Vedomstvonyń arnaıy ókili Aıbek Smadııarov bıyl 17-22 qyrkúıekte Premer-mınıstrdiń orynbasary – Syrtqy ister mınıstri Murat Nurtileý BUU Bas Assambleıasynyń Nıý-Iork qalasynda ótken 78-sessııasynyń joǵary deńgeıdegi segmentine qatysqanyn aıtty. «BUU Bas Assambleıasynyń alańynda SIM basshysy birqatar is-sharaǵa qatysyp, syrtqy ister mınıstrlerimen jáne halyqaralyq uıymdardyń basshylarymen kelissózder júrgizdi», dedi ol.
Arnaıy ókildiń aıtýynsha, Qazaqstannyń tóraǵalyǵymen Shanhaı yntymaqtastyq uıymyna qatysýshy elder Syrtqy ister mınıstrleriniń keńesi otyrysy ótken. Sonymen qatar Ujymdyq qaýipsizdik týraly shart uıymy, Azııadaǵy ózara senim sharalary keńesi, Túrki memleketteri uıymy músheleriniń syrtqy vedomstvo basshylary bas qosqan. Budan bólek, Islam yntymaqtastyǵy uıymynyń mınıstrlik deńgeıdegi kezekti otyrysy uıymdastyryldy.
Osy aptada Vetnam parlamenttik delegasııasy Qazaqstanǵa kelip, Senat jáne Májilis tóraǵalarymen kezdesedi. Alystan kelgen qonaqtar qatarynda Vetnam Kommýnıstik Partııasy Ortalyq komıtetiniń múshesi jáne VSR Ulttyq jınalysy Tóraǵasynyń birinshi orynbasary Ngýen Khak Dın bar. Sapar barysynda Vetnam ókilderi Senat tóraǵasy Máýlen Áshimbaev, Májilis tóraǵasy Erlan Qoshanov, Premer-mınıstrdiń orynbasary Serik Jumanǵarın, Almaty qalasy ákiminiń orynbasary Arman Qyryqbaev pen Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalımen ekijaqty kezdesýler josparlanǵan.
«Sapar eki el arasyndaǵy parlamentaralyq ózara is-qımyldy odan ári jandandyrýǵa baǵyttalǵan. Sapar barysynda Parlament Májilisinde, Syrtqy ister mınıstrliginde, Qazaqstannyń strategııalyq zertteýler ınstıtýtynda jáne L.N.Gýmılev atyndaǵy Eýrazııa ulttyq ýnıversıtetinde kezdesýler uıymdastyrylady», dedi A.Smadııarov.
Jýrnalısterdiń suraǵyna jaýap bergen resmı ókil jaqynda Seıshel araldaryna vızasyz barý rejimi kúshine enýi múmkin ekenin habarlady. «Jaqynda Qazaqstan men Seıshel araldary vızasyz rejim týraly kelisimge qol qoıdy. Osy kelisim aıasynda memleket ishindegi rásimder aıaqtalǵannan keıin vızasyz tártip kúshine enedi. Eki eldiń azamattary bir-birine 30 kúnge deıin vızasyz bara alady», dedi A.Smadııarov.
Sondaı-aq Qazaqstan men Armenııa UQShU-dan shyǵý baǵytynda kólissóz júrgizip jatyr degen qaýesetke qatysty málimet berdi. Onyń aıtýynsha, bul shyndyqqa janaspaıdy. «Bir aqparat agenttiginde osyndaı málimet shyǵypty. Bul aqparat shyndyqqa janaspaıdy. Eger Armenııa óz talaptaryn qoıyp jatsa, bul olardyń ishki máselesi. Osy jaıynda biz eshteńe aıta almaımyz. Qazaqstan UQShU aıasynda jumysyn jalǵastyryp jatyr», dedi A.Smadııarov.
