi boldy. Sol sebepti de bir top jýrnalıst pen fototilshiler Elmırdiń ónerin tamashalaýǵa aǵyldy. Jartylaı fınalǵa qos japondyq, bir gonkongtyq jáne bizdiń Elmır joldama alǵan eken. Otandasymyz japon sportshysy Kanomen ekinshi bolyp shpagaǵa shyqty.
Kezdesý bastalysymen qos qarsylas bir-birin uzaq ýaqyt ańdysýmen júrgende ekeýi de tóreshiden eskertý aldy. Sodan keıin ǵana semsershiler shabýyldaı bastady. Áıtkenmen, japon sportshysy birden 2:0 esebimen alǵa shyqty. Keıin 3:4, 3:7 esebimen japondyq basym tústi. Elmırdiń tarazy basyn teńestirýge tipti, alǵa shyǵýǵa da múmkindigi bolǵan edi. Alaıda onyń qarsylasy qorǵana júrip qarsy shabýylǵa shyǵady eken. Osyndaı ádispen japondyq semserlesýshi 15:9 esebimen jeńiske jetti. Dál osy Elmırdi jeńgen japon Azııa oıyndarynyń jeńimpazy atandy.
Al qyzdar arasynda synǵa túsken Áıgerim Sarybaı, Karına Dospaı Azııa oıyndaryn erte aıaqtady.
Bul kúni 200 metrge shalqalaı júzýde baq synaǵan Ksenııa Ignatova úzdik segiz sportshynyń qataryna enip, fınalǵa joldama alsa, erkin ádis boıynsha 400 metrge súńgigen Dıana Tasjanova irikteý saıysynda 4-orynmen fınalǵa shyqty.
Tennısten kortqa shyqqan Denıs Evseev dúbirli dodanyń tórtinshi kezeńine joldama aldy. Ol 3-raýndta taıpeılik qarsylasynan 2:1 esebimen basym tústi.
Basketboldan (3h3) erler quramasy toptyq synda Kambodjany 21:13 esebimen utty.
Jeńgenderden jeńilgender kóp
Keshe jarys jolyna bastap shyqqan taekvondoshylardyń aıaqalysy alǵashynda jaman emes edi. 63 kg salmaqta synǵa túsken, halyqaralyq jarystarda júlde alyp júrgen Nurbek Ǵazız alǵashqy kezdesýinde fılıppındik Jozef Chýany 2:0 esebimen jeńse, shırek fınalda qytaılyq Iýshýaı Iаngke qarsy daıangke kóterilip, 0:2 esebimen esesi ketti.
53 kıloda baq synaǵan Azıza Qarajanova 1/16 fınalda vetnamdyq Vý Shı Dangqa esh múmkindik bermeı, 2:0 esebimen basym tústi. Medal úshin talasta ol ońtústikkoreıalyq Hejın Parkten asa almady – 0:2.
Marııa Sevostıanova (57 kg) gonkongtyq qarsylasyn 2:0 esebimen jeńip, kelesi kezeńge joldama aldy. 100 metrge júzýden (erkin ádis) baq synaǵan Sofıa Spodarenko tek 11-orynnan kórinip, irikteýden óte almady.
E-sport, ıaǵnı kıbersport túrinen jarysqa kelgen Tasyner Kalel qatarynan úsh oıynda da (Japonııa, Koreıa, Sıngapýr) birdeı eseppen utyldy – 0:2.
Taǵy bir otandasymyz Baýyrjan Saǵymbekov dál osyndaı eseppen ońtústikkoreıalyq sportshydan jeńildi. Artynsha jaǵdaıyn jaqsartýǵa tyrysqan Baýyrjan Palestınadan kelgen sportshydan 2:1 esebimen basym tústi.
Shahmattan (qyzdar) 5-týr aıasynda qos qazaqstandyq Bıbisara Asaýbaeva men Jansaıa Ábdimálik teń tússe, 6-raýndta B.Asaýbaeva qytaılyq shahmatshy Jıner Jýge ese jiberdi. Al J.Ábdimálik úndistandyq shahmatshy Harıka Dronavallımen teń tústi.
Erler básekesinde Rınat Jumabaev Novendra Prıasmoro (Indonezııa), Qazybek Nógerbek Vetnam shahmatshysy Mınh Le Týanǵa jol berdi.
Velotrekten komandalyq sprıntte erler quramasy irikteý synynda 7-orynnan kórinse, Aqpeıil О́sim, Marına Kýzmına, Vıoletta Kazakova, Anjela Solovevadan quralǵan iz kesýshiler komandalyq saıysta tek 6-oryndy qanaǵat tutty.
Basketboldan erler quramasy alǵashqy kezdesýinde Saýd Arabııasynan 62:86 esebimen jeńilip qaldy.
Sıngapýr quramasyn 50:0 esebimen oısyrata jeńgen regbıshi qyzdarymyz Azııa oıyndaryn 5-orynmen aıaqtady.
Voleıboldan erler quramasy sońǵy matchynda Taılandtan basym túsip, Azııa oıyndaryn 9-orynmen aıaqtady.
Qytaı uzap ketti
Úshinshi kúnniń qorytyndysy boıynsha qytaılyq atletter altyn medal sany boıynsha da, jalpy medal sany boıynsha da barlyq memleketten oq boıy uzap ketti. Tipti, barlyq memlekettiń jeńip alǵan altyn medaldaryn qosqanda bir Qytaıdyń altyn júldesine jetpeıdi.
Qazaqstan quramasy ekinshi, úshinshi oryndardaǵy Koreıa men Japonııanyń medalin aıtpaǵannyń ózinde tórtinshi orynda turǵan О́zbekstannyń jeńip alǵan medaldarynyń teń jartysyna jete almaı, uıatty bolyp otyrmyz. О́zbek aǵaıyndar keshe qorjyndaryn taǵy 1 altyn, 2 kúmis jáne 5 qola medalmen tolyqtyrdy. Bir qyzyǵy, kórshi el Azııa oıyndaryna bas-aıaǵy 396 sportshy alyp barsa, Qazaqstan 524 sportshyny úkilep qosqan. Alaıda sport fýnksıonerleri sannan sapaǵa kóshetin kez kelgenin áli bilmeı júrgen sııaqty. Áıtpegende, Azııa oıyndarynyń úshinshi kúninde qorjynda birde-bir altyn bolmaýy tarıhta bolmaǵan jaıt.
Bul búgin bolǵan problema emes. Atalǵan máseleni Tokıo Olımpıadasy kórsetip bergen edi. Biraq sport basshylary odan sabaq almaǵan sııaqty. Qaıtkenmende, elge kelgennen keıin bapkerlerden bastap, tómen nátıje kórsetken sport túrine jaýap beretin basshylardyń máselesi qaralýy kerek. Qandaı sheshim bolsa da, eń bastysy, sportshylarymyz halyqaralyq arenalarda joǵary nátıje kórsetip, Ánuranymyzdy jıi oryndatsa degen tilek.
